राष्ट्रपतिले नागरिकता विधेयक रोकेकोमा जसपाद्वारा आन्दोलनको घोषणा- समाचार - कान्तिपुर समाचार
कान्तिपुर वेबसाईट
AdvertisementAdvertisement

राष्ट्रपतिले नागरिकता विधेयक रोकेकोमा जसपाद्वारा आन्दोलनको घोषणा

कान्तिपुर संवाददाता

काठमाडौँ — राष्ट्रपति विद्यादेवी भण्डारीले नागरिकता विधेयक प्रमाणीकरण नगरेर संविधानको पालना नगरेको भन्दै जनता समाजवादी पार्टी (जसपा)ले आन्दोलनको घोषणा गरेको छ । जसपाको मधेस प्रदेश कमिटीले राष्ट्रपति भण्डारीको राजीनामा माग गर्दै चरणबद्ध आन्दोलनको घोषणा गरेको हो । नेता रामसहायप्रसाद यादवले पार्टीको मधेस कमिटीले शनिबारदेखि चरणबद्ध रूपमा शान्तिपूर्ण आन्दोलन गर्ने घोषणा गरेको जानकारी दिए । 

‘संविधानको रक्षकबाटै संविधानको उल्लंघन भएको छ, संविधानभन्दा माथि कोही पनि छैन, कोही पनि हुँदैन । राष्ट्रपति संविधानको संरक्षक हो, र पालक पनि हो । उहाँले संविधानको उल्लंघन गर्नुभएको छ, मधेसका नागरिकहरूले त्यसको विरुद्ध आवाज उठाउँदैछन्,’ उनले भने, ‘यो संविधान र लोकतन्त्रमाथिको प्रहार हो, यो सह्य छैन ।’

जसपाले नागरिक विधेयक जारी नहुँदा मधेसका लाखौँ जनताले नागरिकताबाट वञ्चित हुनुपर्ने अवस्था रहेको भन्दै त्यसलाई मुद्दा बनाएर आन्दोलन थालेको हो । सत्ता गठबन्धनले राष्ट्रपति भण्डारीले विधेयक प्रमाणीकरण नगरेर संविधान मिचेको विषयलाई चुनावी मुद्दा बनाउने निर्णय गरिसकेको छ ।

गठबन्धनकै एक घटक जसपाले भने मधेसका जिल्लामा आन्दोलनको कार्यक्रम घोषणा गरेको छ । जसअनुसार असोज ८ गते मधेसका आठवटै जिल्लाका सदरमुकाममा राष्ट्रपति भण्डारीको कदमको सन्दर्भमा नागरिक समाज, बुद्धिजीवी, व्यापारी, शिक्षक, कानुनी व्यवसायी र सञ्चारकर्मीसँग छलफल गर्ने, असोज ११ गते जसपाका भातृ संगठनहरुले राष्ट्रपति भण्डारीविरुद्ध प्रदर्शन गर्दै उनको पुत्ला जलाउने, असोज १३ गते पालिका स्तरमा अन्तरक्रिया गर्ने र असोज १५, १६ र १७ गते पालिका एवं वडा स्तरमा प्रदर्शन गर्ने जसपाले जनाएको छ ।

प्रकाशित : आश्विन ७, २०७९ १२:४७
प्रतिक्रिया
पठाउनुहोस्

निगमले ९ महिनापछि इन्जिन फेर्न जहाज इजरायल पठायो 

सुरज कुँवर

काठमाडौँ — नेपाल वायु सेवा निगमले इन्जिन फेर्नका बिहीबार न्यारोबडी जहाज इजरायल पठाएको छ । ९ महिनाअघि मर्मतका लागि इन्जिन इजरायल पठाइएको थियो ।  बिहीबार त्यही इन्जिन फेर्नका लागि 'सगरमाथा' नाम दिइएको न्यारोबडी जहाज पठाइएको हो । 

