देशलाई संविधान विरोधी तत्त्वबाट बचाउन चुनावी गठबन्धन : मन्त्री चौधरी
बुटवल — सहरी विकासमन्त्री मेटमणि चौधरीले देशलाई संविधान विरोधी तत्वबाट बचाउन मंसिरमा हुने चुनावमा गठबन्धन गरिएको बताएका छन् । चुनावपछि मुलुक स्थायीत्वतर्फ जाने पनि उनले बताए । दलहरु गठबन्धन गरेर चुनाव लडेर जित्ने र मुलकलाई दीगो विकास र स्थायी शान्तिको नयाँ कोर्समा लैजाने उनले बताए ।
रिपोर्टर्स क्लब लुम्बिनी प्रदेश कार्यालय बुटवलले आयोजना गरेको साक्षात्कार कार्यक्रममा बोल्दै मन्त्री चौधरीले मुलुकमा संविधानलाई संस्थागत विकास गर्नको लागि गठबन्धन दलहरुको जित हुनुपर्ने बताएका हुन् ।
‘संविधान विरोधी तत्त्वहरुबाट देश बचाउन, स्थायी शान्ति र संघीयताका लागि हामी गठबन्धन गरेर चुनावमा जान लागेका हौं,’ उनले भने,‘मंसिरको चुनावपछि मुलुक समृद्धिको बाटोमा लाग्ने छ ।’ नेकपा एसका पोलिटब्युरो सदस्य समेत रहेका चौधरीले नेकपा एमालले कानुनी राज्यको धज्जी उडाउँदै संसदीय प्रणालीमा वितृष्णा ल्याउने काम भएकाले बाध्य भएर अन्य दलहरुसँग गठबन्धन गरेको तर्क गरे ।
सहरी विकासमन्त्री चौधरीले सहरी नीति विकास २०६४ पारित गर्ने तयारीमा रहेको बताउँदै नागरिकलाई उपभोक्तामार्फत विकास निर्माणका काममा जोडेर अगाडि लैजाने सरकारको नीति रहेको बताए ।
प्रकाशित : भाद्र ११, २०७९ ११:२९
