कांग्रेस गठबन्धन गर्न बाध्य छ : सचेतक विश्वकर्मा

‘देशभरि कम्युनिस्ट पार्टीहरूप्रति जनमत गिर्दो छ; कांग्रेसको पक्षमा जनलहर बढेको छ । तर, फेरि पनि कांग्रेसले गठबन्धन नगरी एक्लै बहुमत सिट जित्ने अवस्था बनिसकेको छैन,’ सचेतक विश्वकर्माले भने, ‘हामीले गठबन्धन गरेनौँ भने अर्को गठबन्धन बन्छ; त्यस्तो गठबन्धन हाम्रा लागि मात्रै होइन, मुलुकको अहिलेको राजनीतिक व्यवस्था र संविधानमाथि नै खतरनाक हुनसक्छ ।’

नेता विश्वकर्माले नेकपा माओवादी केन्द्रले जुनसुकै बेला जस्तोसुकै गठबन्धन गर्न सक्ने अस्थिर मानसिकता प्रस्तुत गर्दा यसपटक कांग्रेस जसरी पनि गठबन्धन गर्नुपर्ने बाध्यतामा रहेको बताए ।

‘नेपालमा एक मानिस यस्ता छन्, जो एक घण्टामा जस्तोसुकै सम्झौता गरेर पनि गठबन्धन गर्न सक्छन् । एकछिन पनि स्थिर मनस्थिति नभएका नेता संसद्‌मा तेस्रो क्षमतामा छन्; त्यसकारण हामी अहिले गठबन्धन गरेर अघि बढिरहेका छौँ,’ उनले भने, ‘म साक्षी छु । ०७४ को निर्वाचनअघिको सरकारमा अहिलेकै प्रधानमन्त्री हुनुहुन्थ्यो, म मन्त्रीको रुपमा सरकारमै थिएँ । माओवादीले ३० प्रतिशत सिट मागेको थियो, हामीले २५ भनेका थियौँ । तर, संवाद नसकिदै उहाँहरू रातारात बालकोट जानुभयो र मिल्नुभयो । हामी २३ सिटमा खुम्चियौँ ।’