आयोगको कार्यालयमा विरोध जनाएपछि साना दलका तीन नेता प्रहरी नियन्त्रणमा

महाधिवेशन नगरेको भन्दै आयोगले जरिवाना गरेको पत्र दिएपछि उनीहरुले आयोग कार्यालयमा होहल्ला गरेका थिए । समानुपातिक उम्मेदवारको बन्दसूची बुझाउन जाँदा आफूहरू पक्राउ परेको उनीहरुले बताएका छन् ।

आयोगका प्रमुख आयुक्तसहित आयुक्तहरूको ठाडो आदेशबाट आफूहरू पक्राउ परेको समाजवादी केन्द्र नेपालका सर्वोच्च नेता युवराज सफलले बताए । 'हामी समानुपातिक उम्मेदवारको बन्द सूची बुझाउन जाँदा आयोगले जरिवानाको पत्र थमाइयो । तर हामीले पूर्वसूचना बिना नै थमाइएको पत्र नबुझ्ने भनेर विरोध जनाएपछि तत्कालै सचिवज्यूको कार्यालयबाट हामीलाई प्रहरीले नियन्त्रणमा लियो ।'

युवराजका अनुसार उनीहरूलाई अहिले दरबारमार्गस्थित प्रहरी वृत्तमा राखिएको छ । कांग्रेस, एमाले लगायतका पार्टीले समयमै महाधिवेशन नगर्दा केही नगरेको तर साना दलमाथि आयोगले सिण्डिकेट लगाएको उनीहरूको गुनासो छ ।

प्रमुख निर्वाचन आयुक्त दिनेश थपलियाले जरिवाना तिरेर मात्रै निर्वाचनमा सहभागी हुन भनेपछि उनीहरूले आयोगमै विरोध जनाएपछि आयोगमा होहल्ला गरेको भन्दै पक्राउ गरिएको थियो ।

पक्राउ पर्ने ती नेताहरू वामदेव गौतम नेतृत्वको नेकपा एकता राष्ट्रिय अभियानमा संलग्न भएको केही दिनमै एकतर्फी रुपमा गौतमलाई आफूहरूले कारबाही गरेको भन्दै अभियानबाट बाहिरिएका थिए ।