दसैं मनाउन १८ लाखले उपत्यका छाडे- समाचार - कान्तिपुर समाचार
कान्तिपुर वेबसाईट
AdvertisementAdvertisement

दसैं मनाउन १८ लाखले उपत्यका छाडे

विमल खतिवडा

काठमाडौँ — यस वर्षको दसैं मनाउन करिब १८ लाखले उपत्यका छाडेका छन् । कोटेश्वर, नयाँ बसपार्क, कलंकीलगायत नाकाबाट आइतबारसम्ममा १८ लाख नागरिक काठमाडौं उपत्यकाबाट बाहिरिएको यातायात व्यवसायीहरूले जनाएका छन् । 

नेपाल यातायात व्यवसायी राष्ट्रिय महासंघका अध्यक्ष विजय स्वाँरका अनुसार असोज १ गतेदेखि आइतबारसम्म करिब १८ लाख बढी यात्रुले उपत्यका छाडेका छन् । यो निजी, भाडाका गाडी र सार्वजनिक सवारीमा बाहिरिने यात्रुको संख्या हो । सोमबार साँझसम्म १९ लाखले उपत्यका छाड्ने अनुमान रहेको उनले बताए ।

दसैंका लागि घर जाने यात्रुको भीड कोटेश्वर, नयाँ बसपार्क र कलंकीमा सोमबार बिहानसम्म लागेको छ । कोभिडका कारण दुई वर्षसम्म चाडबाड मनाउन घर जान नपाएकाहरू यो वर्ष घटस्थापनाबाटै उपत्यका छाड्न थालेका हुन् ।

नेपाल यातायात व्यवसायी राष्ट्रिय महासंघका अध्यक्ष स्वाँरका अनुसार गत वर्ष करिब १६ लाख यात्रुले उपत्यका छाडेका थिए । ‘कोभिडपछि उपत्यकाबाट बढी यात्रु यही दसैंमा बाहिरिएका हुन्,’ स्वाँरले भने, ‘सोमबारसम्म १९ लाख यात्रुले उपत्यका छाड्ने अनुमान गरिएको छ ।’ यात्रुको चाप बढी हुँदा सवारी व्यवस्थापन गर्न समस्या भएको उनको भनाइ छ ।

सुदूरपश्चिम जाने यात्रुको संख्या धेरै हुँदा त्यो क्षेत्रका लागि सवारी व्यवस्थापनमा समस्या भएको हो । ‘काठमाडौंमा चल्ने सार्वजनिक सवारीसाधनलाई अपुग भएको ठाउँमा पठाइएको छ,’ उनले भने । काठमाडौं उपत्यका ट्राफिक प्रहरी कार्यालयका अनुसार घटस्थापनादेखि शनिबार साँझसम्म ६२ हजार ४४ सार्वजनिक सवारी बाहिरिए भने ४ लाख ६९ हजार ३ सय ७ यात्रुले उपत्यका छाडेका छन् ।

धनगढीकी कल्पना रोकाय दसैंका लागि घर जान भन्दै टिकट लिन गत शुक्रबार सबेरै नयाँ बसपार्क पुगिन् । बिहान ३ बजे लाइन बसेकी उनले ८ बज्दासम्म टिकट पाइनन् । टिकट नपाएपछि काउन्टरका कर्मचारीलाई सोध्दा बस छैनन्, कसरी टिकट दिऊँ भन्दै पन्छिए । तर त्यहीं व्यवसायीले ३५ सय दिए टिकट छ भनिरहेका थिए । जबकि यातायात व्यवस्था विभागले काठमाडौंदेखि धनगढीसम्मको भाडा १९६२ रुपैयाँ तोकेको छ । सुपर एसी र एसी गाडी भन्दै व्यवसायीले बढी भाडा लिने गरेका छन् ।

‘प्रहरीले बढी भाडा लिनेलाई कारबाही गर्नुको साटो उल्टै मयूर यातायातमा ३ हजार रुपैयाँको टिकट काटेर जान दबाब दिइरहे,’ रोकायले भनिन्, ‘उक्त गाडीमा जानेको नाम मात्र टिपिएको थियो, टिकट दिएको देखिएन, बिनाटिकट नै यात्रुलाई जबर्जस्ती गाडी चढ्न दबाब दिइएको थियो ।’ प्रहरी र व्यवसायीले गाडी छैन भन्दै यात्रुलाई डर देखाएर बढी भाडा लिई गाडी चढ्न दबाब दिएको उनको आरोप छ । ‘सोर्स लगाएर आउनेले तुरुन्त टिकट पाउँथे,’ उनले भनिन्, ‘निकै कष्ट सहेर धनगढी रुटमै चल्ने बसको टिकट पाएँ ।’

