बदलियो राजनीतिक परिदृश्य- समाचार - कान्तिपुर समाचार

बदलियो राजनीतिक परिदृश्य

संघीय राजधानीसहित मध्य नेपालमा राष्ट्रिय स्वतन्त्र, पश्चिम तराईमा नागरिक उन्मुक्ति र मधेसमा जनमत पार्टीको उदय 
स्थापित दलहरु परम्परागत प्रभाव क्षेत्रमा खुम्चिए, नयाँमा फैलिए
तुफान न्यौपाने

काठमाडौँ — मंसिर ४ मा सम्पन्न आमनिर्वाचनले संसद्को समीकरणमा व्यापक फेरबदल ल्याएको छ । संघीय राजधानीसहित मध्य नेपालमा राष्ट्रिय स्वतन्त्र, पश्चिम तराईमा नागरिक उन्मुक्ति र मधेसमा जनमत पार्टीको उदय भएको छ । स्थापित दलहरू आफ्ना परम्परागत प्रभाव क्षेत्रमा खुम्चिएका छन् भने केही नयाँ क्षेत्रमा फैलिएका छन् । 

प्रत्यक्षतर्फको १६५ मध्ये सोमबार रातिसम्म १५८ क्षेत्रको परिणाम आउँदा कांग्रेसले अघिल्लो निर्वाचनको तुलनामा दोब्बरभन्दा बढी सिट जितेको छ । एमाले र माओवादीले भने आधाजसो सिट गुमाएका छन् । सात सिट जितेको राप्रपा राष्ट्रिय पार्टी बन्ने निश्चित भएको छ । एकीकृत समाजवादीले प्रत्यक्षतर्फ १० सिट हात पारेको छ भने मधेसका दुई प्रमुख दल जसपा र लोसपा पहिलेभन्दा खुम्चिएका छन् । राष्ट्रिय स्वतन्त्र पार्टीले ७ सिट जितेको छ ।

एमाले : पहिला ८०, अहिले ४२

०७४ मा माओवादीसँग गठबन्धन गरेर स्थायी सरकार र समृद्धिको नारासहित चुनावमा होमिएको एमालेले प्रत्यक्षतर्फ ८० सिट जितेको थियो । माओवादीसँग भएको एकता टुटेको र साबिकको पार्टी पनि फुटेर एकीकृत समाजवादी बनेको अवस्थामा निर्वाचनमा जाँदा करिब आधा क्षेत्र गुमाउँदै एमाले ४२ सिटमा सीमित भएको छ ।

०७४ मा वाम गठबन्धनको मतले एमालेका उम्मेदवारले जितेकामध्ये ६ वटा क्षेत्र त्यस्ता थिए, जहाँ प्रतिस्पर्धीसँगको मतान्तर १ हजारभन्दा कम थियो । मोरङ–६, धादिङ–२, काठमाडौं–८, मनाङ, मुस्ताङ र कञ्चनपुर–३ मा एमाले उम्मेदवारले एक हजारभन्दा कम मतान्तरले जितेका थिए ।

यी सबै क्षेत्रमा ०७४ मा कांग्रेस प्रमुख प्रतिस्पर्धी दल थियो । अहिले यीमध्ये ५ वटा क्षेत्र कांग्रेसले एमालेबाट फुत्काएको छ भने एउटा क्षेत्र (काठमाडौं–८) राष्ट्रिय स्वतन्त्र पार्टीका उम्मेदवारले जितेका छन् । अर्थात् अघिल्लो चुनावमा एक हजारभन्दा कम मतान्तरले जितेका सबै क्षेत्र यस पटक एमालेले गुमाएको छ ।

यो निर्वाचनमा एमालेका ४२ मध्ये ५ सांसद एक हजारभन्दा कम मतान्तरले विजयी भएका छन् । तीमध्ये तीनवटा क्षेत्र (काठमाडौं–९, ताप्लेजुङ र पाँचथर) ०७४ मा एमालेले ठूलो मतान्तरमा जितेको थियो । ०७४ मा माओवादीले जितेको सर्लाही–३ र तत्कालीन संघीय समाजवादी फोरम (हालको जसपा) ले जितेको पर्सा–३ एमालेले फुत्काएको हो ।

