राष्ट्रपतिले नागरिकता विधेयक रोकेकोमा जसपाद्वारा आन्दोलनको घोषणा

‘संविधानको रक्षकबाटै संविधानको उल्लंघन भएको छ, संविधानभन्दा माथि कोही पनि छैन, कोही पनि हुँदैन । राष्ट्रपति संविधानको संरक्षक हो, र पालक पनि हो । उहाँले संविधानको उल्लंघन गर्नुभएको छ, मधेसका नागरिकहरूले त्यसको विरुद्ध आवाज उठाउँदैछन्,’ उनले भने, ‘यो संविधान र लोकतन्त्रमाथिको प्रहार हो, यो सह्य छैन ।’

जसपाले नागरिक विधेयक जारी नहुँदा मधेसका लाखौँ जनताले नागरिकताबाट वञ्चित हुनुपर्ने अवस्था रहेको भन्दै त्यसलाई मुद्दा बनाएर आन्दोलन थालेको हो । सत्ता गठबन्धनले राष्ट्रपति भण्डारीले विधेयक प्रमाणीकरण नगरेर संविधान मिचेको विषयलाई चुनावी मुद्दा बनाउने निर्णय गरिसकेको छ ।

गठबन्धनकै एक घटक जसपाले भने मधेसका जिल्लामा आन्दोलनको कार्यक्रम घोषणा गरेको छ । जसअनुसार असोज ८ गते मधेसका आठवटै जिल्लाका सदरमुकाममा राष्ट्रपति भण्डारीको कदमको सन्दर्भमा नागरिक समाज, बुद्धिजीवी, व्यापारी, शिक्षक, कानुनी व्यवसायी र सञ्चारकर्मीसँग छलफल गर्ने, असोज ११ गते जसपाका भातृ संगठनहरुले राष्ट्रपति भण्डारीविरुद्ध प्रदर्शन गर्दै उनको पुत्ला जलाउने, असोज १३ गते पालिका स्तरमा अन्तरक्रिया गर्ने र असोज १५, १६ र १७ गते पालिका एवं वडा स्तरमा प्रदर्शन गर्ने जसपाले जनाएको छ ।