जबरा निवासमा बाक्लो सुरक्षा- समाचार - कान्तिपुर समाचार
कान्तिपुर वेबसाईट
AdvertisementAdvertisement
तस्बिरहरू

जबरा निवासमा बाक्लो सुरक्षा

तस्बिर : अंगद ढकाल

काठमाडौँ — निलम्बित प्रधानन्यायाधीश चोलेन्द्रशमशेर जबराको सरकारी निवास परिसर, बालुवाटारमा सुरक्षाकर्मीको संख्या बढाइएको छ । सर्वोच्च अदालत प्रवेशमा रोक लगाउन सरकारले आइतबार बिहान नेपाल प्रहरीलाई निर्देशन दिएसँगै उनको सरकारी निवासमा पनि सुरक्षा बढाइएको हो ।

जबरा निवासभित्र छिर्ने र बाहिरिने गाडी हरुको पुलिसले सोधपुछ गरेर मात्र भित्र छिराउने र बाहिर निस्किन दिइरहेको छ । भित्रबाट गाडी निस्कँदा बाहिर रहेका सुरक्षाकर्मीले उनीहरुको नम्बर, नाम सोधेर, कारभित्र को–को छन् भनेर जाँच गरेर मात्र बाहिर निस्किन दिइरहेका छन् ।

सरकारले प्रहरी प्रधान कार्यालयलाई सर्वोच्च अदालतमा जबरालाई छिर्न नदिन निर्देशन दिएको छ । सरकारको निर्देशन पछाडि जबरालाई सर्वोच्च प्रवेशमा रोक लगाउन बिहानदेखि व्यापक रुपमा सुरक्षाकर्मी तैनाथ गरिएको छ । प्रहरी प्रधान कार्यालयले पनि जबराको सुरक्षामाका खटिएका सुरक्षा अधिकारीलाई सर्वोच्च जाने स्थिति नरहेको भन्दै सोहीअनुसार सुरक्षा व्यवस्था मिलाउन निर्देशन दिएको थियो । बाहिर निस्कन प्रतिकूल अवस्था रहेको भन्दै जबरालाई अदालत नजान भनिएको एक उच्च प्रहरी अधिकारीले बताए ।

जबरालाई सर्वोच्च अदालत प्रवेशमा रोक लगाउन सर्वोच्च परिसरमा कार्यालय समयअघि नै जनशक्ति परिचालन गरिएको छ । निलम्बित प्रधानन्यायाधीश चोलेन्द्रशमशेर जबराविरुद्ध महाभियोग लगाउनुपर्ने आधार र कारण रहेको भन्दै संसद्को महाभियोग सिफारिस समितिले प्रतिवेदन बुझाएकै साँझ(शनिबार) जबराले आफू सर्वोच्च अदालतको नियमित जिम्मेवारीमा फर्कने भनेर सर्वोच्च अदालतलाई खबर गरेका थिए ।


प्रकाशित : आश्विन २, २०७९ १२:२९
प्रतिक्रिया
पठाउनुहोस्

यस्तो देखियो प्रतिनिधिसभाको अन्तिम बैठकमा [तस्बिरहरु]

तस्बिर : अंगद ढकाल

काठमाडौँ — विभिन्न आरोह–अवरोह, उल्लेखनीय मोडहरू पार गर्दै, कतिपय विषयमा इतिहास रच्दै, कैयौं अहम् विषयलाई निष्कर्षमा पुर्‍याएर केही विषय सघन विमर्शका लागि सुम्पेर संघीय संसद, प्रतिनिधिसभाले आफ्नो कार्यकाल पूरा गरेको छ । यो प्रतिनिधिसभा २०७७ पुस ५ गते र २०७८ जेठ ८ गते दुईपटक विघटन भयो र दुवैपटक जनताको पहलकदमी र सर्वोच्च अदालतको फैसलाबाट पुनःस्थापित भएको हो ।

प्रतिनिधिसभाको अन्तिम दिनको बैठकको सुरुमा सभामुख अग्निप्रसाद सापकोटा ।

संविधानमा उल्लेखित शक्ति पृथकीकरणको सिद्धान्तअनुरुप शक्ति सन्तुलन र नियन्त्रणसहितको संवैधानिक सर्वोच्चताको विषय प्रतिनिधिसभाको यो अवधिमा स्थापित हुनु आगामी दिनका लागि मार्गदर्शन सावित हुनेछ ।

प्रतिनिधिसभाको अन्तिम दिनको बैठकलाई एमाले अध्यक्ष केपी शर्मा ओलीले सम्बोधन गर्नुअघि स्यानिटाइजर छर्कँदै ।

बैठकमा सम्बोधन गरी रोस्ट्रमबाट फर्किंदै प्रधानमन्त्री शेरबहादुर देउवा ।

शनिबार प्रतिनिधिसभाको ११औं अधिवेशनको अन्तिम दिनको बैठकमा सभामुख अग्निप्रसाद सापकोटाले प्रतिनिधिसभाको पूर्ण कार्यकालका लागि भएका पहललाई इतिहासले पक्कै स्मरण गर्ने बताए । बैठकमा विभिन्न दलका शीर्ष नेताहरुले सम्बोधन गरे । नेकपा (एमाले) र नेकपा माओवादी केन्द्रका अध्यक्ष पुष्पकमल दाहालबीच घोचपेच नै छल्यो । दलीय आधारमा बोलेका नेताहरुले कतिपयले संसद्‌को कार्यकाललाई ठीकै भएको समीक्षा गरे भने कतिपयले उपलब्धिमूलक नभएको धारणा राखे ।

बैठकमा सम्बोधन गरी रोस्ट्रमबाट फर्किंदै नेकपा माओवादी केन्द्रका अध्यक्ष पुष्पकमल दाहाल ।

बैठक सकिएपछि हलबाट निस्किने क्रममा एकाअर्कालाई बिदाई गर्दै सांसदहरु ।

उनले आगामी मंसिर ४ गतेका लागि तय भएको अर्को प्रतिनिधिसभाको निर्वाचन निष्पक्ष ढंगले सफल बनाउन हामी सबैको योगदान रहनेछ भन्ने विश्वास व्यक्त गर्दै यस अवधिमा संघीय संसद्, प्रतिनिधिसभालाई जीवन्त र जनमुखी बनाउने अठोटका साथ गरिएका पहल र प्रयत्नहरूमा सदस्यहरूबाट प्राप्त विश्वास र सहयोगका लागि विशेष आभार व्यक्त गरे ।

प्रतिनिधिसभा बैठकमा सहभागी सांसदहरु ।

संघीय संसद् भवनमा प्रवेशको क्रममा पत्रकारहरुसँग कुरा गर्दै सांसदहरु ।

संघीय संसद् भवन प्रवेश गर्दै प्रधानमन्त्री शेरबहादुर देउवा ।

संसद्‌ भवन बाहिर सामूहिक तस्बिर खिचाउँदै सांसदहरु ।


प्रकाशित : आश्विन १, २०७९ १९:३८
पूरा पढ्नुहोस्
प्रतिक्रिया
पठाउनुहोस्
×