रावल एकल उम्मेदवार सिफारिस भएकोमा ओलीको चासो- समाचार - कान्तिपुर समाचार

रावल एकल उम्मेदवार सिफारिस भएकोमा ओलीको चासो

कान्तिपुर संवाददाता

काठमाडौँ — नेकपा (एमाले) अध्यक्ष केपी शर्मा ओलीले भीम रावल अछाम- १ बाट प्रतिनिधिसभाको उम्मेदवारमा एकल सिफारिस भएकोप्रति पार्टीको सुदूरपश्चिमका नेताहरूसँग चासो व्यक्त गरेका छन् । सोमबार साँझ ओलीलाई भेट्न पुगेका प्रदेश इन्चार्ज लेखराज भट्ट, स्थायी कमिटी सदस्य कर्ण थापा, केन्द्रीय सदस्य यज्ञ बोगटी, अछाम इन्चार्ज झपट बोहोरा, अछाम जिल्ला अध्यक्ष चन्द्र बोहोरा र कृष्णप्रसाद जैसीले भेटमा अध्यक्ष ओलीले रावलको सिफारिसबारे चासो व्यक्त गरेका थिए ।

'हिजो साँझ अध्यक्षसँग भेट भएको थियो । उहाँले समग्र जिल्लाको अवस्थाबारे चासो व्यक्त गर्नुभयो । कसरी चुनाव जित्न सकिन्छ भन्नेबारे उहाँको चासो थियो‚' एमाले अछामका अध्यक्ष बोहोराले भने, 'पार्टीले प्रक्रियागत रुपमा तल्लो कमिटीबाट उम्मेदवार सिफारिस भएर आएको छ । उहाँले चुनाव लड्ने वा नलड्नेबारे के हो भनेर चासो राख्नुभयो । लामो समयदेखि रावल कमरेडसँग आफ्नो संवाद नभएको भन्ने उहाँको जिज्ञासा रहेको थियो ।'

करिब ४५ मिनेटसम्म भएको छलफलमा अधिकांश समय रावलको उम्मेदवारीको विषयमा अध्यक्ष ओलीले सोधखोज गरेका थिए । उनले ‘कुनै पनि निर्वाचन क्षेत्रबाट ३ जना उम्मेदवारको सिफारिस गर्ने कार्यविधि रावलको सिफारिसका क्रममा किन पालना नभएको ?’ भन्दै चासो व्यक्त गरेको छलफलमा सहभागी नेताले जानकारी दिए । एमालेका 'दस नेता' मध्ये एकल सिफारिस भएका रावलमात्रै हुन् ।

अछाम प्रतिनिधिसभा निर्वाचन क्षेत्र समन्वय र जिल्ला हुँदै प्रदेश कमिटीले अछाम- १ बाट रावल र अछाम- २ बाट यज्ञ बोगटीलाई उम्मेदवार बनाउन सिफारिस गरेको थियो । बोहोराका अनुसार यस विषयमा रावल र पार्टीका अन्य नेताहरूसँग छलफल गरेपछि जानकारी गराउने अध्यक्ष ओलीलाई बताएका थिए ।

गत वर्ष चितवनमा भएको दसौं महाधिवेशनमा ओलीविरुद्ध अध्यक्षमा प्रतिस्पर्धा गरेका रावल अहिले एमालेको कुनै कमिटीमा छैनन् । एमालेको आन्तरिक विवादमा माधवकुमार नेपालनिकट रहेका तर विभाजनका बेला मूल पार्टीमै बसेका १० नेतामध्ये उपाध्यक्ष युवराज ज्ञवाली र सुरेन्द्र पाण्डे, सचिवद्वय योगेश भट्टराई र गोकर्ण विष्ट, स्थायी कमिटी सदस्यद्वय घनश्याम भुसाल र रघुजी पन्त, केन्द्रीय सदस्य भीम आचार्य, भीम रावललगायत नेता आसन्न प्रतिनिधिसभा निर्वाचनको उम्मेदवारका रूपमा जिल्ला र प्रदेश तहबाट सिफारिस भएका छन् । यसरी सिफारिस भएर आएकामध्ये पन्तलाई समानुपातिक सूचीमा राखिएको छ ।

औपचारिक निर्णय हुनुपूर्व ओलीले ती नेतालाई आत्मालोचना गराउन खोजेका छन् । विगतमा पार्टी अध्यक्ष र प्रधानमन्त्रीका रूपमा आफूले गरेका कामको विरोध गर्नेलाई ओलीले अनुशासन उल्लंघनको विषय बनाएर आत्मालोचना गराउन खोजेका हुन् ।

प्रकाशित : आश्विन ११, २०७९ १७:३३
प्रतिक्रिया
पठाउनुहोस्

विद्युतीय स्कुटरबाट दराजको डेलिभरी

कान्तिपुर संवाददाता

काठमाडौँ — दराज नेपालले काठमाडौं उपत्यकाभरका डेलिभरी विद्युतीय स्कुटरबाट गर्ने भएको छ । वातावरणमैत्री सञ्चालनतर्फ अघि बढ्ने उद्देश्यसहित दराजले हालै १० वटा ओकिनावा डुअल विद्युतीय स्कुटर खरिद गरेको जनाएको छ ।

आयातित इन्धन खपतलाई स्वदेशमै उत्पादन हुने ‘क्लिन एन्ड ग्रिन’ बिजुलीले प्रतिस्थापन गर्ने र वातावरणमा कार्बन फुटप्रिन्ट कम गर्न नयाँ पहलकदम लिइएको कम्पनीले बताएको छ । दराजकी प्रबन्ध निर्देशक आँचल कुँवरले काठमाडौंको गोपीकृष्ण, सोल्टीमोड, र थसिखेल हबका डेलिभरी चालकलाई स्कुटरको साँचो हस्तान्तरण गरिसकेकी छिन् । दुईपांग्रे र चारपांग्रे दुवै खण्डमा आफ्नो फ्लिटमा विद्युतीय सवारीसाधनको संख्या थप बढाउने योजनासमेत रहेको कम्पनीले बताएको छ ।

प्रकाशित : आश्विन ११, २०७९ १७:३१
पूरा पढ्नुहोस्
प्रतिक्रिया
पठाउनुहोस्
×