स्वास्थ्यमा सुधार भएपछि स्वदेश फर्किए वर्षमान पुन

काठमाडौँ — नेकपा माओवादी केन्द्रका उपमहासचिव तथा पूर्वमन्त्री वर्षमान पुन चीनमा उपचार गराएर मंगलबार स्वदेश फर्किएका छन् ।  स्वास्थ्यमा उल्लेख्य सुधार भएपछि पुन तीन सातापछि नेपाल फर्किएका हुन् ।

उनी चाइना साउथर्न एयरलाइन्सको नियमित उडानबाट गोन्झाओ हुँदै अपराह्न १ बजे अन्तर्राष्ट्रिय विमानस्थल आइपुगेका थिए । वंशाणुगत जन्डिसपीडित पुन चुनावी धपेडीका कारण रोग बल्झिएपछि गत १६ मंसिरमा नेपाली चिकित्सकहरुको परामर्शमा फलोअप उपचारका लागि चीन गएका थिए । उनको सेनजेन प्रान्तस्थित थर्ड पिपुल्स् अस्पतालमा उपचार भएको थियो ।

नेपालबाट जाँदा पुनमा निन्द्रा नलाग्ने, शरीर चिलाउने, लगातार खोकी लाग्ने र खानामा अरुचि तथा तारन्तार बान्ता हुनेजस्ता स्वास्थ्य समस्या थिए । उपचारपछि भने ती समस्या हटेको छ । उपचारमा जानुअघि पुनको शरीरमा जन्डिस (बिलरुबिन) को मात्रा २७ विन्दु थियो । हाल बिलरुबिनको मात्रा घटेर १८ मा आएको छ । पुनमा भएको रोगलाई चिकित्सकीय भाषामा ‘सिग्गलर नाजार टाइप टू सिन्ड्रोम’ भनिन्छ ।

यसअघि गत वर्ष पनि रोगले च्यापेपछि उनको पहिला थाइल्यान्ड र पछि चीनमा उपचार गरिएको थियो । चिकित्सकले बिलरुबिन नियन्त्रित अवस्थामा राख्न पर्याप्त आरामको जरुरत रहेको बताएका छन् । स्वस्थ मानिसमा बिलरुबिनको मात्रा १.५ देखि ८ बिन्दुसम्म ठीक मानिन्छ । उक्त मात्रा त्यसभन्दा माथि हुँदा मानिसमा जन्डिस रोग लाग्ने गर्छ । पुनमा भने बिलरुबिनको मात्रा कम्तिमा १० देखि १२ सम्म हुने गरेको छ ।