रातारात दल बदल्दै मनोनयन- समाचार - कान्तिपुर समाचार
कान्तिपुर वेबसाईट
AdvertisementAdvertisement

रातारात दल बदल्दै मनोनयन

प्रतिनिधिसभामा श्रीमान्–श्रीमती, प्रदेशसभामा दाजुभाइ उम्मेदवार
मधेस ब्युरो

जनकपुर — जनता समाजवादी पार्टी (जसपा) का मधेस प्रदेश उपाध्यक्ष शेषनारायण यादवले आइतबार दिउँसो कांग्रेसमा प्रवेश गरेर प्रदेशसभा सदस्यमा उम्मेदवारी दर्ता गराएका छन् । धनुषा–४(क) मा जसपाबाट टिकट नपाएपछि रुष्ट बनेका उनलाई कांग्रेसका सहमहामन्त्री महेन्द्र यादवले पार्टी प्रवेश गराएर प्रदेशसभाको टिकट थमाइदिएका हुन् ।प्रदेश सांसद रहिसकेका पर्साका प्रह्लाद गिरी लोकतान्त्रिक समाजवादी पार्टी परित्याग गरेर एक महिनाअघि एमालेमा प्रवेश गरेका थिए ।

आइतबार उनले एकीकृत समाजवादीबाट पर्सा–३(ख) मा प्रदेशसभा सदस्यका लागि उम्मेदवारी दिएका छन् । जसपा छाडेर आइतबार बिहान एमाले प्रवेश गरेका लक्ष्मी महतोले महोत्तरी–१ बाट प्रतिनिधिसभा सदस्यमा उम्मेदवारी दिएका छन् । मधेस आन्दोलनका क्रममा सशस्त्र प्रहरीका असई थमन विक हत्या प्रकरणका अभियुक्त महतोले वारेस मिथिलेशप्रसाद यादवमार्फत मनोनयन दर्ता गराएका हुन् ।

एमाले मधेस प्रदेशका निवर्तमान सचेतक किशोरी साह आइतबार नै जनमत पार्टी प्रवेश गर्दै उम्मेदवार बनेका छन् । साहले जनमत पार्टीबाट प्रदेशसभाका लागि धनुषा–१(क) बाट मनोनयन दर्ता गराएका हुन् । एमाले–जसपा तालमेलमा धनुषा–१(क) जसपाको भागमा परेपछि उनले पार्टी फेरेका हुन् । लोकतान्त्रिक समाजवादी पार्टीले टिकट नदिएपछि सुरिता साहले महोत्तरी–२(ख) बाट स्वतन्त्र उम्मेदवारी दिएकी छन् ।

जसपासित गठबन्धन गरेकामा रुष्ट बनेको एमाले नेता प्रभु साहले पार्टीले दिएको टिकट पन्छाएर स्वतन्त्र उम्मेदवारी दिएका छन् । उनले रौतहट–३ बाट प्रतिनिधिसभाका लागि उम्मेदवारी दिएका हुन् । साहले जनताको चाहनाअनुसार आफूले स्वतन्त्रमा उम्मेदवारी दिएको बताए । उनकै समूहका कुन्दन कुशवाहाले पनि प्रदेशसभा सदस्यमा स्वतन्त्र उम्मेदवारी दिएका छन् । रौतहट–१ मा पूर्वप्रदेश सांसद बाबुलाल साह र रौतहट–४(क) मा पूर्वप्रदेश सांसद धनलाल ठोकरले पनि स्वतन्त्र उम्मेदवारी दर्ता गराएका छन् ।

लोसपा नेता एकवाल मियाँले एमालेमा प्रवेश गरेर प्रतिनिधिसभा सदस्यका लागि बारा–४ मा उम्मेदवारी दिएका छन् । उक्त क्षेत्रमा एमाले–जसपा गठबन्धन छ । कांग्रेस नेता लालबाबु सिंह लोसपाबाट प्रतिनिधिसभाका लागि बारा–३ मा उम्मेदवार बनेका छन् । उनी रातारात कांग्रेस परित्याग गरी लोसपा प्रवेश गरेका हुन् । जसपाका कलैया नगर अध्यक्ष शिवनाथ पटेलले हाम्रो नेपाली पार्टीमा प्रवेश गरी बारा–३(क) बाट प्रदेशसभाका लागि उम्मेदवारी दिएका हुन् । बारा–१(ख) मा मधेस प्रदेशका निवर्तमान सभामुख सरोज यादवले लोसपा परित्याग गरी जसपाबाट उम्मेदवारी दर्ता गराएका छन् ।

