मलेसियामा मृत्युदण्डबाट जोगिए तेली, १२ वर्ष कैद राख्ने फैसला

क्वालालम्पुरस्थित नेपाली दूतावासका अनुसार अदालतले बिहीबार मलेसियन फौजदारी संहिताको दफा ३०२ बाट दफा ३०४ (क) मा परिवर्तन गरी १२ वर्ष जेल सजाय कायम गरेको हो ।

दुई वर्षअघि सन् २०२० मा इपो उच्च अदालतले ३८ वर्षीय तेलीलाई मृत्युदण्डको फैसला सुनाएको थियो । मृत्युदण्डको फैसला गरेपछि नेपाली दूतावासले पुनरावेदन गरेको थियो । तेलीलाई सन् २०१६ डिसेम्बरमा कर्तव्य ज्यान मुद्दामा पक्राउ गरिएको थियो ।

उनलाई सन् २०१६ डिसेम्बर २ बिहान ४ बजे एक मलेसियन नागरिकको हत्या गरेको अभियोगमा अदालतमा मुद्दा चलेको हो । तेलीले आफूले हत्या नगरी शवलाई व्यवस्थापन गर्न सहयोगमात्रै गरेको दाबी गर्दै आएका छन् ।