त्यस्तै ०७४ मा एमालेले एक हजारभन्दा बढी तर ५ हजारभन्दा कम मतान्तरले जितेका २० क्षेत्र थिए, तीमध्ये १९ वटामा कांग्रेस र एउटामा तत्कालीन संघीय समाजवादी फोरम प्रमुख प्रतिस्पर्धी थिए । यी २० मध्ये एमालेले यस पटक सिरहा–३ मात्रै जोगाउन सक्यो । आफू प्रमुख प्रतिस्पर्धी रहेका १९ मध्ये कांग्रेसले १४ क्षेत्र (संखुवासभा, तेह्रथुम, मोरङ–३, काठमाडौं–३, तनहुँ–२, नवलपरासी पूर्व–२, म्याग्दी, कपिलवस्तु–२, बाँके–३, नवलपरासी पश्चिम–१, मुगु, सुर्खेत–१, अछाम–२ र कैलाली–५) जितेको छ । बाँकी ५ मध्ये तीन क्षेत्र (धनुषा–४, स्याङ्जा–२ र बाजुरा) को नतिजा आउन बाँकी छ । कैलाली–२ मा नागरिक उन्मुक्ति र डोटीमा एकीकृत समाजवादीले जितेका छन् । नतिजा आउन बाँकी धनुषा–४ मा एमालेका सचिव रघुवीर महासेठ प्रतिस्पर्धामा छन् भने स्याङ्जा–२ र बाजुरामा विवादले मतगणना सुरु हुन सकेको छैन । एकीकृत समाजवादीका प्रेम आलेले जितेको डोटीमा अघिल्लो पटक एमालेबाट आलेले नै जितेका थिए ।

यो निर्वाचनमा एमालेले १ हजारभन्दा बढी तर ५ हजारभन्दा कम मतान्तरले जितेका क्षेत्र २३ वटा छन् । जसमध्ये १४ क्षेत्र (इलाम–१, इलाम–२, झापा–२, धनकुटा, सिरहा–३, मकवानपुर–२, कास्की–१, कास्की–२, पर्वत, गुल्मी–२, पाल्पा–२, रूपन्देही–१, रूपन्देही–२ र बैतडी) अघिल्लो पटक आफूले जितेकामध्येबाट एमालेले जोगाएको हो । एमालेले माओवादीबाट ५ (सोलुखुम्बु, उदयपुर–२, महोत्तरी–१, लमजुङ र अर्घाखाँची), कांग्रेसबाट ३ (मोरङ–२, सिरहा–१ र कपिलवस्तु–३) र तत्कालीन संघीय समाजवादी फोरमबाट बारा–३ खोस्न सफल भएको हो । सोलुखुम्बुमा एमालेले पहिलो पटक जितेको हो ।

पहिले माओवादीबाट जितेका टोपबहादुर रायमाझी एमाले प्रवेश गरेर अर्घाखाँचीबाट जित निकाले भने लमजुङमा एमालेका उपमहासचिव पृथ्वीसुब्बा गुरुङले माओवादीका महासचिव देव गुरुङलाई हराए । वाम गठबन्धनसँग एक्लै लडेर करिब ५ हजार मतान्तरले कांग्रेसले जितेको कपिलवस्तु–३ पनि अहिले एमालेले फुत्काएको छ । एमालेले ०७४ मा जितेका ८० मध्ये यो निर्वाचनमा २३ क्षेत्रमात्रै जोगाउन सक्यो, ५७ वटा गुमायो । अघिल्लो निर्वाचनमा जित्न नसकेका १९ वटा नयाँ क्षेत्र भने एमालेले अरू दलबाट तानेको छ । एमालेका नयाँ १९ क्षेत्रमध्ये माओवादीले ९, कांग्रेसले ६, तत्कालीन संघीय समाजवादी फोरमले २, राष्ट्रिय जनमोर्चा र तत्कालीन राजपाले एक/एक वटा जितेका थिए ।

