मनास्लुमा कम्तीमा १३ जना बेपत्ता, उद्धार उडानमा समस्या [अपडेट]- समाचार - कान्तिपुर समाचार
कान्तिपुर वेबसाईट
AdvertisementAdvertisement

मनास्लुमा कम्तीमा १३ जना बेपत्ता, उद्धार उडानमा समस्या [अपडेट]

एक जना नेपाली सख्त घाइते
अमेरिकी स्कीआरोही हिलारी मनास्लुमा बेपत्ता 
सुरज कुँवर

काठमाडौँ — मनास्लु हिमालमा सोमबार बिहान गएको हिमपहिरोमा नेपाली शेर्पासहित कम्तीमा १३ जना बेपत्ता भएका छन् । ८ हजार १ सय ६३ मिटर उचाईको उक्त हिमालको ४८ सय मिटर उचाईमा रहेको आधार शिविरमा रहेका सेभेन समिट ट्रेक्स प्रालिका निर्देशक छाङ दावा शेर्पाका अनुसार, दिउँसो गएको हिमपहिरोमा खराब मौसमका कारण उद्धारमा कठिनाइ भइरहेको छ । 

छाङदावाका अनुसार, हेलि एभरेष्ट, कैलास हेलिकप्टर र सिम्रिक एयरका तीनवटा बीथ्रीई हेलिकप्टर गोरखाको उत्तरी गाउँ सामामा उद्धारका लागि काठमाडौंबाट पुगिसकेका छन् । सेभेन समिटका दुई आरोहण दल सदस्यसहित चार जनालाई घटनास्थलबाट उद्धार गर्नुपर्ने छ ।

उक्त हिमालको ६ हजार ८ सय मिटर उचाईको तेस्रो शिविरदेखि ७ हजार ४ सय ५० मिटर उचाइमा रहेको चौथो शिविरमा बन्दोबस्तीका सामग्री ओसार्ने क्रममा रहेका शेर्पा तथा आरोहीहरु हिमपहिरोमा परेका हुन् ।

हिमपहिरोमा काठमाडौंको सातुरी एडभेन्चरका तीन जना शेर्पा घाइते भएको कम्पनीका प्रबन्ध निर्देशक ऋषिराम भण्डारीले कान्तिपुरलाई बताए । उनका अनुसार, उक्त कम्पनीका गाइड अनुप राईको अवस्था सख्त घाइते छ । ‘घाइतेहरुलाई उद्धारको खाँचो छ । अनुप बेहोस छन् । तीनवटा हेलिकप्टर मनास्लु हिमालको आधार शिविर आसपासमा छन् । मौसम सफा हुनेबित्तिकै घाइतेहरुलाई उद्धार गर्ने तयारी भइरहेको छ,’ उनले भने ।

आधार शिविरदेखि ४ घन्टा दुरीमा रहेको सामागाउँमा रहेकी पर्यटन विभागकी अधिकृत तथा आरोहण दल सम्पर्क अधिकृत यशोदा अर्यालका अनुसार, हिमपहिरोबाट भएको क्षतिबारे एकिन जानकारी अझै प्राप्त हुन सकेको छैन । ‘हिउँ परिरहेको छ । दुइटा हेलिकप्टर सामागाउँमा उद्धारका लागि तयारी अवस्थामा छन् । अहिले यहाँबाट आधार शिविरमा हिउँ परेको देखिरहेको छ,’ उनले कान्तिपुरसँग भनिन् । उनका अनुसार, अर्को हेलिकप्टर नजिकैको नाम्जुङतर्फ गएको छ ।

अमेरिकी स्की पर्वतारोही हिलारी नेल्सन बेपत्ता

यसैबीच प्रख्यात अमेरिकी स्की पर्वतारोही हिलारी नेल्सन मनास्लुमा स्की गर्नेक्रममा बेपत्ता भएकी छन् । काठमाडौंको सांग्रीला नेपाल ट्रेक्स प्रालिका प्रबन्ध निर्देशक जीवन घिमिरेका अनुसार उनीसँगै स्की गर्न गएका जीम म्यारिसन भने आधार शिविरमा फर्किसकेका छन् । ‘जीम सकुशल आधार शिविर फर्किसके । हिलारी मनाङतर्फ पर्ने भीमथाङतर्फ हराइरहेकी छन्,’ प्रबन्ध निर्देशक घिमिरेले कान्तिपुरसँग भने । उनले आफ्नो कम्पनीबाट शरदकालीन मनास्लु आरोहणमा गएका अन्य सदस्य तथा शेर्पाहरु सकुशल रहेको बताए ।

