कान्तिपुर वेबसाईट
AdvertisementAdvertisement
२३.१२°C काठमाडौं
काठमाडौंमा वायुको गुणस्तर: ८०

बाढीले साढे ३ हजार परिवार विस्थापित

प्रदेश ब्युरो

काठमाडौँ — खोला र नदीमा जलस्तर बढेर शनिबार बिहानदेखि बस्ती पसेपछि कैलालीको पूर्वी क्षेत्रमा झन्डै दुई हजार परिवार विस्थापित भएका छन् । बस्ती जलमग्न भएका कारण स्थानीय बासिन्दा ज्यान जोगाउनै मुस्किल भएको बताउँछन् ।

बाढीले साढे ३ हजार परिवार विस्थापित

जिल्ला प्रशासन कार्यालय कैलाली सूचना अधिकारी शिवराज जोशीका अनुसार विभिन्न नदीमा आएको बाढी बस्तीमा पसेर जोशीपुरमा ४ सय, कैलारीमा १ सय ८०, टीकापुरमा १ सय ७५, भजनीमा १ हजार ५०, जानकी गाउँपालिकामा ९५, लम्की चुहामा १ सय ५०, धनगढी उपमहानगरमा १५ परिवार गरी २ हजार ५५ घर डुबानमा परेको प्रारम्भिक जानकारी आएको छ । यस्तै, टीकापुरमा ७० र जानकीमा ६५ परिवार र भजनी नगरपालिकामा ८ सय जना विस्थापित भएका छन् । स्थानीय काँडा, कान्द्रा, पथरिया, कटनी, मोहना र कर्णाली नदीको बाढी पसेर दक्षिणी पूर्वी क्षेत्रमा पर्ने टीकापुर, भजनी नगरपालिका, जोशीपुर, कैलारी र जानकी गाउँपालिका अधिकांश वडा जलमग्न बनेका छन् ।

भजनी नगरपालिका प्रमुख केवल चौधरीले नौ वटै वडाका बस्ती जलमग्न भएको बताए । धेरै परिवार आफ्नै घरको माथिल्लो तलामा थुनिएका छन् । टीकापुर–१, २, ३ मा कर्णालीको बाढीले सात सय बढी घर प्रभावित भएको र दुई सय परिवार विस्थापित बनेको नगर प्रमुख रामलाल डगौराले बताए । धनगढी उपमहानगरपालिका–१३ झालागरी गाउँका १७ वर्षीय नविना चौधरीको बाढीले भरिएको तलाउमा माछा मार्न जाने क्रममा शनिबार मृत्यु भएको छ ।

कञ्चनपुरको वनहरा र दोदा नदीको बाढीले दर्जनौं बस्ती डुबानमा परेका छन् । जिल्ला प्रहरी कार्यालयका अनुसार शुक्रबार रातिदेखि विभिन्न नदीमा आएको बाढी बस्ती पस्दा ४ सयभन्दा बढी परिवार विस्थापित भएका छन् । विस्थापितहरूलाई स्थानीय विद्यालयमा राखिएको छ । वनहराको बाढीले शुक्लाफाँटा नगरपालिका–११ को वनहरा शिविरका २५ टहरा बगाएको प्रहरीले जनाएको छ । वनहरा नदीको बाढीले शुक्लाफाँटा नगरपालिका–१२ चित्रपुर र लालझाडी गाउँपालिकाको तिल्की जोड्ने झोलुंगे पुल भत्काएको छ । बाढीले हुलाकी सडकसमेत बगाएको छ ।

बाढीले बर्दियामा झन्डै सात सय जना विस्थापित भएका छन् । बाढी र डुबानले राजापुर र ठाकुरबाबा नगरपालिकाका बासिन्दा बढी प्रभावित भएका हुन् । राजापुरका डुबानपीडित ६ सय ५९ जनाले विद्यालय, सामुदायिक वनका भवनलगायत सुरक्षित स्थलमा आश्रय लिइरहेको प्रमुख जिल्ला अधिकारी बन्धुप्रसाद बास्तोलाले बताए । राजापुरमा पछिल्लो २४ घण्टामा २ सय २७ मिलिमिटर वर्षा भएको स्थानीय प्रशासनले जनाएको छ । २४ घण्टामा १ सय ४० मिलिमिटर वर्षा भए जोखिम मानिन्छ । बबई, कर्णाली र सानाठूला खोलामा पानीको बहाव अहिले उच्च छ । दुई साताअघि पनि डुबानका कारण ठाकुरबाबा नगरपालिका–५ र ७ का ३५ घरपरिवारलाई अन्यत्र सारिएको थियो ।

गेरुवा गाउँपालिका–३ सनकटीघाटमा अहिले कर्णाली नदी कटानले व्यापक क्षति पुर्‍याउन थालेको छ । नदी कटानले कर्णाली नदीस्थित सत्तीपुल पनि जोखिममा पारेको छ । ओराली बजार र डल्ला हुँदै ठाकुरद्वारा जाने सडक खण्ड नदी कटानले बगाएको छ । पाल्पाका विभिन्न ठाउँमा खसेको पहिरोले सिद्धार्थ राजमार्ग र तानसेन–रिडी सडकमा यात्रा गर्ने यात्रुले सास्ती भोग्नुपरेको छ । कतिपय स्थानमा सडक एकतर्फी बनेको दोभान चौकीका प्रहरी सहायक निरीक्षक कुलबहादुर श्रेष्ठले बताए । सिसुवा, चौबिसमाइल, चर्चरे, कालीमाटीलगायत स्थानमा पनि पहिरो खस्ने र सडक अवरुद्ध भइरहेको छ । पहिरोका कारण तानसेन–रिडी सडक खण्ड पनि ठाउँठाउँमा अवरुद्ध भएको छ । अविरल वर्षाले रामपुर नगरपालिका–५ बेझाडस्थित कालीगण्डकी करिडोर जोड्ने सडक भासिएको छ । सिद्धार्थ राजमार्गको तिनाउ–५ हिउँदेखोलामा पनि डाइभर्सन बनाएको स्थान वर्षाले भासिएको छ ।

मोहन बुडाऐर (धनगढी), भवानी भट्ट (कञ्चनपुर), जे पाण्डे (बाँके) कमल पन्थी (बर्दिया) र माधव अर्याल (पाल्पा)

प्रकाशित : आश्विन २, २०७९ ०६:४६
प्रतिक्रिया
पठाउनुहोस्
जनताको राय

बहालवाला मुख्यसचिवमाथि नै भ्रष्टाचार मुद्दा दायर भएको छ । यसबारे तपाईं के भन्नुहुन्छ ?

x