अघिल्लो निर्वाचनमा जितेको तर एमालेले अहिले गुमाएका ५७ क्षेत्रमध्ये कांग्रेसले ३५, एकीकृत समाजवादीले ७, राष्ट्रिय स्वतन्त्र पार्टीले ५, राप्रपाले २, नागरिक उन्मुक्तिले १, राष्ट्रिय जनमोर्चाले १ र माओवादीले १ क्षेत्र बाँडेका छन् ।

फैलियो कांग्रेस

कांग्रेसले पाँच वर्षअघिको तुलनामा उल्लेखनीय प्रगति गरेको छ । ०७४ मा शक्तिशाली वाम गठबन्धनसँग एक्लै लड्दा प्रत्यक्षतर्फ २३ सिटमा खुम्चिएको कांग्रेस अहिले अघिल्लो चुनावमा एमालेसँगको गठबन्धनमा रहेका दलहरूलाई समेत मिलाएर चुनावमा गएको थियो । कांग्रेसले अघिल्लो पटक जितेकामध्ये चारवटा क्षेत्रको मतान्तर १ हजारभन्दा कम थियो । तीनवटा (सुनसरी–३, उदयपुर–१ र बर्दिया–१) एमाले तथा एउटा (काठमाडौं–१) मा विवेकशील साझा प्रमुख प्रतिस्पर्धी थिए । बर्दिया–१ र काठमाडौं–१ कांग्रेसले जोगाएको छ भने सुनसरी–३ र उदयपुर–१ को मतगणना सकिएको छैन । सुनसरीमा कांग्रेसका विजयकुमार गच्छदारलाई एमालेकी भगवती चौधरीले फराकिलो अन्तरमा पछाडि पारेकी छन् । उदयपुरमा परराष्ट्रमन्त्री नारायण खड्कालाई एमालेकै मञ्जुकुमारी चौधरीले पछ्याइरहेकी छन् ।

अघिल्लो चुनावमा कांग्रेसले जितेकामध्ये मतान्तर ५ हजारभन्दा कम तर एक हजारभन्दा बढी भएका क्षेत्र १२ थिए । जसमध्ये सातवटामा एमाले निकटतम प्रतिद्वन्द्वी थियो । ती सात क्षेत्रमध्ये तीनवटा (रौतहट–४, रसुवा र काठमाडौं–४) कांग्रेसले जोगाएको छ । तीनवटा (मोरङ–२, सिरहा–१ र बारा–१) एमालेले र एउटा (काठमाडौं–६) राष्ट्रिय स्वतन्त्र पार्टीले जितेको छ । ०७४ मा कांग्रेस उम्मेदवारले ५ हजारभन्दा कम मतान्तरले जितेकामध्ये दुईवटा (काठमाडौं–१० र नवलपरासी सुस्ता बर्दघाटपूर्व–१) मा माओवादी, दुईवटा (रौतहट–२ र कपिलवस्तु–३) मा फोरम र एउटा (सर्लाही–४) मा राजपाका उम्मेदवार प्रमुख प्रतिस्पर्धी थिए । माओवादी प्रमुख प्रतिस्पर्धी रहेका दुवै क्षेत्र कांग्रेसले जोगाएको छ । फोरम प्रतिस्पर्धी रहेकामध्ये एउटामा स्वतन्त्र उम्मेदवार (रौतहट–२) तथा एउटामा एमालेका उम्मेदवार (कपिलवस्तु–३) विजयी भएका छन् । तत्कालीन राजपा प्रमुख प्रतिस्पर्धी रहेको सर्लाही–४ मा कांग्रेसबाट टिकट नपाएपछि स्वतन्त्र उम्मेदवार बनेका अमरेशकुमार सिंहले चुनाव जितेका छन् ।