गठबन्धनका कारण टिकटबाट वञ्चित भएपछि स्वतन्त्र उम्मेदवारी दिने नेता थुप्रै छन् । जसपाकी पूर्वप्रदेश सांसद करिमा बेगमले पर्सा–२(क) बाट स्वतन्त्र उम्मेदवारी दिएकी छन् । जसपाकै पूर्वप्रदेश सांसद जन्नत अन्सारी पर्सा–१(क) बाट स्वतन्त्र उम्मेदवार बनेका छन् । जसपाकै नेता मुकेश द्विवेदी पर्सा–२(ख) मा स्वतन्त्र रूपमा उठेका छन् । यस्तै, पर्सा कांग्रेसका नेता अजयकुमार द्विवेदीले क्षेत्र नं. १ मा स्वतन्त्र उम्मेदवारी दिएका छन् । द्विवेदीले दाबी गरेको पर्सा–१ मा सत्ता गठबन्धनबाट लोसपाका लक्ष्मणलाल कर्ण उम्मेदवार बनेका छन् । लोसपा नेता शशिकपुर मियाँ पर्सा–१(ख) बाट स्वतन्त्र उम्मेदवार बनेका छन् । कांग्रेसका युवा नेता सुधीर पटेलले पनि पर्सा–१(क) बाट प्रदेशसभाका लागि स्वतन्त्र उम्मेदवारी दर्ता गराएका छन् ।

एमालेका सचिव रघुवीर महासेठले धनुषा–४ र उनकी श्रीमती जुली महतोले धनुषा–३ बाट प्रतिनिधिसभा सदस्यमा मनोनयन दर्ता गराएका छन् । महासेठ ०७४ को निर्वाचनमा धनुषा–४ बाट निर्वाचित भएका थिए भने महतो एमालेबाट समानुपातिक सांसद थिइन् । महासेठले मनोनयन गरेको क्षेत्रमा सत्ता गठबन्धनबाट कांग्रेसका सहमहामन्त्री महेन्द्र यादवले उम्मेदवारी दिएका छन् । महतोको मुख्य प्रतिस्पर्धा सत्ता गठबन्धनबाट उम्मेदवारी दिएका लोसपाका नेता अनिल झासँग हुने भएको छ ।

झा ०७४ को निर्वाचनमा रौतहट–१ बाट विजयी भएका थिए । त्यहाँ एकीकृत समाजवादीका अध्यक्ष माधवकुमार नेपाल उठेका कारण उनी धनुषा आएका हुन् । धनुषा–३ मा यसअघिको निर्वाचनमा लोसपाकै राजेन्द्र महतो विजयी भएका थिए । २०४३ को राष्ट्रिय पञ्चायत चुनावमा धनुषाबाट हेमबहादुर मल्ल र उनकी पत्नी शारदा मल्ल विजयी भएका थिए । ‘शेरे धनुषा’ ले कहलिएका हेमबहादुरको पञ्चायतकालमा धनुषाको राजनीतिमा दबदबा थियो ।

जसपाबाट धनुषामा प्रदेशसभा सदस्यका लागि दाजुभाइले मनोनयन दर्ता गराएका छन् । जसपाका जितेन्द्र यादव धनुषा–३(क) बाट र उनका दाजु शैलेन्द्र धनुषा–२(क) बाट उम्मेदवार बनेका छन् । शैलेन्द्र जसपाका पूर्वप्रदेश सांसद हुन् भने जितेन्द्र मुख्यमन्त्री लालबाबु राउतका प्रमुख स्वकीय सचिव हुन् ।

दल बदले, टिकट पाएनन्

यसअघिको निर्वाचनमा तत्कालीन संघीय समाजवादी फोरम नेपालबाट पर्साको प्रदेश निर्वाचन क्षेत्र नं. ३ (ख) मा निर्वाचित प्रह्लाद गिरी हालै एमाले प्रवेश गरेका थिए । एमाले अध्यक्ष केपी शर्मा ओलीसँग टीका लगाएर पार्टी परिवर्तन गरेका उनले आगामी मंसिर ४ को निर्वाचनमा टिकट पाउने आश्वासन पाएका थिए । तर, जनता समाजवादी पार्टी (जसपा) सँग तालमेल भएपछि एमालेले उक्त क्षेत्र जसपाका लागि छाडेको छ । अन्तिम समयमा एमालेबाट टिकट नपाएपछि गिरीले नेकपा एकीकृत समाजवादीबाट उम्मेदवारी दर्ता गराएका छन् ।