प्रकाशित : आश्विन १०, २०७९ १६:३२
प्रतिक्रिया
पठाउनुहोस्

निगमले ९ महिनापछि इन्जिन फेर्न जहाज इजरायल पठायो 

सुरज कुँवर

काठमाडौँ — नेपाल वायु सेवा निगमले इन्जिन फेर्नका बिहीबार न्यारोबडी जहाज इजरायल पठाएको छ । ९ महिनाअघि मर्मतका लागि इन्जिन इजरायल पठाइएको थियो ।  बिहीबार त्यही इन्जिन फेर्नका लागि 'सगरमाथा' नाम दिइएको न्यारोबडी जहाज पठाइएको हो । 

‘फेरि फ्लाइट’ गर्दै इजरायल पठाइएको जहाजको मध्य साउनमा बारोस्कोप इन्स्पेक्सन (जाँच) गर्दा दायाँ इन्जिनमा समस्या देखिएपछि काठमाडौंमा ग्राउन्डेड गरिएको थियो । उक्त जाचँले ५ पटक मात्रै उडान गर्न मिल्ने देखिएपछि ग्राउन्डेड गरिएको जहाजको इन्जिन फेर्न निगम व्यवस्थापन लाई झन्डै दुई महिना लागेको छ ।

निगमका एक उच्च अधिकारीका अनुसार, नियमित उडानमा रहेका बेला ९ महिनाअघि पुस १३ गते दोहामा न्यारोबडीको बायाँ इन्जिनमा समस्या देखिएपछि जहाज त्यहीँ छाडिएको थियो ।

०७८ पुस १३ गते दोहामा (ग्राउन्डेड) छाडिएको न्यारोबडीमा दुई महिनापछि ०७८ फागुन २२ गते नेदरल्यान्डको एक कम्पनीबाट भाडाको इन्जिन राखेर जहाज काठमाडौं ल्याई नियमित उडानमा लगाएको थियो ।

‘व्यवस्थापकीय लापर्बाहीका कारण इजरायलमा मर्मत गर्न दिइएको इन्जिन फेर्न झन्डै ९ महिनापछि हिजो न्यरोबडी इजरायल पठाएका छौं,’ निगमका एक अर्का निर्देशकले भने, ‘मर्मत गरिएको इन्जिन जहाजमा जडान गरी मध्य साउनमा बारोस्कोप इन्स्पेक्सन (जाँच) का क्रममा समस्या देखिएको दायाँ इन्जिन त्यहीँ छाडेर दोहामा बिग्रिएको इन्जिन (हाल मर्मत भइसकेको) राखेर त्यो जहाज सोमबार मात्रै काठमाडौं फर्किने छ ।’

बेलैमा जहाज मर्मत गर्न नसकेपछि उडान रद्द गर्दै निगम

एक इन्जिनियरका अनुसार, निगमसँग जगेडा इन्जिन नभएकोले दोहामा ग्राउन्डेड हुँदा निगमले प्रतिदिन २ हजार डलर, प्रतिघन्टा २ सय ९२ डलर र प्रतिउडान २ सय ३९ डलर गरी दैनिक कम्तीमा ३ लाख रुपैयाँ भाडामा नेदरल्यान्डको जहाज इन्जिन भाडामा दिने एमटीयूबाट इन्जिन लिएर उडाइरहेको छ ।

प्राविधिक समस्या देखिएको दायाँ इन्जिन इजरायलमा छाडेर जहाज अर्को हप्ता फर्किने छ । उक्त इन्जिन कसले कहिलेसम्म बनाइसक्ने भन्ने बारे अझै अन्यौल नै छ । ‘प्राविधिक समस्या देखिएको इन्जिनलाई अहिले इजरायलमा छाडिने छ,’ एक अर्का प्राविधिकले भने, ‘त्यो मर्मत गर्ने ठेक्का भएपछि कस्ले कहा बनाउने ? कहिले बनाउने टुंगो लाग्ने छ ।’

संस्कृति, पर्यटन तथा नागरिक उड्डयन मन्त्रालयका एक अधिकारीका अनुसार, निगमले भैपरी आउने इन्जिनसँग सम्बन्धित समस्या समाधान गर्न बेलैमा एमआरओ छनौट गर्न नसकेका कारण जहाजमा आउने समस्या सामाधान गर्न महिनौँ लाग्ने, इन्जिन भाडामा ल्याउदा महँगो शुल्क तिर्नुपर्ने, विदेशी एमआरओ कम्पनीका नेपाली एजेन्टहरुले चलखेल गर्ने गरेको देखिएको छ ।

प्रकाशित : आश्विन ७, २०७९ १२:१७
पूरा पढ्नुहोस्
प्रतिक्रिया
पठाउनुहोस्
×