एयरहोस्टेसलाई जागिरमा राख्ने सहमतिपछि ‘क्याबिन क्रु’ को आन्दोलन स्थगित 

निगमका कार्यकारी अध्यक्ष युवराज अधिकारीले नेपाल क्याबिन क्रु संघसँग आगामी दिनमा सबैको करार मिति एकै दिन (पुस १ गते) बाट सुरु हुने र सबैको करार अवधिमा एकरुपता (तीन वर्ष) रहने सम्झौतापछि आन्दोलन स्थगन भएको संघका सचिव पदम कार्कीले कान्तिपुरलाई बताए ।

उनका अनुसार कार्यकारी अध्यक्ष अधिकारीले सबै क्याबिन क्रु को करार समयमा एकरुपता कायम गर्ने तथा क्याबिन क्रुको सम्बन्धित समस्याबारे अध्ययन गरेर प्रतिवेदन बुझाउन अमृत थापाको नेतृत्वमा अध्ययन उपसमिति बनाइदिएसँगै हड्ताल फिर्ता भएको हो ।

‘कार्यकारी अध्यक्ष अधिकारीसहित ४ सदस्यीय टोली शुक्रबारदेखि मलेसियामा हुने एक व्यापारिक मेलमा सहभागी हुने भएकाले आजै हतार हतार (बिहीबारै) क्याबिन क्रुसँग सम्झौता गर्‍यौँ,’ मानव संशाधन विभागका एक अधिकारीले भने, ‘त्यसमाथी महिला कर्मचारीलाई हातपात नै भएपछि स्थिति थप भयाभह नहोस् भनेर आजै सबैलाई कार्यविधिविपरीत एकैसाथ एकै समयावधिका लागि करारमा राख्ने निर्णय गर्नुपर्‍यो ।’

ती अधिकारीका अनुसार निगमको सञ्चालक समितिले पारित गरेको परिचारक र परिचारिकाको कार्यसम्पादन मूल्यांकन तथा नवीकरणसम्बन्धी कार्यविधि-२०७७ अनुसार बिहीबार गरिएको सम्झौतामा कानुनी अड्चन छन् । तर, निगम व्यवस्थापनले सञ्चालक समितिको कार्यविधिलाई नजरअन्दाज गर्दै आन्दोलन रोक्न सम्झौता गरेको छ । उक्त कार्यविधिले एकपटकमा १० जनालाई करारमा लिनुपर्ने, करार सेवा न्यूनतम १ देखि ३ वर्षको हुने, मेडिकल प्रतिवेदन हुनुपर्नेलगायत मापदण्ड बनाएको छ ।

• वार्ता चलिरहेका बेला निगममा एयर होस्टेसमाथि हातपात

निगमको अपरेसन विभागले मंसिर मसान्तमा करार सेवा सकिन लागेका १२ जनाको मंसिर २० गते सेवा नवीकरणका लागि निगमको मानव संशाधन विभागमा सिफारिश गरेको थियो । तर, उक्त विभागले कार्यविधिमा टेक्दै १० जनाको मात्रै करार नवीकरण गरेर आरती महर्जन र स्मिता गुवाजुको करार नवीकरण नगरी मंगलबार निष्काशनको पत्र दिएको थियो । उनीहरूलाई निष्काशन गरेपछि क्याबिन क्रुले अत्यावश्यक सेवा सञ्चालन ऐनविपरीत हड्ताल गरेका थिए ।

हड्तालको दोस्रो दिन क्याबिन क्रुको आन्दोलन स्थगन भएलगत्तै निगमले बिहान ९ बजेका लागि राखेको साउदी अरबको रियाद तथा ११:४५ का लागि तोकेको दिल्ली उडान ८ घण्टापछि बिहीबार बेलुकाका लागि तय भएको छ । ती दुई उडानबाट जाने ३ सय ५५ यात्रुहरूले त्रिभुवन अर्न्तराष्ट्रिय विमानस्थलमा दिनभर नाराबाजी गरेका थिए ।

विमानस्थलमा तोडफोडलगायत घटना हुन नदिन विमानस्थलका महाप्रबन्धक प्रेमनाथ ठाकुरले डीएसपीको कमान्डमा प्रहरी सुरक्षा राखेका थिए । ‘निगम व्यवस्थापनको लाचारीपनका कारण दिनभर सयौं यात्रुले दुःख पाए । उनीहरूलाई खाना र खाजाको प्रबन्ध मिलाइदियौं । तोडफोड हुन नदिन प्रहरीको टोली पनि राखेका थियौं,’ विमानस्थलका महाप्रबन्धक प्रेमनाथ ठाकुरले भने ।

• निगमका जहाज मलेसिया र दुबईमा रोकिए, सयौं यात्रु अलपत्र

हड्ताल गर्न नपाइने कानुनविपरीत क्याबिन क्रुले आन्दोलन गर्दा निगमका दुइटा विमान मलेसिया र दुबईमै रोकिएका छन् । दुबईबाट काठमाडौं फर्किनुपर्ने १ सय ४० र मलेसियाबाट फर्किनुपर्ने १ सय ७५ यात्रुलाई समयमै ल्याउन नसक्दा निगमको खर्चमा त्यहाँका होटलमा राखिएको प्रवक्ता अर्चना खड्काले बताइन् ।

दुई दिनको हड्तालका कारण निगमका जहाज उतै राख्दा लाग्ने विमानको पार्किङ शुल्क, चालकदलका सदस्य र यात्रुको होटल खर्च, काठमाडौंमा अलपत्र परेका यात्रुको खर्चसम्मेत जोड्दा निगमले कम्तीमा ५० लाख रुपैयाँ अतिरिक्त खर्च बेहार्नुपर्ने भएको छ ।

यसैबीच साहानीमाथि हातपात गर्ने निगमका ट्रेड युनियनका कर्मचारी राजु श्रेष्ठले कार्यकारी अध्यक्ष अधिकारीको कार्यकक्षमा सहनीसँग माफी मागेका छन् ।