गिरीको दोस्रो संसद् यात्रा

उनले ३६ हजार ८ सय ४२ मत प्राप्त गर्दा वली २९ हजार ३२ मतमा रोकिइन् । ०५१, ०६४ र ०७४ मा पराजित भएका उनले पाँचौं पटक चुनाव लडेर दोस्रो पटक जित निकालेका हुन् ।

गिरी ०५१ को प्रतिनिधिसभा निर्वाचनमा दाङ–२ बाट एमालेका शंकर पोखरेलसँग पराजित भएका थिए । ०६४ को संविधानसभा निर्वाचनमा दाङ–५ मा माओवादीका सुष्मा शर्मा घिमिरेसँग पराजित भए । ०७० को संविधानसभा निर्वाचनमा एमालेका उत्तरकुमार वलीलाई पराजित गरी संविधानसभा सदस्यमा विजयी भए । ०७४ मा दाङ–३ बाट एमालेका हीराचन्द्र केसीसँग पराजित भए । ०७० मा जितेपछि उनी सिँचाइमन्त्रीसमेत भए । ९ महिनामात्रै सिँचाइमन्त्री भए पनि महत्त्वपूर्ण काम गरेको र उक्त कामको परिणामस्वरूप निर्वाचन जितेको उनले बताए । ‘कामका आधारमा मैले मत पाएको छु, जनताले मेरो उचित मूल्यांकन गरेका छन्,’ उनले भने, ‘मैले मन्त्री हुँदा सुरु गरेका धेरै काम अलपत्र छन् । अब ती काम पूरा गर्नुपर्नेछ ।’

गठबन्धन बलियो भएको, इमानदारीसाथ निरन्तर राजनीतिमा रहेको र सिँचाइमन्त्री हुँदा सिँचाइ आयोजनामा धेरै काम गरेका कारण जनताले आफूलाई निर्वाचित गरेको उनको बुझाइ छ । मन्त्री हुँदा बृहत् दाङ उपत्यका सिँचाइ आयोजना स्थापना गरी पक्की नहर, बाँध, डिपबोरिङ, जलाशयजस्ता संरचना निर्माण गरेको र बाँकी योजनालाई अब पूर्णता दिने उनले बताए । ‘मैले थालेका धेरै काम पूरा गर्न बाँकी छ, कतिपय स्थानमा अझै पनि सिँचाइको समस्या कायमै छ,’ उनले भने, ‘दंगाली उर्वरभूमिमा कृषिको सम्भावना भएकाले मैले बृहत्तर दाङ सिँचाइ आयोजना सुरु गरेको हुँ । अब यसलाई निरन्तरता दिन लागिपर्छु ।’

टरिगाउँ विमानस्थलको स्तरोन्नति तथा नियमित सञ्चालन, विपद् व्यवस्थापन, तुलसीपुरलाई व्यवस्थित सहरका रूपमा विकास, राप्ती प्रादेशिक अस्पताल तुलसीपुरमा विशेषज्ञसहितको गुणस्तरीय स्वास्थ्य सेवा, सुशासन अभिवृद्धिलगायत काम गर्ने योजना बनाएको उनले बताए । ०३० सालदेखि नै मुलुकमा प्रजातन्त्र प्राप्तिको आन्दोलनमा सहभागी भएका गिरी निरन्तर राजनीतिमा छन् । विद्यार्थीकालमा हक्की स्वभावका कारण उनलाई धेरैले आक्रामक नेताका रूपमा चिन्थे । पछिसम्म पनि त्यही खालको छाप पर्दा आफूलाई कहिलेकाहीं समस्या पर्ने गरेको उनले बताए । ‘विद्यार्थीकालमा राजनीति त्यस्तै खालको थियो, विवाद र झडपहरू हुन्थे,’ उनले भने, ‘त्यतिबेलाका दिन सम्झेर मलाई धेरैले आक्रामक नेताका रूपमा पनि चिन्छन् तर नजिकबाट जान्नेले वास्तविकता थाहा पाउँछन् ।’

०३० मा तुलसीपुरस्थित महेन्द्र माविमा पढ्दापढ्दै पक्राउ परे । १३ वर्षकै उमेरमा गिरफ्तार भई १३ दिन हिरासतमा बसे । ०३१ मा अञ्चलाधीशको ठाडो आदेशमा २९ दिन हिरासतमा बसे । ०३७ मा ५७ दिन अञ्चलाधीशको ठाडो आदेशमा हिरासतमा बसे । ०३३ मा राष्ट्रिय मेलमिलापको नीति लिई बीपी कोइराला काठमाडौं ओर्लंदा उनको स्वागतमा सक्रियतापूर्वक खटिनेमध्येका गिरी एक थिए । विद्यार्थीकालमा तडकभडकपूर्ण जीवनशैली बिताउन सक्ने अवस्था हुँदा पनि सरल जीवनशैली बिताएको उनले बताए । ‘मेरो घरको अवस्थाले मलाई नपुग्ने केही थिएन तैपनि म कहिल्यै विलासितामा रमाइनँ,’ उनले भने, ‘यही इमानदार र सरल जीवनशैलीले मलाई राजनीतिमा टिकाएको छ ।’

आफूसँगैका नेताहरू धेरै माथिल्लो तहमा पुग्दा पनि आफू बढी महत्त्वाकांक्षा नपालेर बसेको उनले बताए । ‘म लगातार तीन पटक पार्टीको केन्द्रीय सदस्य भएर काम गरिरहेको छु,’ उनले भने, ‘आफूसँगैका साथीहरू माथिल्लो पदमा पुगिसके तैपनि म चित्त बुझाएर बसेको छु ।’

०३४ मा कांग्रेस दाङ–४ को सभापति, ०३६ मा नेविसंघको केन्द्रीय सदस्य, ०३६ मै नेविसंघको राष्ट्रिय महाधिवेशनको तयारी समिति संयोजक, ०४२ मा सत्याग्रह आन्दोलनको केन्द्रीय एक्सन कमिटी सदस्य, ०४३ मा त्रिभुवन विश्वविद्यालय केन्द्रीय क्याम्पसको स्वतन्त्र विद्यार्थी युनियनको महासचिव भए । ०४६ देखि निरन्तर पार्टीको महाधिवेशन प्रतिनिधि एवं महासमिति सदस्य भए । उनी १२ औं महाधिवेशनदेखि लगातार तेस्रो पटक कांग्रेस केन्द्रीय सदस्य छन् ।