जिम्मेवार निकाय लाचार बन्दा व्यवसायीले यात्रुसँग मनपरी भाडा असुलिरहेको उनको भनाइ छ । ‘काउन्टरनजिकै यात्रु सहायता कक्ष राखिएको छ, त्यहीं बस्ने प्रहरीले बढी भाडा लिन र गाडी चढ्न दबाब दिन्छन्,’ उनले भनिन्, ‘कारबाही गर्ने निकायको हालत यस्तो छ, यात्रुले कसलाई गएर गुनासो गर्ने ?’ समस्या रोकायको मात्र होइन, पूर्वदेखि पश्चिम जाने सबैजसो यात्रुले तोकिएको भन्दा बढी भाडा तिरेर गन्तव्यमा पुगे । केही यात्रु भने गाडीमा सिट नहुँदा टुल, मुडामा बसेर घर जान बाध्य भए । टिकट नपाएपछि रिजर्भमा जाने यात्रु गाडी व्यवसायीले जति पैसा माग्छन्, त्यति तिर्न बाध्य छन् । टिकट नपाएपछि यात्रु दोब्बर भाडा तिरेर घर जान बाध्य छन् । गुनासो गर्दा कसैले चासो नदिएको यात्रुहरू बताउँछन् । ‘टिकट लिन जाँदा काउन्टरका कर्मचारी प्रहरीका डीआईजी, एआईजी र मन्त्री, नेताको बुकिङ छ, त्योभन्दा अरूको टिकट छैन भन्दै कुरै सुन्दैनन्,’ काठमाडौंबाट इलाम जाने एक यात्रुले भने, ‘निकै प्रयास गरें, इलामसम्मको टिकट नपाएपछि झापा बिर्तामोडसम्मको मात्र टिकट पाएँ ।’ यातायात व्यवस्था विभाग र काठमाडौं उपत्यका ट्राफिक प्रहरी कार्यालयले भने बढी भाडा लिनेलाई कारबाही गरेको दाबी गरिरहेका छन् ।

बढी भाडा लिनेलाई कारबाही गरिएको यातायात व्यवस्था विभागका महानिर्देशक टोकराज पाण्डेले बताए । ‘पहिलाभन्दा अहिले गुनासो कम छ, टाढा जाने यात्रुको हकमा गाडीको समस्या छ,’ उनले भने, ‘त्यसैले काठमाडौं उपत्यकामा चल्ने सार्वजनिक सवारीसाधनलाई समस्या भएको ठाउँमा पठाएर व्यवस्थापन गरेका छौं ।’ कोभिडलगायत कारणले दुई वर्षदेखि घर जान नपाएका यात्रु यो दसैंमा गएका छन् । ‘सुरुमा गाडी नभएर पनि समस्या भएको हो,’ पाण्डेले भने, ‘तोकिएको भन्दा बढी भाडा लिनेलाई जरिवाना गरेर लिएको रकम फिर्ता गराइएको छ ।’ काठमाडौं, साँगासहित १४ स्थानमा यात्रु सहायता कक्ष स्थापना गरेर यात्रुको गुनासो सुन्ने गरिएको उनको भनाइ छ ।

यात्रुसँग बढी भाडा लिने ५४ जनालाई नियन्त्रणमा लिई कारबाही गरेको काठमाडौं उपत्यका ट्राफिक प्रहरी कार्यालयका एसपी अवदेश विष्टले बताए । ‘कोटेश्वरमा बिहान यात्रुको चाप बढी हुन्छ । त्यसैले यो खण्डमा धेरैबेर गाडी रोकेर यात्रु चढाउन र झार्न दिइएको छैन,’ उनले भने, ‘एकछिन अड्किए गाडीको ताँती गौशालासम्म पुग्छ । त्यसैले यस क्षेत्रमा त्यहीअनुसार ट्राफिक व्यवस्थापन गरेका छौं ।’ दसैंका लागि सोमबारसम्म उपत्यकाबाट बाहिरिने यात्रु हुनेछन् । नयाँ बसपार्क, कलंकी, कोटेश्वरमा दसैंका लागि घर जाने यात्रुहरूको भिडमभीड छ । पश्चिम जाने यात्रुको भीड कलंकी र नयाँ बसपार्कमा लाग्ने गरेको छ । नेपाल यातायात व्यवसायी राष्ट्रिय महासंघका अध्यक्ष विजय स्वाँरले काउन्टरमा टिकट काट्नेले यात्रुसँग बढी भाडा नलिएको दाबी गरे ।

