काठमाडौँ — नेकपा एमालेका महासचिव शंकर पोखरेलले आगामी निर्वाचनमा आफूहरुले केन्द्रबाट गठबन्धन नगर्ने बताएका छन् ।

पार्टी कार्यालय च्यासलमा प्रचार तथा प्रकाशन विभागको पत्रकारसँग अन्तरसंवाद कार्यक्रममा पोखरेलले स्थानीयस्तरमा भने गठबन्धन हुन सक्ने बताए ।

राजनीतिक दलहरुले चुनाव आफ्नो नीतिको आधारमा लडनुपर्ने तर्क गर्दै आफ्नो पार्टी गठबन्धन गरेर निर्वाचनमा जाने पक्षमा नरहेको उनले बताए । ‘आगामी निर्वाचनको लागि गठबन्धनको सन्दर्भमा हाम्रो स्पष्ट नीति छ । हामी कुनै पनि प्रकारको गठबन्धनको पक्षमा छैनौं । हामी आफ्नो नीतिको आधारमा निर्वाचनमा प्रस्तुत हुन गईराखेको छौं,’ उनले भने, ‘स्थानीय तहमा तालमेल हुन सक्छ । तालमेलमा बारेमा हामी सदैव खुला छौं । तर चुनाव आफ्नो नीतिको आधारमा लड्नुपर्छ भन्ने मान्यताको पक्षमा छौं । त्यसकारण कुनै राजनीतिक दलसँग गठबन्धनको कुरा गरेको छैनौं । चुनावी तालमेलको कुरा गरेका छौं ।’

यस्तै पछिल्लो समय नागरिकता विधेयकसँग जोडेर राष्ट्रपतिको राजीनामा भन्दै नभएको हल्ला फिँजाइएको उनले बताए ।