कांग्रेसले ०७४ मा जितेका २३ क्षेत्रमध्ये १० वटा मात्र अहिले जोगाउन सक्यो । बचेका १४ क्षेत्रमध्ये एमालेले ६ वटा (मोरङ–२, सुनसरी–२, सिरहा–१, बारा–१, रूपन्देही–५ र कपिलवस्तु–३) कांग्रेसबाट खोस्न सफल भयो । सुनसरी–३, सुनसरी–४ र उदयपुर–१ को नतिजा आइसकेको छैन । स्वतन्त्र उम्मेदवारले सर्लाही–४ र रौतहट–२, राष्ट्रिय स्वतन्त्र पार्टीले काठमाडौं–६, राप्रपाले नवलपरासी बर्दघाट पश्चिम सुस्ता–२ र लोसपाले रूपन्देही–४ मा जितेका छन् । कांग्रेसले जितेका ५३ क्षेत्रमध्ये आफूले अघिल्लो पटक जितेकाबाट १० वटा जोगाएको छ भने ४३ वटा नयाँ क्षेत्र जितेको छ । जसमध्ये एमालेबाट ३२ वटा, माओवादीबाट ५ वटा, तत्कालीन फोरमबाट ४ वटा र तत्कालीन राजपाबाट दुईवटा प्राप्त गरेको हो ।

खुम्चिँदै माओवादी

शान्ति प्रक्रियामा आएपछि माओवादीले पहिलो पटक ०६४ को संविधानसभा निर्वाचनमा प्रतिस्पर्धा गरेको थियो । प्रत्यक्षतर्फ २४० मध्ये आधा अर्थात् १२० वटामा जित निकालेको माओवादीले त्यसको ६ वर्षपछि भएको संविधानसभाको दोस्रो निर्वाचनमा भने उक्त जितको एक चौथाइ पनि जोगाउन सकेन । ०७० को निर्वाचनमा २६ सिट (करिब ११ प्रतिशत) मा खुम्चियो । त्यसपछि माओवादीले संसदीय निर्वाचनमा पार्टीको अस्तित्व बचाउने उपायका रूपमा गठबन्धन संस्कृतिलाई अंगाल्ने नीति लिएको देखिन्छ ।

०७४ मा एमालेसँगको गठबन्धनबाट माओवादीले १६५ सिटमध्ये ३६ वटामा जित निकालेको थियो । हुम्लाबाट स्वतन्त्र रूपमा जितेका छक्कबहादुर लामा प्रवेश गरेपछि माओवादीको प्रत्यक्षतर्फको सिट संख्या ३७ पुगेको थियो । चुनावपछि भएको एमालेसँगको एकीकरण नटिकेपछि माओवादीले यस पटक कांग्रेस, एकीकृत समाजवादी र जनमोर्चासँग गठबन्धन गरेको थियो तर उसले ५ वर्षअघिको भन्दा आधा अर्थात् १७ सिटमा मात्रै जित निकाल्न सक्यो ।

