कांग्रेस काभ्रेद्वारा दुई केन्द्रीय सदस्यसहित ३ जनालाई कारबाही सिफारिस
काभ्रे — प्रतिनिधिसभा र प्रदेशसभा सदस्य निर्वाचन २०७९ मा पार्टीका उम्मेदवार हराउन भूमिका खेलेको भन्दै नेपाली कांग्रेस काभ्रेले दुई केन्द्रीय सदस्य र क्षेत्रीय सभापतिलाई कारबाहीका लागि केन्द्रीय अनुशासन समितिमा सिफारिस गरेको छ ।
पार्टीका कुनै पनि जिम्मेवारीमा नरहने गरी केन्द्रीय सदस्य मधुप्रसाद आचार्य, गणेश लामा र क्षेत्र नं २ का सभापति महेश खरेललाई कारबाही गर्नुपर्ने भन्दै सिफारिस गरेको हो ।
मंसिर ४ गतेको चुनावमा क्षेत्र नं २ का प्रत्यक्षतर्फ उम्मेदवार पूर्वकेन्द्रीय सदस्य शिवप्रसाद हुमागाईं र प्रदेशसभा सदस्यका उम्मेदवार जिल्ला सभापति तीर्थ लामालाई असहयोग गरेको र विपक्षी उम्मेदवारलाई मत मागेकोले उनीहरुलाई कारबाहीका लागि केन्द्रमा सिफारिस गरेको कांग्रेस जिल्ला सभापति तीर्थ लामाले बताए ।
केन्द्रीय सदस्यद्वय आचार्य र लामा तथा क्षेत्रीय सभापति खरेलले पार्टी र गठबन्धनको उम्मेदवारलाई मत नमागेको, आफू निकटलाई सूर्य, घण्टी तथा हलो चिह्नमा मतदान गर्न लगाएको भन्दै जिल्ला कार्यसमितिमा उजुरी परेको थियो ।
त्यसैगरी कांग्रेस काभ्रेले बनेपा नगरपालिकाबाट प्रदेशसभा सदस्य उम्मेदवारलाई भन्दा प्रतिनिधिसभा सदस्य उम्मेदवारलाई तीन हजारभन्दा बढी मत कम आउनुको कारण प्रस्ट पार्न प्रदेश सांसद कञ्चनचन्द्र बादे र बनेपा नगर समितिलाई पनि निर्देशन दिने निर्णय गरेको छ ।
प्रकाशित : पुस २, २०७९ २०:०५
