जबराले गोलमटोल जवाफ दिए : कांग्रेस सांसद विश्वकर्मा

प्रतिनिधिसभाको महाभियोग सिफारिस समितिको बुधबारको बैठकमा जबराले बयान दिएका थिए । निलम्बित प्रधानन्यायाधीश जबरा र समिति सदस्यहरूबीच साढे ३ घण्टा सवाल-जवाफ भएको थियो । समितिको बैठकपछि कांग्रेस सांसद विश्वकर्माले भने, 'पहिलो दिन भएको र केही प्रश्नहरू अरु प्रश्नमा जोडिएको, उहाँलाई धेरै कुरा भन्न मन लागेर होला लामो-लामो जवाफ दिनुभयो । गोलमटोल जवाफ छन्,' विश्वकर्माले भने, 'यसरी भयो, यस्तो भयो, यो स्वाभाविक भयो भन्ने जवाफ आए ।'

जबराले आफूमाथि महाभियोग लाग्न नहुने बताएका थिए । उनले आफूविरुद्धको महाभियोग प्रस्ताव निष्क्रिय भएको बताएका थिए । सांसदहरूलाई जबराको भूमिका मन नपरेर महाभियोग लागेको जबरालाई आफूविरुद्धको महाभियोग मन नपरेर त्यो निष्क्रिय भएको भनेको मीन विश्वकर्माको भनाइ थियो ।

जबराले सर्वोच्चमा राजनीतिक रूपमा नियुक्त भएका न्यायाधीशका कारण अप्ठ्यारो परेको बताएको विश्वकर्माको भनाइ थियो ।

महाभियोग सिफारिस समितिले बिहीबार ११ बजेदेखि जबरासँग फेरि बयान लिनेछ । जबरालाई सोध्न तयार पारिएका ४३ प्रश्नमध्ये पहिलो दिन ४ वटा प्रश्न मात्रै सोधेर जवाफ लिइएको समिति सचिवालयले जानकारी दिएको छ ।