कांग्रेसले साँझ ८ बजेसम्म पनि बुझाएन समानुपातिक सूची, कर्मचारी कुरेको कुर्‍यै

काठमाडौँ — प्रतिनिधिसभा तथा प्रदेशसभाको समानुपातिकतर्फ निर्वाचित सांसदहरूको नाम विभिन्न दलहरूले निर्वाचन आयोगलाई सिफारिस गरेका छन् । तर समानुपातिकमा दोस्रो धेरै सिट जितेको नेपाली कांग्रेसले ८ बजेसम्म नाम सिफारिस गरेको छैन ।

नेपाली कांग्रेस बाहेक अन्य राजनीतिक दलहरूले भने बन्द सूची बुझाइसकेका छन् ।आयोगले समानुपातिक निर्वाचन प्रणालीबाट सांसद चुनिएका व्यक्तिहरूको नाम बुझाउने समय शनिबार दिउँसो ४ बजेसम्म तोकेको थियो ।

तर निर्धारित समयमा पनि कांग्रेसले नाम सिफारिस गरिसकेको छैन । निर्वाचन आयोगका अधिकारीहरूका अनुसार केही व्यक्तिहरूको नागरिकता भने आयोगको कार्यालयमा आएको छ । तर उनीहरूको नामावली अझै आएको छैन ।

आयोगका एक कर्मचारीका अनुसार शनिबार साँझ कांग्रेस पार्टी कार्यालयका एक कर्मचारीले झोलाबाट केही नागरिकता झिकेर दर्ता गर्न लगाएका थिए । तर उनीहरूको नामावली दिइएको थिएन । आयोगका ती कर्मचारीले भने, 'एक प्रतिनिधि आएर झोलाबाट नागरिकता निकालेर बुझाए । तर उनीहरूको नाम पार्टीले निर्णय गरेको हो कि हैन भन्नेबारे उनलाई नै थाहा रहेनछ । हामीले सोध्दा उनीहरूको नाम बिहान सिफारिस भएको तर साँझ यसबारे आफूलाई जानकारी नभएको प्रतिक्रिया दिए ।'

आयोगका कर्मचारीहरू भने कांग्रेसबाट समानुपातिक सांसदको सिफारिस नामावली पर्खिएर राति ८ बजेपछिसम्म बसिरहेका छन् । तर यसबारे उनीहरू पनि अन्योल देखिएका छन् ।

राप्रपाका प्रतिनिधि भने निर्वाचन आयोगको बहादुर भवनस्थित कार्यालयमा पुगेर साँझ ८ बजे सूची बुझाएका थिए । कांग्रेसले निर्धारित समयमा सूची नबुझाउँदा निर्वाचन आयोगमा कर्मचारीहरू भने कार्यालयमै पर्खिएर बसिरहेका छन् ।

मंसिर ४ गते भएको चुनावमा प्रतिनिधिसभातर्फ ७ वटा राजनीतिक दलले ३ प्रतिशत थ्रेसहोल्ड कटाउँदै समानुपातिकतर्फ आफ्नो सांसद निर्वाचित गर्न योग्य भएका छन् ।

१ सय १० सदस्यको समानुपातिकतर्फ नेकपा एमालेले ३४, नेपाली कांग्रेसले ३२, माओवादी केन्द्रले १४, राष्ट्रिय स्वतन्त्र पार्टीले १३, राप्रपाले ७, जसपाले ५ र जनमत पार्टीले ५ सिट प्राप्त गरेका छन् ।