जसपाका केन्द्रीय सदस्य वीरेन्द्र यादव दुई महिना अगाडि मात्र पार्टी परित्याग गरी माओवादी केन्द्र प्रवेश गरे । उनले पनि प्रदेशसभा निर्वाचनमा टिकट पाउने आश्वासन पाएका थिए । तर, सत्तारूढ गठबन्धनको भागबन्डामा उक्त क्षेत्र कांग्रेसको भागमा परेको छ । यादवले प्रदेशसभाका लागि स्वतन्त्र उम्मेदवारी दर्ता गराएका छन् । जसपाकी मधेस प्रदेश सांसद अञ्जु यादव असोज पहिलो साता जनकपुरमा आयोजित एक कार्यक्रममा एमाले प्रवेश गरिन् । पार्टी अध्यक्ष केपी शर्मा ओलीले यादवलगायत नेतालाई टीका लगाएर पार्टीमा स्वागत गरेका थिए । यादवका श्रीमान् डा. अनुज यादवले पर्साको निर्वाचन क्षेत्र नं. २ (ख) बाट टिकट पाउने आशा राखेर सांसद यादवले पार्टी प्रवेश गरेकी थिइन् । उक्त निर्वाचन क्षेत्रमा एमालेले हरिराम कुर्मीलाई टिकट दिएको छ ।

– अवधेश झा (सप्तरी), सन्तोष सिंह (धनुषा), श्यामसुन्दर शशि (जनकपुर), सुनिता बराल (महोत्तरी), ओमप्रकाश ठाकुर (सर्लाही), शिव पुरी (रौतहट), लक्ष्मी साह (बारा), भूषण यादव (वीरगन्ज) र शंकर आचार्य (पर्सा)


प्रकाशित : आश्विन २४, २०७९ ०७:५१
प्रतिक्रिया
पठाउनुहोस्

संवेदनशील मतदानस्थलमा विशेष निगरानी

उत्तरी चुरे क्षेत्रदेखि भारतीय सीमासम्म जोडिएको मतदान केन्द्रमा सुरक्षा बलियो बनाइँदै
मधेस ब्युरो

जनकपुर — मधेस प्रदेशका अति संवेदनशील र संवेदनशील मतदान केन्द्रमा सुरक्षाकर्मीको विशेष निगरानी बढाइएको छ । भारतीय सीमासँग जोडिएका केही मतदानस्थल अति संवेदनशील रहेको भन्दै त्यहाँ विशेष तालिमप्राप्त सुरक्षाकर्मीलाई खटाइएको हो । 

सिरहामा ४ सय ९८ मतदान केन्द्र तोकिएको छ । जिल्लाका ८ नगरपालिका र ९ गाउँपालिका गरी १७ स्थानीय तहका मतदान केन्द्रमा कर्मचारी खटिसकेका छन् । जिल्ला निर्वाचन कार्यालय प्रमुख इन्दिरा यादवका अनुसार उत्तरी चुरे क्षेत्रदेखि भारतीय सीमासम्म जोडिएको मतदान केन्द्रमा कर्मचारी, सुरक्षाकर्मी चार दिनअगावै पठाइएको हो । जिल्ला सुरक्षा समितिले सबै मतदान केन्द्रलाई अति संवेदनशील सूचीमा राखेको छ । सिरहाका प्रहरी प्रमुख एसपी अर्जुन तिमिल्सिनाले त्यहीअनुरूप सुरक्षाकर्मी परिचालन गरिएको जानकारी दिए ।

अघिल्लो पटक दलहरूबीच झडप तथा निर्वाचन प्रभावित गर्न गरिएको आपराधिक क्रियाकलापका आधारमा सर्लाहीको २० स्थानीय तहको मतदानस्थललाई तीन तहमा वर्गीकरण गरिएको छ । मतदानका लागि जिल्ला सुरक्षा समितिले भौगोलिक विकटता, यातायातको असुविधा भएका मतदानस्थललाई पनि संवेदनशीलको सूचीमा राखेको छ । जिल्लाका २० वटा पालिकामा कुल ३ सय १८ मतदानस्थल तोकिएको छ, जसमा ५ सय ९९ मतदान केन्द्र राखिएको छ । तीमध्ये १ सय ३ मतदानस्थललाई अति संवेदनशीलको सूचीमा राखिएको छ, जसमा २ सय ५ मतदान केन्द्र छन् । अति संवेदनशील मतदानस्थलहरू अधिकांश निर्वाचन क्षेत्र नम्वर ३ र ४ का छन् । जिल्लामा १ सय ८४ मतदानस्थल संवेदनशीलको सूचीमा राखिएको छ, जहाँ ३ सय ३९ मतदान केन्द्र छन् । सुरक्षा समितिले जिल्लाको ३१ मतदानस्थल मात्र सामान्यको सूचीमा राखेको छ ।

