अनुमति नलिई चार्टर उडान राख्ने कुवेत एयरवेजलाई कारबाही गर्न प्राधिकरणले पठायो पत्र

प्राधिकरणका सहायक प्रवक्ता ज्ञानेन्द्र भुलका अनुसार, केही दिनअघि कुवेत एयरवेजले त्यहाँको श्रम बजारमा जाने नेपालीहरुलाई चार्टर उडानबाट टिकट बिक्री गर्दै त्रिभुवन अन्तर्राष्ट्रिय विमानस्थलमा पठाएको जानकारी पाएपछि कारबाही गर्न कुवेतको डीजीसीएलाई पत्र पठाइएको हो । प्राधिकरणका अनुसार, यस एयरलायन्सले प्राधिकरणबाट अनुमति नलिई टिकट बिक्री गर्ने र यात्रु अलपत्र पारेको थियो ।

त्रिभुवन अन्तर्राष्ट्रिय विमानस्थलका महाप्रबन्धक प्रेमनाथ ठाकुरका अनुसार, बिहीबारअघिसम्म उडान नै नभएको कुवेत एयरवेजको टिकट लिएका यात्रुहरु विमानस्थलमा आउने तर त्यहाँ उडान अनुमति नै नभएको देखिएपछि कुवेत एयरलायन्ससँग सम्बन्धित एजेन्ट कम्पनी र अन्य कर्मचारीलाई सचेत गराइएको थियो ।

यसअघि प्राधिकरणले अनुमति नै नलिई यात्रुलाई बोर्डिङपास दिने नेपाल वायुसेवा निगमका कात्तिक १३ र १४ गतेका दुइटा दिल्ली उडान रद्द गरेको थियो ।

यसैबीच प्राधिकरणले बिहीबार साँझ एक विज्ञप्ति जारी गर्दै वायुसेवा र तीनका एजेन्ट कम्पनीलाई उडान अनुमति नलिई टिकट बिक्री गर्न चेतावनी दिएको छ । प्रवक्ता जगन्नाथ निरौलाद्वारा जारी विज्ञप्तिमा, ‘अनुमति नलिई यात्रुलाई अलपत्र पार्ने विमानस्थलमा अनावश्यक भीडभाड गराई त्यहाँको सुरक्षा व्यवस्थामा खलल पार्ने कार्य नगर्न’ चेतावनी दिइएको छ ।

यसैबीच कुवेत एयरवेजको नेपाली एजेन्ट कम्पनी ट्रान्सपोर्ट सोलुसनका इन्चार्ज रुपेश झाले अनुमती नलिई टिकट बिक्री गरिएकोमा वायुसेवाले गल्ती स्वीकारेको बताए । ‘पर्मिसन नलिई ६ सयजति टिकट बिक्री भएको थियो । यसमा गल्ती भयो । कति यात्रुको डेट चेन्ज गरिदियौं । कतिलाई टिकट रिफन्ड गर्‍यौं,’ उनले भने, ‘केही यात्रुलाई शुक्रबार बिहानदेखि सुरु भएको नियमित उडानमा पठायौं । केही होटलमा छन् ।’

उनका अनुसार, जीएसए कम्पनी ट्रान्सपोर्ट सोलुसन दिपक मलहोत्रा र सुशील थापाको कम्पनी हो ।