माओवादीले जितेका यी १७ क्षेत्र हेर्दा कांग्रेस र एमालेको भन्दा फरक तस्बिर देखिन्छ । माओवादीले जितेका १४ (भोजपुर, मोरङ–४, सिन्धुली–२, नुवाकोट–१, काभ्रे–१, सिन्धुपाल्चोक–१, बागलुङ–२, रुकुम पूर्व, रुकुम पश्चिम, रोल्पा, दाङ–२, हुम्ला, कालीकोट र जाजरकोट) वटा पुरानै क्षेत्र हुन् । यस पटक माओवादीले तीनवटा नयाँ क्षेत्र (गोरखा–२, सर्लाही–२ र खोटाङ) जितेको छ । जसमा गोरखा–२ कांग्रेसको समर्थनमा तत्कालीन नयाँ शक्ति पार्टीबाट बाबुराम भट्टराईले जितेको क्षेत्र हो भने सर्लाही–२ तत्कालीन राजपाका उम्मेदवार महिन्द्र राय यादवले जितेको क्षेत्र हो । अहिले भट्टराई र यादव दुवै आबद्ध नेपाल समाजवादी पार्टीले माओवादीसँग एकीकरण गर्ने प्रक्रिया सुरु गरेको छ । भट्टराईले छाडेपछि गोरखा–२ मा माओवादी अध्यक्ष पुष्पकमल दाहालले जितेका छन् भने सर्लाही–२ मा माओवादीकै चुनाव चिह्नबाट यादवले नै जितेका छन् । माओवादीले यो निर्वाचनमा विस्तार गरेको नयाँ क्षेत्र खोटाङ मात्रै हो, जहाँ कांग्रेसको समर्थनमा माओवादीका रामकुमार राईले एमालेका विशाल भट्टराईलाई करिब २६ सय मतान्तरले हराए । माओवादीले अघिल्लो निर्वाचनमा ३६ क्षेत्र जित्दा १ हजारभन्दा कम मतान्तरले जितेको केबल एउटा क्षेत्र (कपिलवस्तु–१) थियो । त्यहाँ एमालेको समर्थनमा माओवादीका चक्रपाणि खनालले कांग्रेसका दीपकुमार उपाध्यायलाई हराएका थिए । अहिले कांग्रेसको समर्थनमा खडा भएका खनाललाई एमालेका बलराम अधिकारीले १५ हजारभन्दा बढी मतान्तरले हराएका छन् ।

माओवादीले ०७४ मा १ हजारभन्दा बढी तर ५ हजारभन्दा कम मतान्तरले जितेका ११ क्षेत्र थिए । तीमध्ये अहिले एमालेले ३ (सोलुखुम्बु, महोत्तरी–१ र बाँके–१), कांग्रेसले २ (झापा–१ र गोरखा–१), जसपाले १ (सिरहा–२), नागरिक उन्मुक्ति पार्टीले १ (कैलाली–३) र राष्ट्रिय स्वतन्त्र पार्टीले १ (ललितपुर–३) क्षेत्र जितेका छन् । मोरङ–५ मा स्वतन्त्र उम्मेदवार विजयी भएका छन् भने माओवादीले केवल दुई क्षेत्र (काभ्रे–१ र कालीकोट) जोगाउन सकेको छ ।

माओवादीले ०७४ मा जितेकामध्ये अहिले २३ वटा क्षेत्र गुमाएको छ । तीमध्ये एमालेले ९, कांग्रेसले ४, राप्रपाले २, स्वतन्त्रले ३, जसपाले २ र राष्ट्रिय स्वतन्त्र, एकीकृत समाजवादी र नागरिक उन्मुक्ति पार्टीले एक/एक वटा फुत्काएका छन् ।

मधेसकेन्द्रित दल कमजोर

०७४ मा प्रत्यक्षतर्फ १० सिट जितेको तत्कालीन संघीय समाजवादी फोरम विभिन्न पार्टीसँगको एकीकरण र फुटबाट गुज्रँदै अहिले जनता समाजवादी पार्टी (जसपा) बनेको छ । जसपाले अहिले सात क्षेत्र जितेको छ । सातमध्ये तीनवटा जसपाले ०७४ मै जितेका क्षेत्र हुन् । तत्कालीन संघीय समाजवादी फोरमले जितेका १० मध्ये ३ (सप्तरी–१, बारा–२ र पर्सा–१) क्षेत्र मात्रै अहिले जसपाले जितेको छ । बाँकी तीनवटा कांग्रेसले, दुईवटा एमालेले र एक/एक वटा राप्रपा र जनमत पार्टीले जितेका छन् ।

जसपाले यस पटक जितेका सातमध्ये चारवटा नयाँ क्षेत्र हुन् । माओवादीबाट दुई (सिरहा–२ र धनुषा–१), तत्कालीन राजपाबाट एउटा (सिरहा–४) र एमालेबाट एउटा (सुनसरी–१) फुत्काएको छ । जनमत पार्टीका सभापति सीके राउतले जसपा अध्यक्ष उपेन्द्र यादवलाई नै सप्तरी–२ बाट भारी मतान्तरले पराजित गरेका छन् ।

