लुम्बिनीमा महिला सामाजिक उद्यमी उत्सव- समाचार - कान्तिपुर समाचार

लुम्बिनीमा महिला सामाजिक उद्यमी उत्सव

४ हजार ५ सय साना किसान तथा उद्यमी महिला सहभागी
अमृता अनमोल

बुटवल — महिला सशक्तीकरणका लागि उद्यम भन्ने नारासहित लुम्बिनीमा आयोजना गरिएको महिला सामाजिक उद्यमी उत्सव सम्पन्न भएको छ । आर्थिक उपार्जन र आत्मनिर्भरताले मात्रै दिगो महिला सशक्तीकरण हुने निष्कर्ष निकाल्दै बिहीबार सुरु भएको महिला उत्सव सम्पन्न भएको हो ।

उत्सवमा देशभरबाट छनोट भएका करिब ४ हजार ५ सय साना किसान तथा उद्यमी महिला सहभागी थिए । सामाजिक उद्यमी महिला सञ्जाल र हेफर इन्टरनेसनलले उत्सव आयोजना गरेका हुन् ।

सामाजिक उद्यमी महिला सञ्जालमा ३ लाख १४ हजार साना किसान महिला आबद्ध छन् । उनीहरूले २ सय ५५ वटा सामाजिक उद्यमी महिला सहकारी संस्था सञ्चालन गरेका छन् । त्यसबाट उत्कृष्ट महिला छनोट गरेर उत्सवमा सहभागी गराइएको सञ्जालकी अध्यक्ष पार्वती न्यौपानेले बताइन् । महिलाहरूलाई समूह र सहकारीमा आबद्ध गर्दै आर्थिक तथा सामाजिक सशक्तीकरण गर्ने लक्ष्यसहित सञ्जालले काम गरेको छ ।

उत्सवमा उत्कृष्ट ४ सहकारीलाई पुरस्कृत गरिएको छ । उत्सवमा बोल्दै लुम्बिनी प्रदेशका प्रमुख अमिककुमार शेरचनले ग्रामीण क्षेत्रका महिलाहरूको आर्थिक तथा सामाजिक सशक्तीकरण र क्षमता विकासबाट आफू प्रभावित भएको बताए । आवश्यकताको पहिचान र समस्यामा सहजीकरण गर्न सक्ने हो भने बेरोजगार भएका र घरको चुलोचौकोमा भुलेका धेरै महिला उत्पादनमा जोडिन सक्ने, उद्यमी बन्ने र जीविका फेर्न सक्ने उनले जनाए ।

कार्यक्रममा संघीय सांसद गोकर्ण विष्ट, प्रदेश सांसदहरू, लुम्बिनी प्रदेशका विभिन्न स्थानीय तहका प्रमुखलगायतले उद्यमी महिलाहरूको उत्पादन, बजारीकरण र उद्यम सञ्चालनमा सघाउने प्रतिबद्धता जनाएका थिए ।

प्रकाशित : भाद्र ३०, २०७९ १९:१३
प्रतिक्रिया
पठाउनुहोस्

बाल दिवसमा बालबालिकालाई बिछ्यौना वितरण

अमृता अनमोल

बुटवल — बालबिज्याइँमा परेका बालबालिकाहरूलाई बिछ्यौना वितरण गर्दै लुम्बिनी प्रदेश सरकारले यस वर्षको बाल दिवस मनाएको छ ।

५८ औं राष्ट्रिय बाल दिवसका अवसरमा प्रदेशको महिला बालबालिका तथा ज्येष्ठ नागरिक मन्त्रालयले भैरहवामा रहेको बाल सुधार गृहमा बिछ्यौना हस्तान्तरण गर्दै उनीहरूलाई कपडा र खाना-खाजा दिएको थियो । बालसुधार गृहमा १५ जना राख्न मिल्ने क्षमताको हो । तर ९३ जना बालबिज्याइँ गरेका बालकहरू सकसपूर्ण तरिकाले बस्न बाध्य छन् ।

सहयोग सामग्री वितरण कार्यक्रममा बोल्दै महिला बालबालिका तथा ज्येष्ठ नागरिकमन्त्री रमा घर्तीले कानुनको विवादमा परेका बालबालिकामा थोरै भए पनि सहयोग गर्न र हौसला एवं प्रेरणा भर्न आएको बताइन् । उनले बालसुधार केन्द्र प्रदेश मातहतको कार्यालय नहुँदा इच्छा भएर पनि काम गर्न नसकेको बताइन् ।

बालसुधार गृह केन्द्र मातहत भए पनि निर्देशिकामा उल्लेख भए अनुसार सुधार गृहको स्तरोन्नति तीनै तहका सरकारले गर्नुपर्ने उल्लेख छ ।

सचिव दीपक नेपालले लक्षित वर्गमा फाइदा पुगोस् भनेर विगतमा हुने र्‍याली र गोष्ठीको सट्टा सहयोग सामग्री हस्तान्तरण गरेर बाल दिवस मनाएको बताए ।

उनले कानुनले विवादमा परेका बालबालिकालाई उमेर समूह अनुसार प्रविधिमैत्री, मनोरञ्जन दिने खालका कार्यक्रमहरू गर्नुपर्ने आवश्यकता देखेको बताए । सचिव नेपालले स्थानीय सरकारसँग सहकार्य गरेर बाल सुधार गृह अन्यत्र स्थानान्तरण गर्नुपर्ने र शिक्षा, स्वास्थ्य, पौष्टिक आहार, माया, अनुकूल वातावरण जस्ता नैसर्गिक अधिकारबाट उनीहरूलाई वञ्चित गर्न नहुने बताए ।

वि.सं. २०७५ सालमा स्थापना भएको सुधार गृह दुई कठ्ठा क्षेत्रफलमा मात्र छ । घरभित्रै गुम्सिएर बस्नुपर्दा धेरैमा स्वास्थ्य समस्या देखिएको बाल संरक्षण अधिकृत सुभद्रा गौतमले बताइन् ।

प्रकाशित : भाद्र २९, २०७९ १९:३३
पूरा पढ्नुहोस्
प्रतिक्रिया
पठाउनुहोस्
×