‘फेरि फ्लाइट’ गर्दै इजरायल पठाइएको जहाजको मध्य साउनमा बारोस्कोप इन्स्पेक्सन (जाँच) गर्दा दायाँ इन्जिनमा समस्या देखिएपछि काठमाडौंमा ग्राउन्डेड गरिएको थियो । उक्त जाचँले ५ पटक मात्रै उडान गर्न मिल्ने देखिएपछि ग्राउन्डेड गरिएको जहाजको इन्जिन फेर्न निगम व्यवस्थापन लाई झन्डै दुई महिना लागेको छ ।

निगमका एक उच्च अधिकारीका अनुसार, नियमित उडानमा रहेका बेला ९ महिनाअघि पुस १३ गते दोहामा न्यारोबडीको बायाँ इन्जिनमा समस्या देखिएपछि जहाज त्यहीँ छाडिएको थियो ।

०७८ पुस १३ गते दोहामा (ग्राउन्डेड) छाडिएको न्यारोबडीमा दुई महिनापछि ०७८ फागुन २२ गते नेदरल्यान्डको एक कम्पनीबाट भाडाको इन्जिन राखेर जहाज काठमाडौं ल्याई नियमित उडानमा लगाएको थियो ।

‘व्यवस्थापकीय लापर्बाहीका कारण इजरायलमा मर्मत गर्न दिइएको इन्जिन फेर्न झन्डै ९ महिनापछि हिजो न्यरोबडी इजरायल पठाएका छौं,’ निगमका एक अर्का निर्देशकले भने, ‘मर्मत गरिएको इन्जिन जहाजमा जडान गरी मध्य साउनमा बारोस्कोप इन्स्पेक्सन (जाँच) का क्रममा समस्या देखिएको दायाँ इन्जिन त्यहीँ छाडेर दोहामा बिग्रिएको इन्जिन (हाल मर्मत भइसकेको) राखेर त्यो जहाज सोमबार मात्रै काठमाडौं फर्किने छ ।’

बेलैमा जहाज मर्मत गर्न नसकेपछि उडान रद्द गर्दै निगम

एक इन्जिनियरका अनुसार, निगमसँग जगेडा इन्जिन नभएकोले दोहामा ग्राउन्डेड हुँदा निगमले प्रतिदिन २ हजार डलर, प्रतिघन्टा २ सय ९२ डलर र प्रतिउडान २ सय ३९ डलर गरी दैनिक कम्तीमा ३ लाख रुपैयाँ भाडामा नेदरल्यान्डको जहाज इन्जिन भाडामा दिने एमटीयूबाट इन्जिन लिएर उडाइरहेको छ ।

प्राविधिक समस्या देखिएको दायाँ इन्जिन इजरायलमा छाडेर जहाज अर्को हप्ता फर्किने छ । उक्त इन्जिन कसले कहिलेसम्म बनाइसक्ने भन्ने बारे अझै अन्यौल नै छ । ‘प्राविधिक समस्या देखिएको इन्जिनलाई अहिले इजरायलमा छाडिने छ,’ एक अर्का प्राविधिकले भने, ‘त्यो मर्मत गर्ने ठेक्का भएपछि कस्ले कहा बनाउने ? कहिले बनाउने टुंगो लाग्ने छ ।’

संस्कृति, पर्यटन तथा नागरिक उड्डयन मन्त्रालयका एक अधिकारीका अनुसार, निगमले भैपरी आउने इन्जिनसँग सम्बन्धित समस्या समाधान गर्न बेलैमा एमआरओ छनौट गर्न नसकेका कारण जहाजमा आउने समस्या सामाधान गर्न महिनौँ लाग्ने, इन्जिन भाडामा ल्याउदा महँगो शुल्क तिर्नुपर्ने, विदेशी एमआरओ कम्पनीका नेपाली एजेन्टहरुले चलखेल गर्ने गरेको देखिएको छ ।

प्रकाशित : आश्विन ७, २०७९ १२:१७
पूरा पढ्नुहोस्
प्रतिक्रिया
पठाउनुहोस्
x
×