अमलटारीमा आन्तरिक पर्यटकको घुइँचो- समाचार - कान्तिपुर समाचार

अमलटारीमा आन्तरिक पर्यटकको घुइँचो

नारायण शर्मा

पूर्वी नवलपरासी — दसैंको अवसरमा पूर्वी नवलपरासीको अमलटारी घुम्न आउने आन्तरिक पर्यटकहरू बढेका छन् । पछिल्लो दुई साताको अवधिमा करिब ३ सयभन्दा बढी आन्तरिक पर्यटकले यहाँको भ्रमण गरेका छन् ।

‘नेपालीहरूको घुम्ने र रमाउने बानी बढेको देखिन्छ‚’ अमलटारीका होटल व्यवसायी जितनारायण थनेत भन्छन्‚ ‘पछिल्लो समय जंगल घुम्ने पर्यटकहरूको संख्या ह्वात्तै बढेको छ । असोजयता यहाँ आउनेहरू सबै नेपाली हुन् ।’

होमस्टे सञ्चालक र आसपासका होटल व्यवसायीले आन्तरिक पर्यटक बढाउन दसैं छुटको अफर दिएका छन् । अफरका कारण समूह-समूह बनेर आउनेहरूको संख्या बढेको छ ।

अमलटारी होमस्टेका अध्यक्ष एवं कावासोती नगरपालिकाका पूर्वउपमेयर प्रेमशंकर मर्दनियाका अनुसार आन्तरिक पर्यटक आकर्षित गर्न दसैं अफर दिइएको छ । कोठा र खानपानमा प्रतिव्यक्ति एक सय रुपैयाँ छुट दिइएको छ ।

जंगल सफारीमा आकर्षित गर्न एकपटक गाडीमा जंगल घुमेको ९ हजार लिइँदै आएकोमा यसपटक भने ८ हजार रुपैयाँमात्र लिने गरिएको छ । एउटा जिपमा एकैपल्ट १० जनासम्म घुम्न सक्छन् ।

‘मोटरसाइकलका यात्रु बढी खर्चालु’

होमस्टे र आसपासका होटलमा आउने आन्तरिक पर्यटकहरूमा गाडीमा आउनेहरूभन्दा मोटरसाइकलमा आउनेहरू बढी खर्चालु हुने गरेको जेएस होटल सञ्चालक जितनारायण थनेत बताउँछन् । गाडीमा चढेर आउने पर्यटकभन्दा मोटरसाइकलमा आउनेहरू बढी खर्चालु हुने गरेको र उनीहरूको बसाइ अवधि पनि २, ३ रातको हुने गरेको उनी बताउँछन् । अमलटारीमा भारतीय र तेस्रो मुलुकका पर्यटकहरू पनि उत्तिकै आउने गरेका छन् ।

पर्यटकहरूले यहाँको सांस्कृतिक भवनमा रात्रि थारु नाच हेर्ने र रमाउने गर्छन्; यस्तो नाचको आनन्द लिनेहरूको संख्या पनि बढ्दो छ ।

होमस्टे बाहिरका होटल व्यवसायीले पनि दसैं अफर भन्दै रुममा ५० प्रतिशतसम्म छुटको घोषणा गरेका छन् ।

प्रकाशित : आश्विन १६, २०७९ १२:४९
प्रतिक्रिया
पठाउनुहोस्

देशका विभिन्न स्थानमा भित्र्याइयो फूलपाती

कान्तिपुर संवाददाता

काठमाडौँ — आइतबार देशका विभिन्न कोत तथा दसैंघरमा फूलपाती भित्र्याइएको छ । विजया दशमीको सातौं दिन देशका विभिन्न शक्तिपीठ तथा मन्दिरहरूमा देवीको पूजाआजा गरी फूलपाती भित्र्याइएको हो ।

सिन्धुलीको कमलामाई नगरपालिका ४ को रक्तमाला मन्दिरको दसैंघरमा सामूहिक फूलपाती भित्र्याइएको छ । रक्तमाला मन्दिर परिसरमा सेना र प्रहरीले फूलपाती बढाइँ गरेका थिए । वाग्मती प्रदेशका संस्कृति‚ पर्यटनमन्त्री दीपेन्द्र श्रेष्ठ फूलपाती भित्र्याउने तथा बढाइँ कार्यक्रममा सरिक भएका थिए ।

नेपाली सेनाको ब्यारेकबाट गएको सेना र सशस्त्र प्रहरीको टोलीले जिल्ला प्रहरी कार्यालयबाट फूलपाती भित्र्याउँदै । तस्बिर : आनन्द गौतम/कान्तिपुर

यसैगरी ताप्लेजुङमा पनि नेपाली सेनाको ब्यारेकबाट गएको सेना र सशस्त्र प्रहरीको टोलीले जिल्ला प्रहरी कार्यालयबाट फूलपाती भित्र्याएको छ ।  प्रहरीले भने हाङदेवा, दोखु, फुङलिङलगायत स्थानबाट अघिल्लै दिन फूलपाती ल्याउने गरेको छ । 

बडादसैंको सातौं दिन सोमबार धनकुटामा आयोजना गरिएको विशेष फूलपाती बढाइँ । उक्त अवसरमा नेपाली सेना, सशस्त्र र नेपाल प्रहरीको टुकडीले सलामी दिएको थियो । तस्बिर : रमेशचन्द्र अधिकारी/कान्तिपुर

आइतबार धनकुटामा पनि विशेष बढाइँ आयोजना गरिएको छ । प्रसिद्ध धार्मिकस्थल निशान भगवती मन्दिरबाट डोलीमा निशानलाई बोकेर बजार परिक्रमा गराई तल्लो टुँडिखेलमा विशेष पूजापछि फुलपाती बढाइँ गरिएको थियो ।

बडादसैंको सातौं दिन सोमबार धनकुटामा आयोजना गरिएको विशेष फूलपाती बढाइँ । तस्बिर : रमेशचन्द्र अधिकारी/कान्तिपुर


प्रकाशित : आश्विन १६, २०७९ १२:३९
पूरा पढ्नुहोस्
प्रतिक्रिया
पठाउनुहोस्
×