मतदानस्थल र मतदान केन्द्रको संवेदनशीलतालाई ध्यानमा राखेर सुरक्षा प्रबन्ध मिलाइएको सुरक्षा समितिका संयोजक प्रमुख जिल्ला अधिकारी थानेश्वर गौतमले बताए । ‘विगतको निर्वाचनमा भएको झडप तथा आपराधिक क्रियाकलापका आधारमा हामीले मतदानस्थलहरूलाई तीन चरणमा विभाजन गरेका छौं, संवेदनशील र अति संवेदनशील मतदानस्थलमा सोहीअनुसारको सुरक्षा व्यवस्था मिलाएका छौं,’ उनले भने, ‘स्वच्छ निर्वाचनका लागि भौगोलिक विकटता र यातायातको असुविधालाई पनि हामीले ख्याल गरेर सुरक्षा प्रबन्ध मिलाएका छौं ।’ यसअघिको निर्वाचनमा सर्लाहीमा ३ सय १८ मतदानस्थलमा ५ सय १८ मतदान केन्द्र तोकिएको थियो । यसपटक ५ सय ९९ मतदान केन्द्र तोकिएको जिल्ला निर्वाचन कार्यालयले जनाएको छ । मतदाताको संख्या बढेकाले ८१ मतदान केन्द्र थप गरिएको निर्वाचन कार्यालयका प्रमुख दिवाकर भुजेलले बताए ।

रौतहटका २ सय ७६ मतदान स्थलमध्ये ८३ वटा अति संवेदनशीलको सूचीमा छन् । संवेदनशील मतदानस्थल १ सय १९ वटा छन् । विप्लव माओवादीको गतिविधि हुने क्षेत्र र केही विकट मतदान केन्द्रलाई सुरक्षा समिमिले अति संवेदनशीलको सूचीमा राखेको छ । जिल्लाका १८ वटा स्थानीय तहमा ५ सय १८ वटा मतदान केन्द्र छन् । प्रमुख जिल्ला अधिकारी कृष्णबहादुर शाहीले अति र संवेदनशील क्षेत्रको मतदानस्थको सुरक्षा व्यवस्था कडा बनाउने बताए । ‘कुनै किसिमको हर्कत नहोस् भनेर सुरक्षा व्यवस्था कडा बनाउने योजनामा छौं,’ उनले भने, ‘मतदातालाई भयरहित र ढुक्क भएर मतदान गर्ने वातावरण बनाउँछौं ।’ जिल्लामा बाहिरबाट झन्डै ६ सय थप सुरक्षाकर्मर् ीझिकाइएको छ । भारतसँग सीमा जोडिएका विभिन्न पालिका र भूगोलको विकटता, यातायातको असुविधा र चुरेसँग जोडिएको स्थानलाई अति संवेदनशील मतदान स्थलको सूचीमा स्थानीय प्रशासनले राखेको हो । प्रजिअ शाहीले भारतसँग जोडिएका राजदेवी, गौर, इशनाथ, परोहा, बौधीमाई, चुरेसँग जोडिएका चन्द्रपुर नगरपालिकासहित १४ पालिकाका ८३ वटा मतदान स्थल अति संवेदनशीलको सूचीमा राखिएको बताए । बारामा पनि मतदान अधिकृतलाई कार्यस्थलमा खटाउन थालिएको छ । निर्वाचन सामग्री जिम्मा लगाउन जिल्ला निर्वाचन कार्यालयले जिल्लाका १६ वटा स्थानीय तहको निर्वाचन अधिकृतलाई मंगलबार बोलाएको छ । पालिकापिच्छे मतदान अधिकृतहरूलाई मतपत्र, मतपेटिका, स्वस्तिक चिह्नलगायतका सामग्रीको व्यवस्थान व्यवस्थापन भइरहेको निर्वाचन कार्यालयका प्रमुख सरोज चौधरीले बताए । उनका अनुसार जिल्लाका २ उपमहानगर, ५ नगरपालिका र ७ गाउँपालिकामा गरी कुल मतदाता ४ लाख २३ हजार ३ सय ३८ जना छन् । यहाँ ३ सय ३ मतदान स्थल र ५ सय ४१ मतदान केन्द्र छन् ।