प्रतिनिधिसभातर्फ जनमत पार्टी प्रत्यक्षमा यही एउटा क्षेत्रमा सीमित हुन पुगेको छ । सोमबार रातिसम्म सकिएको गणनामा जनमत पार्टी समानुपातिकतर्फ तीन प्रतिशतको थ्रेसहोल्ड नजिकै छ । उसले उक्त थ्रेसहोल्ड पार गरेमा राष्ट्रिय पार्टी त हुने नै छ, समानुपातिकबाट पनि कम्तीमा तीन जना सांसद पठाउनेछ । मधेस प्रदेशसभाका ६४ वटा प्रत्यक्ष सिटमध्ये जनमत पार्टीले ६ वटा जितेको छ । मधेस प्रदेशसभामा सोमबार रातिसम्म करिब १८ लाख मतगणना सकिँदा साढे दुई लाख मत (१४ प्रतिशत) ल्याएर कांग्रेस र एमालेपछि तेस्रो ठूलो दल बनेको छ । प्रदेशसभामा ६ जना प्रत्यक्ष र समानुपातिकबाट पनि करिब त्यति नै संख्यामा सांसद पठाउन सक्ने हैसियत बनाइरहेको जनमत पार्टी प्रदेश सरकार निर्माणमा निर्णायक बन्ने अवस्थामा देखिन्छ ।

गत निर्वाचनमा प्रत्यक्षतर्फ ११ सिटसहित प्रतिनिधिसभा प्रवेश गरेको राष्ट्रिय जनता पार्टी पनि विभिन्न एकीकरण र फुटबाट गुज्रँदै अहिले लोकतान्त्रिक समाजवादी पार्टी (लोसपा) बनेको छ । सत्तारूढ गठबन्धनसँग मिसिएर पनि लोसपाले केवल चार सिट (महोत्तरी–२, महोत्तरी–३, सर्लाही–१ र रूपन्देही–४) जितेको छ । यी चारमध्ये तीनवटा तत्कालीन राजपा (हालको लोसपा) ले नै जितेका क्षेत्र हुन् भने रूपन्देही–४ मात्र लोसपाले कांग्रेसबाट खोसेको हो । राजपाले ०७४ मा जितेका ११ सिटमध्ये यस पटक कांग्रेसले दुई (सप्तरी–३ र पर्सा–४) र एकीकृत समाजवादीले पनि दुई (रौतहट–१ र बारा–४) फुत्काएका छन् ।

बाँकी चार सिट जसपा, एमाले, माओवादी र नागरिक उन्मुक्ति पार्टीले एक–एकवटा बाँडेका छन् । जसमा लोसपाबाट जसपाले सिरहा–४, एमालेले धनुषा–३, माओवादीले सर्लाही–२ र नागरिक उन्मुक्तिले कैलाली–१ जितेका छन् । सर्लाही–२ मा तत्कालीन राजपाबाट जितेका महिन्द्र राय यादव अहिले माओवादी केन्द्रबाट लडेको र कैलाली–१ मा तत्कालीन राजपाबाट जितेका रेशम चौधरीकी श्रीमती रञ्जिता श्रेष्ठले नागरिक उन्मुक्ति पार्टीबाट जितेकी छन् ।

नागरिक उन्मुक्ति पश्चिम तराईको नयाँ शक्ति

पश्चिम तराईमा उदाएको नागरिक उन्मुक्ति पार्टीले तीनवटा सिट जितेको छ । तीमध्ये कैलाली–१ उक्त पार्टीका संरक्षक (हाल डिल्लीबजार कारागारमा रहेका) रेशम चौधरीले तत्कालीन राजपाबाट जितेको क्षेत्र हो । बाँकीमध्ये एउटा एमालेबाट (कैलाली–२) र एउटा माओवादीबाट (कैलाली–३) उन्मुक्ति पार्टीले फुत्काएको हो ।