प्रकाशित : आश्विन १७, २०७९ ०८:५७
प्रतिक्रिया
पठाउनुहोस्

सूर्यविनायक-धुलिखेल सडक विस्तार गरिँदै

विमल खतिवडा

काठमाडौँ — निर्माणको २५ वर्षपछि सूर्यविनायक–धुलिखेल सडक चार लेनमा विस्तार हुने भएको छ । कुल १५.५ किमि सडकमध्ये पहिलो चरणमा साँगादेखि धुलिखेल खण्डको ठेक्का आह्वान गरिएको हो, जसको दूरी ८.४ किमि छ ।

सूर्यविनायकदेखि साँगासम्मको ७.१ किमि खण्डमध्ये डेढ किमिको डिजाइनमा पुन: विचार गर्नुपर्ने भएकाले ठेक्का आह्वान गर्न ढिलाइ भएको सडक विभागले जनाएको छ । विभागका उपमहानिर्देशक एवं प्रवक्ता भिमार्जुन अधिकारीका अनुसार उक्त खण्डको डिजाइनमा पुन: विचार गरेर ठेक्का गरिने छ । ‘अहिले दुई लेनको सडक छ,’ उनले भने, ‘विस्तार गरेर चार लेनको बनाउन लागिएको हो ।’ उनका अनुसार सर्भिस लेनसहित चार लेनको सडक बन्ने छ ।

‘यसका लागि अर्थ मन्त्रालयबाट ९ अर्ब रुपैयाँको सहमति प्राप्त भइसकेको छ,’ प्रवक्ता अधिकारीले भने, ‘यो रकमले दुवै खण्डको विस्तार गरिने छ ।’ ठेक्का भएको तीन वर्षभित्र विस्तारको काम सक्नुपर्ने छ । पुष पहिलो साताबाट विस्तारको काम अघि बढ्ने उनले बताए । यस सडक खण्डमा सवारी चाप बढी भएकाले विस्तार गर्न लागिएको हो । २०७५ सालमा यो सडकलाई आठ लेनमा विस्तार गर्ने भन्दै प्रारम्भिक अध्ययन गरिएको थियो । जापानी सहयोग नियोग (जाइका) ले खटाएको प्राविधिक टोलीमार्फत अध्ययन भएको उक्त प्रतिवेदनमा सरकारले चासो देखाएन ।

त्यो बेलाको प्रारम्भिक अध्ययन अनुसार सडकको दूरी १६ किमि रहने दुई–दुईवटा सर्भिस लेन हुने उल्लेख थियो । उक्त सडक खण्डमा २ वटा फ्लाइओभर र २ वटा सुरुङ बनाउनुपर्ने उल्लेख थियो । अध्ययन टोलीले दिएको विकल्पमा सुरुङ नबनाउन र भित्तातिर जोडेर सडक निर्माण गर्न सुझाव थियो । ‘सन् २०१८ मा २२ अर्ब रुपैयाँ लागत अनुमान गरिएको थियो,’ विभागमा महानिर्देशक अर्जुनजंग थापाले भने, ‘त्यो लागतमा सडक विस्तार गर्न सकिदैन भनेर फेरि अध्ययन गरेर ठेक्का गरिएको हो ।

सुरुङ निर्माण गर्नुपर्ने भनिएको ठाउँमा सडक नै बनाइने भएको छ । ‘सडक विभाग आफैंले यसको डिजाइन गरेको हो,’ महानिर्देशक थापाले भने, ‘दसैंपछि सूर्यविनायकदेखि साँगा खण्डको ठेक्का हुने छ ।’ सुरुमा जापान सरकारको ऋण सहयोगमामा उक्त सडक बनाउने भन्ने थियो । तर त्यसका लागि प्रयास गर्दा सम्भव नभएपछि नेपाल सरकार आफैंले बनाउन लागेको सडक विभागका प्रवक्ता अधिकारीले बताए ।

बीपी राजमार्ग सञ्चालनमा आएपछि यो खण्डमा सवारी चाप बढेको छ । कोटेश्वर ट्राफिकका प्रमुख प्रहरी निरीक्षक किशोर तामाङका अनुसार कोटेश्वरबाट साविक लामा दुरीका १ हजार बढी सवारी छुट्छन । ‘दसैंमा भने दैनिक २ हजारभन्दा बढी लामा दूरीका सवारी छुट्ने गरेका छन्,’ उनले भने, ‘काभ्रे र भक्तपुरका लागि छुट्ने सवारीको चाप धेरै छ ।’ सडक विस्तार भएपछि सवारी आवत जावतमा सहज हुने उनले बताए ।

प्रकाशित : आश्विन ७, २०७९ १३:०४
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×