जगरनाथपुर गाउँपालिकाले किन्यो किराना पसलबाट खोप

गाउँपालिकाले ३ वटा फर्मबाट १४ लाख १३ हजार ३७९ रुपैयाँ बराबरको भ्याक्सिन खरिद गरेको महालेखा परीक्षकको वार्षिक प्रतिवेदनमा उल्लेख छ ।

२०७८ फागुन २१ मा जय दुर्गा गहवामाई सप्लायर्सबाट ४ लाख ७६ हजार ६८४ रुपैयाँको पीपीआर भ्याक्सिन–२५६० खरिद भएको छ । सोही मितिमा महाँदुर्गा सप्लायर्सलाई बीक्यू भ्याक्सिन, ३ र ५ एमएलको सिरिन्ज तथा सिरिन्ज भण्डारणका लागि ४ लाख ७६ हजार ६८४ रुपैयाँ भुक्तानी गरिएको छ ।

यसैगरी फागुन ९ मा पृथ्वीराज ट्रेड सप्लायर्सबाट ४ लाख ६० हजार रुपैयाँको सिरिन्ज र बीक्यू भ्याक्सिन खरिद गरेको छ । जिल्ला स्वास्थ्य कार्यालयका एक अधिकृतका अनुसार किराना पसलबाट भ्याक्सिन खरिदको बिल पेस गरी अनियमितता त गरिएकै छ, त्यसमाथि सिरिन्ज भण्डारणको समेत भुक्तानी गरेका छन् । ‘किरानाको व्यापार गर्ने कारोबारीले भ्याक्सिन बिक्रीको इजाजत पत्र पाउँदैन्,’ ती अधिकृतले भने, ‘सिरिन्ज खरिद गर्दा त्यसको भण्डारण शुल्क दिनुपर्दैन ।’ यी दुवै खोप गाईवस्तुलाई लगाइन्छ ।

उक्त भ्याक्सिन उपयोगसमेत नभएकोले भुक्तानी भएको रकम असुल गर्नु पर्ने महालेखा परीक्षकको कार्यालयले प्रतिवेदनमा जनाएको छ । आर्थिक कार्यविधि तथा वित्तीय उत्तरदायित्व नियमावली २०७७ को नियम ३९ मा कुनै रकम भुक्तानी दिँदा रीत पुगे/नपुगेको जाँच गरी भुक्तानी गर्नुपर्ने व्यवस्था छ । आर्थिक वर्ष २०७७/८८ मा टेन्डर भई कार्य सम्पन्न भइसकेको सम्बन्धित विभिन्न योजनाहरुको भुक्तानी दिन बाँकी रकमबाट गाउँपालिकाले किराना पसलबाट भ्याक्सिन खरिद गरेको पाइएको छ ।

कामै नगरी भुक्तानी

उक्त गाउँपालिका कार्यालयले गत आर्थिक वर्षको भुक्तानी शीर्षकबाट काम नगरेका निर्माण व्यवसायीलाई २७ लाख ७ सय १९ रुपैया भुक्तानी दिएको पाइएको छ । यसैगरी आर्थिक वर्ष २०७७/७८ मा टेन्डर भई कार्य सम्पन्न भइसकेको सम्बन्धित विभिन्न योजनाहरुको भुक्तानी दिन बाँकी रकमबाट सुति साडी खरिद गरि वितरणको लागि प्रिन्स एण्ड कसिस ट्रेडिङ सप्लायर्सलाई ९ लाख ६५ हजार रुपैयाँ भुक्तानी दिएको छ ।

महालेखाको प्रतिवेदनमा ‘उक्त भुक्तानी दिएको व्यवसायीलाई लागत अनुमान स्वीकृत नगरी, कोटेसनमा माग नगरी पत्र नमुना राखी, तुलनात्मक मूल्यांकन बेगर, नमुना सम्झौतामा राखी, स्रेस्तामा काम भएको फोटो नराखी र अनुगमन बेगर भुक्तानी दिइएको,’ उल्लेख छ । भुक्तानी दिने व्यक्तिलाई जिम्मेवार बनाउँदै भुक्तानी भएको रकम असुल गर्न निर्देशनसमेत महालेखाले दिएको छ ।

सनी निर्माण सेवाले छठघाट ढलान, प्रवेशद्वार रंगरोगन र सडक मर्मत नगरी ४ लाख ३६ हजार ५ सय ५३ रुपैयाँ, दिव्या कन्स्ट्रक्सनले प्रसौनी नहरदेखि माधोपुर स्कुलसम्म सडक मर्मत र क्लभर्ट निर्माण नगरी ४ लाख ३१ हजार १ सय ५४ रुपैयाँ, मनी कन्स्ट्रक्सनले रमा यादवको घर निर जाली बोल्डर निर्माण नगरी ४ लाख ३१ हजार ८३ रुपैयाँ र प्रिन्स एन्ड कसिस ट्रेडिङ सप्लायर्सले ह्यान्डपम्प खरिद नगरी ४ लाख ३६ हजार ९२९ रुपैयाँ भुक्तानी लिएको महालेखा परीक्षकको प्रतिवेदनमा उल्लेख छ ।

गाउँपालिका अध्यक्ष श्रीकान्त यादवले गाउँपालिकाका तत्कालीन अध्यक्ष जालिम मियाँको कार्यकालमा अनियमितता भएको बताए । महालेखा परीक्षकको कार्यालयको प्रतिवेदनअनुसार अनियमितता गर्ने सम्बन्धित कर्मचारी र फर्मलाई पत्राचार गर्ने अध्यक्ष यादवले बताए । ‘अनियमितता गर्नेलाई गाउँपालिकाले पत्राचार गर्ने तयारीमा छ,’ अध्यक्ष यादवले भने, ‘यस्ता अनियमिततामा अख्तियार दुरुपयोग अनुसन्धान आयोगले कारबाही गर्नुपर्छ । गाउँपालिकाको पत्रलाई नटेर्ने सम्भावना पनि छ ।’