कैलाली–३ मा सुरुमा निर्वाचित भएका माओवादीका गौरीशंकर चौधरी पछि एमाले प्रवेश गरेका थिए, उनी अहिले पनि प्रतिस्पर्धी थिए । त्यस्तै बर्दिया–२ पनि घुमाउरो बाटोबाट उन्मुक्ति पार्टीको पोल्टामा पुगेको छ । यसअघि माओवादीले जितेको उक्त क्षेत्रमा अहिले रेशम चौधरीले उम्मेदवारी दिएका थिए । तर, जन्मकैद भुक्तान गर्दै गरेका उनको उम्मेदवारी बदर भएपछि रेशमका बाबु लालवीर चौधरीले स्वतन्त्र उम्मेदवारका रूपमा त्यहाँ जिते निकालेका छन् । उनी नागरिक उन्मुक्ति पार्टीका केन्द्रीय सल्लाहकार छन्, प्राविधिक रूपमा उनी स्वतन्त्र उम्मेदवार बनेका भए पनि उनीसमेत उन्मुक्ति पार्टीको संसदीय दलमा सामेल हुनेछन् ।

चुनावको सरप्राइज– राष्ट्रिय स्वतन्त्र पार्टी

०७९ को निर्वाचनबाट सबैभन्दा लाभ पाएको राष्ट्रिय स्वतन्त्र पार्टीले हो । यसले प्रत्यक्षतर्फबाट प्रतिनिधिसभामा सात जना सांसद पठाउँदै छ भने समानुपातिकबाट त्यसको दोब्बर पठाउन सक्ने सम्भावना देखिन्छ । यो पार्टीबाट जितेका सातमध्ये अघिल्लो पटक एमालेले जितेका ५ (काठमाडौं–२, काठमाडौं–७, काठमाडौं–८, चितवन–१ र चितवन–२), माओवादीले जितेको १ (ललितपुर–३) र कांग्रेसले जितेको १ (काठमाडौं–६) क्षेत्र छन् ।

राप्रपा

अघिल्लो चुनावमा एक क्षेत्र (झापा–३) मात्र जितेको पूर्वपञ्चहरूको पार्टी राप्रपा यस पटक जुम्लासमेत गरी सात क्षेत्रमा विस्तार भएको छ । प्रतिनिधिसभाको अघिल्लो कार्यकालमा राप्रपाका एक्ला सांसद राजेन्द्र लिङ्देन पार्टी नेतृत्वमा पुगेपछि राप्रपालाई अभूतपूर्व रूपमा विस्तार गरेका छन् । राप्रपाले माओवादीका २ (चितवन–३ र जुम्ला), एमालेका २ (मकवानपुर–१ र रूपन्देही–३), कांग्रेसको १ (नवलपरासी सुस्ता पश्चिम–२) र तत्कालीन फोरमको १ (बाँके–२) क्षेत्रमा यस पटक प्रभुत्व जमाएको छ ।

एकीकृत समाजवादी पार्टी

एमालेबाट फुटेर बनेको एकीकृत समाजवादीले प्रत्यक्षतर्फ १० क्षेत्र जिते पनि समानुपातिकतर्फ उसले तीन प्रतिशतको ‘थ्रेसहोल्ड’ पार गर्ने सम्भावना सोमबार रातिसम्मको परिणामले देखाएको छैन । थ्रेसहोल्ड पार नभएमा राष्ट्रिय मान्यता प्राप्त पार्टी बन्न सक्दैन । एकीकृत समाजवादीले जितेका १० मध्ये ७ क्षेत्र अघिल्लो पटक एमालेले जितेका (धादिङ–१, दाङ–१, डोल्पा, दैलेख–१, अछाम–१, डोटी र बझाङ) हुन् । त्यस्तै माओवादीबाट १ (सल्यान) र तत्कालीन राजपाबाट दुईवटा (बारा–४ र रौतहट–१) खोस्न सफल भएको हो ।

