लिङ्देनले छाडे सांसद- समाचार - कान्तिपुर समाचार
कान्तिपुर वेबसाईट
AdvertisementAdvertisement

लिङ्देनले छाडे सांसद

कान्तिपुर संवाददाता

काठमाडौँ — प्रतिनिधिसभाको कार्यकाल निर्वाचनभन्दा पछि पनि लैजान खोजेको भन्दै राष्ट्रिय प्रजातन्त्र पार्टीका अध्यक्ष राजेन्द्र लिङ्देनले प्रतिनिधिसभा सदस्यबाट राजीनामाको घोषणा गरेका छन् । संसद् बैठकमा आइतबार विशेष समय लिएर उनले राजीनामाको घोषणा गरेका हुन् ।

लिङ्देनले प्रतिनिधिसभाको बैठक आफ्नो अन्तिम भएकाले रोस्ट्रमबाटै बोल्न दिन आग्रह गरेका थिए । सभामुख अग्निप्रसाद सापकोटाले अनुमति दिएपछि सम्बोधन गर्दै उनले चुनावको घोषणा भएदेखि प्रतिनिधिसभा अन्त्य हुनुपर्ने राप्रपाको धारणा रहेको बताए । ‘प्रजातन्त्रमा विश्वास राख्ने दलहरूले निर्वाचनलाई निष्पक्ष, स्वतन्त्र र धाँधलीरहित बनाउनका लागि सरकारलाई समेत चुनावी सरकारमा परिणत गर्न वा निष्पक्ष सरकार बनाउन उपयुक्त हुन्छ भन्ने राप्रपाको धारणा छ ।’

प्रतिनिधिसभामा एक मात्रै सांसद रहेका राप्रपाका अध्यक्ष लिङ्देनले आफ्नो उपस्थिति वा अनुपस्थितिले संसद्को निर्णय प्रक्रियामा फरक नपर्ने भए पनि कार्यकाल चुनावपछि पनि बढाउने सरकारको पहललाई आफ्नो अन्तरआत्माले स्वीकार गर्न नसकेको बताए । ‘पछिल्ला दिनमा संसद्को आयु मंसिर ४ पछि पनि कायम राख्ने प्रक्रिया प्रारम्भ भएको छ । त्यसले मलाई असाध्यै लज्जित र दुखित तुल्यायो । सडकबाटै सांसद छाडें भनेर भन्नुको अर्थ हँॅदैन । कमसे कम संसद्मा उभिएर सबैलाई सुनाएर जानु उपयुक्त हुन्छ भनेर म आज संसद्मा उपस्थित भएको छु । आजबाट सांसदका रूपमा उपस्थित हुनेछैन,’ लिङ्देनले भने, ‘सम्मानीय सभामुखलाई आग्रह गर्न चाहन्छु, सचिवालयलाई पठाइदिइने तलबभत्तासमेत रोक्का गरियोस् । लेखेर पनि दिन तयार छु । यस प्रकारको अनैतिक काममा सहभागी हुन कम्तीमा पनि मेरो आत्माले मानेन । मेरो अन्तरआत्माको आवाजअनुसार यो सबै चीज त्याग गर्न यहाँ उपस्थित भएको छु ।’

झापा–३ बाट प्रतिनिधिसभा सदस्यमा निर्वाचित भएका लिङ्देन गत मंसिरमा भएको पार्टी महाधिवेशनबाट अध्यक्षमा निर्वाचित भएका हुन् । उनको नेतृत्वमा स्थानीय तह चुनावमा लडेको राप्रपाले अघिका निर्वाचनभन्दा राम्रो नतिजा ल्याएको थियो । तर राप्रपाले स्थानीय तहभन्दा आमनिर्वाचन आफ्नो प्राथमिकतामा रहेको बताउँदै आएको छ । अध्यक्ष लिङ्देनले पाँच वर्षसम्म नीतिगत निर्णयमा आफू उपेक्षित भएको महसुस गरेको बताए । ‘यो कार्यकालमा संसद्मा थुप्रै अनुभव भए । पार्टीको एक्लो सदस्यका रूपमा उपस्थित थिएँ । कतिपय नीतिगत कुरामा आफूलाई उपेक्षा गरेको महसुस भयो । आममाननीय सदस्यहरूबाट जुन प्रकारको सद्भाव र स्नेह प्राप्त गरेको छु, त्यो सधैं सम्झिनेछु,’ उनले भने ।