सिम्रौनगढ र पचरौता नगरपालिकालाई अति संवेदनशील मानिएको जिल्ला सुरक्षा समिति स्रोतले बतायो । सीमावर्ती जिल्लाका विश्रामपुर, फेटा, कलैया, देवताल, सुवर्ण, पचरौता र सिम्रौनगढ गरी ७ वटा पालिकाहरूलाई संवेदनशील मानिएको छ । सुरक्षा संवेदनशीलताका दृष्टिकोणले सुरक्षाकर्मी परिचालन गरिएको प्रमुख जिल्ला अधिकारी कृष्णबहादुर कटुवालले बताए । जिल्लाको अधिकांश मतदान केन्द्रहरू विद्यालयमा छन् । ‘अति संवेदनशील, संवेदनशील र समान्य संवेदनशील गरी सुरक्षाको व्यवस्था मिलाइएको छ,’ एक सुरक्षा अधिकारीले भने ।

सप्तरीका १२ वटा मतदानस्थल चौरमै राखिएको छ । सार्न खोजिए पनि स्थानीयले अपायक पर्ने भनेपछि बाध्य भएर चौरमै राख्नुपरेको जिल्ला निर्वाचन कार्यालयका प्रमुख रमेशकुमार जोशीले जानकारी दिए । ‘अघिल्ला निर्वाचनमा पनि ती मतदानस्थल चौरमा नै थियो, सार्न खोजिएको हो तर स्थानीयको विरोधपछि सकिएन,’ जोशीले भने । तीबाहेक अन्य मतदानस्थल विद्यालय भवनमै राखिएको उनले बताए । जिल्लामा अधिकांश मतदानस्थल अति संवेदनशील सूचीमा छन् । ४ वटा मतदानस्थल मात्र सामान्य अवस्थाको रहेको सप्तरीका प्रहरी प्रमुख एसपी अभिनारायण काफ्लेले जानकारी दिए । जिल्लामा कुल २ सय ९७ मतदानस्थ्लमा ५ सय ८० मतदान केन्द्र तोकिएको छ । एसपी काफ्लेका अनुसार ८५ वटा संवेदनशील र २ सय ८ वटा मतदानस्थल अति संवेदनशीलको सूचीमा छन् । सोमबारसम्ममा ७७ वटा हतियार जिल्ला प्रहरी कार्यालय र मातहतका प्रहरी इकाइमा बुझाइएको छ । जिल्लाभरि ५ सय बढी इजाजतप्राप्त बन्दुक रहेकोमा थोरै संख्यामा मात्रै हतियार बुझाइएको छ ।

एक महानगरपालिका र तीनवटा नगरपालिकासहित १३ स्थानीय तह रहेको पर्सामा आसन्न निर्वाचनका लागि १ सय ६७ मतदानस्थल र ४ सय ४ वटा मतदान केन्द्र निर्धारण गरिएको छ । जिल्ला निर्वाचन कार्यालयका अनुसार वीरगन्जमा सबैभन्दा बढी मतदान स्थल र मतदान केन्द्र राखिएका छन् । महानगरमा ५५ वटा मतदानस्थल र १ सय ४३ वटा मतदान केन्द्र निर्धारण गरिएको निर्वाचन कार्यालय पर्साकी प्रमुख रञ्जिता झाले बताइन् । यसैगरी सबैभन्दा कम पकाहामैनपुर गाउँपालिकामा मतदानस्थल राखिएका छन् । पकाहामैनपुरमा ६ वटा मतदानस्थल र १५ वटा मतदान केन्द्र छन् ।

जिल्ला निर्वाचन प्रमुख झाले मतदान केन्द्रलाई सुरक्षा संवेदनशीलताका दृष्टिकोणले ३ तहमा वर्गीकरण गरिएको जनाइन् । ‘मतदान केन्द्रमा पर्खाल नभएकालाई अति संवेदनशीलमा राखिएको छ,’ उनले भनिन् । संवेदनशील मतदानस्थलको विवरण प्रशासनसँग रहेको उनले बताइन् । प्रमुख जिल्ला अधिकारी उमेश ढकालले सुरक्षाका दृष्टिकोणका कारण संवेदनशील मतदान केन्द्रको विवरण मिडियामा दिन नमिल्ने बताए । ‘सबै मतदान केन्द्रको हामीले वर्णीकरण गरेका छौं,’ उनले भने, ‘सुरक्षाको दृष्टिकोणले बाहिर भन्न मिल्दैन ।’

- भरत जर्घामगर (सिरहा), अवधेश झा (सप्तरी), ओमप्रकाश ठाकुर (सर्लाही), शिव पुरी (रौतहट), लक्ष्मी साह (बारा) र शंकर आचार्य (पर्सा)

प्रकाशित : वैशाख २८, २०७९ १३:०२
पूरा पढ्नुहोस्
प्रतिक्रिया
पठाउनुहोस्
×