२० स्थानमा उम्मेदवारी दिएकामा आफ्नो सांगठनिक आधार कमजोर हुँदाहुँदै पनि १० स्थान (५० प्रतिशत) मा एकीकृत समाजवादीले जित निकाल्यो । त्यसमध्ये कर्णाली र सुदूरपश्चिम प्रदेश दुवैमा उसले शतप्रतिशत (तीन/तीन सिट) नतिजा निकालेको छ ।

राष्ट्रिय जनमोर्चा (पहिले प्यूठान जितेकामा यस पटक बागलुङ–१ जितेको) र नेमकिपा (भक्तपुर–१) ०७४ र यसपालि दुवै पटक एक/एक सिटमा कायम छन् । सोमबार रातिसम्म सुनसरी–३, सुनसरी–४, उदयपुर–१ र धनुषा–४ मा मतगणना जारी छ भने दोलखा, स्याङ्जा–२ र बाजुरामा विवादका कारण मतगणना सुरु हुन सकेको छैन ।

प्रकाशित : मंसिर १३, २०७९ ०६:३०
प्रतिक्रिया
पठाउनुहोस्

जुनियर अन्तर्राष्ट्रिय टेनिस सुरु

कान्तिपुर संवाददाता

पोखरा — पोखरामा सोमबारदेखि अन्तर्राष्ट्रिय जुनियर टेनिस प्रतियोगिता सुरु भएको छ । पहिलो खेलमा भारतका वंंश नन्दालले नेपालका सक्षमविक्रम शाहलाई ६–१, ६–२ को सोझो सेटमा पराजित गरे । अर्को खेलमा नेपालका राजवीर प्रधानले भारतका विभु चलाङगुन्डलालाई ७–५, ६–१ को सेटमा हराए ।

नेपाल आईटीएफ जुनियर्स (यू–१८) वल्र्ड र्‍याङकिङ टेनिस च्याम्पियनसिप ग्रेड–५ सर्किट वान र टू प्रतियोगितामा भारतका सिद्धान्त शर्माले कोरियाका जिवान पार्कलाई हराए ।

रुसका फेडोर सोसेड्किनले भारतका देवर्षि सेन, नेपालका आर्यन गिरीले भारतका धनुष बर्मा, भारतका श्रीनिधि बालाजीले अमेरिकाका समिक्षा अनिमलाई, नेपालका रायन शाहले भारतका दिभिजा मनेनी, श्रीलंकाका भिष्मी ओनेथ्रा सेरासिंगेले भारतका ऋदेशी पाइलाई हराए ।

नेपाल टेनिस संघको सहयोगमा जिल्ला टेनिस संघले आयोजना गरेको प्रतियोगिताको उद्घाटनमा प्रदेश खेलकुद परिषद्का सदस्य–सचिव घनश्याम पौडेलले गरे ।

उनले पोखरामा टेनिस खेलले छोटो समयमै ठूलो उपलब्धि हासिल गरेको बताए । कास्की जिल्ला खेलकुद विकास समितिका अध्यक्ष तोरण बानियाँले पोखराले टेनिसमा खेल आयोजनासँगै उत्कृष्ट खेलाडी समेत उत्पादन गरेको भन्दै खुसी व्यक्त गरे । नेपाल टेनिस संघका उपाध्यक्ष विनोद कायस्थले पोखरामा टेनिस विकासका लागि धेरै वर्ष पहिला आफूले देखेको सपना साकार हुँदै आएको उल्लेख गरे ।

आयोजक संघ कास्कीका अध्यक्ष लोकबहादुर गुरुङले प्रतियोगिता अन्तर्गत सर्किट १ खेल्न विभिन्न ९ राष्ट्रका ९८ खेलाडी पोखरा आएको जानकारी दिए । दुई साता चल्ने प्रतियोगितामा १३ देखि १८ वर्षसम्मका महिला तथा पुरुषका एकल र डबल्स इभेन्टमा प्रतिस्पर्धा हुनेछ ।

प्रकाशित : मंसिर १२, २०७९ २२:२६
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×