प्रतिनिधिसभाको कार्यकाल नयाँ निर्वाचित सांसदको पहिलो बैठकसम्म लम्ब्याउने गरी सरकारले विधेयक दर्ता गरेपछि त्यसमा मत विभाजित देखिएको छ । त्रिभुवन विश्वविद्यालयको राजनीतिशास्त्र विभाग प्रमुख प्राध्यापक रामकृष्ण तिवारी प्रतिस्पर्धामा जाँदा आफ्नो पद छाड्नु राम्रो हुने बताए । ‘पदीय जिम्मेवारी मुक्त भएर ताजा जनादेश लिन जानुपर्छ,’ उनले भने, ‘पदमा बसेर चुनावमा जाँदा शक्तिको प्रयोग हुन्छ । स्वतःस्फूर्त रूपमा पद छाडेर जानु राम्रो हो ।’

प्रकाशित : भाद्र २०, २०७९ ०७:२२
प्रतिक्रिया
पठाउनुहोस्

अध्यक्षमा चन्दको उम्मेदवारी

कान्तिपुर संवाददाता

काठमाडौँ — जितेन्द्रबहादुर चन्दले औपचारिक रूपमै नेपाल भलिबल संघको अध्यक्ष पदमा उम्मेदवारी दिने घोषणा गरेका छन् । भलिबल संघको निर्वाचन बुधबार हुँदै छ । १० वर्षदेखि संघमा महासचिव रहँदै आएका चन्द अध्यक्षका प्रत्याशी हुने जनाए पनि आइतबार ठूलो हूलसहित आधिकारिक घोषणा गरेका हुन् । संघकी उपाध्यक्ष निरोज मास्केले गत महिनै उपाध्यक्ष घोषणा गरेकी थिइन् । उनको समूहबाट मनवीर छन्त्याल महासचिवमा उठ्ने पक्का भइसकेको छ । चन्द समूहबाट रोशन श्रेष्ठले महासचिवमा उम्मेदवारी दिने घोषणा गरेका छन् ।

साधारणसभामार्फत हुने निर्वाचनबाट २५ सदस्यीय कार्यसमितिको टुंगो लाग्नेछ । चन्दले अध्यक्षका लागि उम्मेदवारी घोषणा गर्दा कार्यसमितिमा रहेका ३३ मध्ये १७ सदस्य आफूहरूसँग रहेको दाबी गरेका थिए । यसअघि मास्केको घोषणासभामा रहेका राष्ट्रिय पुरुष भलिबल टिमका कप्तान इम राना, न्यु डायमन्ड एकेडेमीका अध्यक्ष कुमार राई, वरिष्ठ प्रशिक्षक सलिना श्रेष्ठ चन्दको घोषणासभामा पनि सहभागी थिए ।

संघका अध्यक्ष मनोरञ्जनरमन शर्माको साथ चन्दको घोषणासभामा नेपाल भलिबल संघका उपाध्यक्षद्वय यामबहादुर गुरुङ, हरकसिंह धामी, पूर्वउपाध्यक्ष बालगोपाल श्रेष्ठ, केन्द्रीय सदस्य इन्दिरा निरौला, पूर्वखेलाडीहरू सशस्त्र प्रहरी बलका पूर्वमहानिरीक्षक दुर्जकुमार राई, पूर्वप्रहरी महानिरीक्षक रमेश खरेल पनि उपस्थित थिए ।

हिजोका दिनका आफू महासचिव हुँदा कतिपय कार्ययोजना सम्पन्न भएका र कतिपय कार्ययोजना सम्पन्न हुन बाँकी रहेको भन्दै उक्त बाँकी कार्ययोजनालाई पूर्णरूपमा कार्यान्वयन गर्नका लागि अध्यक्ष पदमा उम्मेदवारी दिने निधो गरेको चन्दले बताए ।

प्रकाशित : भाद्र २०, २०७९ ०७:१४
पूरा पढ्नुहोस्
प्रतिक्रिया
पठाउनुहोस्
×