कान्तिपुर वेबसाईट
AdvertisementAdvertisement
२४.१२°C काठमाडौं
काठमाडौंमा वायुको गुणस्तर: १३४

गृहमन्त्री खाँणलाई राष्ट्रिय एकता अभियानको समर्थन     

माधव ढुंगाना

भैरहवा — बामदेव गौतम अध्यक्ष रहेको नेकपा राष्ट्रिय एकता अभियानले रुपन्देही-३ मा पाँच दलीय गठबन्धनको तर्फबाट प्रतिनिधिसभा सदस्यका उम्मेदवार नेपाली कांग्रेसका बालकृष्ण खाँणलाई समर्थन गर्ने घोषणा गरेको छ ।

गृहमन्त्री खाँणलाई राष्ट्रिय एकता अभियानको समर्थन     

नेकपा राष्ट्रिय एकता अभियान रुपन्देही जिल्ला कमिटिद्वारा शनिबार अपराह्न भैरहवामा पत्रकार सम्मेलन गर्दै आगामी मंसिर ४ गते हुने निर्वाचनमा गृहमन्त्री रहेका खाँणलाई समर्थन गर्ने घोषणा गरेको हो । केन्द्रीय उपाध्यक्ष तथा लुम्बिनी प्रदेश इन्चार्ज महेन्द्र अर्यालले विभिन्न कारणले आउँदो निर्वाचनमा अभियानले आफ्नो उम्मेदवार नउठाए पनि निर्वाचनमा पार्टीले सक्रियरुपमा भाग लिँदै रुपन्देही-३ मा बालकृष्ण खाँणलाई समर्थन गर्ने पार्टीको निर्णय भएको बताए ।

‘पाँच दलीय गठबन्धनको कतिपय सिद्धान्त र विचारप्रति हामी पूर्णरुपमा सहमत नभए पनि मुलुकमा जब-जब संवैधानिक संकट आउँछ, त्यतिबेला नेपाली कांग्रेसकै अगुवाइमा लोकतान्त्रिक शक्तिहरुबीच सहकार्य गरी संकटबाट मुलुकलाई निकास दिने काम हुने गरेको इतिहास छ,’ अर्यालले भने, ‘मुलुकको विकास निर्माणमा महत्वपूर्ण भूमिका निभाउने र योजना भएका उम्मेदवारहरुको छनोट गरी समर्थन गर्ने निर्णय गरेका हौं ।’

गठबन्धनको तर्फका उम्मेदवार खाँण मुलुकको सुशासन र आर्थिक विकासका लागि क्रियाशील रहँदै महत्वपूर्ण भूमिका निभाएको र योजना भएको व्यक्तित्व भएकाले पार्टीले समर्थन गरेको अर्यालले बताए ।

यसैगरी रुपन्देही-२ मा नेकपा एमालेका बिष्णु पौडेललाई पार्टीले समर्थन गरेको बताए । ‘नेकपा एमालेका उम्मेदवारमध्ये मुलुकभरि बर्दिया-१ र रुपन्देही-२ मा मात्रै समर्थन पार्टीले समर्थन गरेको छ,’ अर्यालले भने, ‘अन्य निर्वाचन क्षेत्रमा होइन ।’

अभियानको प्रतिज्ञापत्र बुझ्दै गृहमन्त्री खाँणले मुलुकमा गरिबीको अन्त्य, स्वरोजगारी सिर्जना, प्राकृतिक स्रोतसाधनको समुचित उत्खनन् सहितको उपयोग, कृषि उत्पादनमा बृद्धि, पर्यटन विकास र उद्योग व्यवसाय फस्टाउने वातावरण बनाउन पाँच दलबीच गठबन्धन गरिएको बताए ।

‘विश्वव्यापीरुपमा परेको कोभिड संक्रमणको असर र पूर्ववर्ती एमाले सरकारको ल्याएको अदूरदर्शी नीतिका कारण हाल मुलुकमा उद्योग व्यापारको अवस्था समस्यामा परे पनि ती उद्योग व्यवसाय टिकाउन सरकार गम्भीर छ,’ खाँणले भने, ‘नेपाल राष्ट्र बैंकको मौद्रिक नीतिले पनि आर्थिक क्षेत्रमा असर पारेको छ ।’ यसका लागि वित्तीय नीति संशोधन गर्नुपर्ने उनले जनाए ।

बैंकले बढाएको ब्याजदरप्रति पनि सरकार गम्भीर रहेको र यसमा बैंकहरुले पुनर्विचार गर्नुपर्ने उनले बताए । ‘निर्वाचनलगत्तै आर्थिक नीतिलाई संशोधन गरिने छ र उद्योग व्यापार फस्टाउने वातावरण तयार गरिने छ,’ उनले भने ।

प्रकाशित : कार्तिक २६, २०७९ १९:०६
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?