देशभर आइसीयुमा ४६ र भेन्टिलेटरमा २ जना उपचाररत, २४ घण्टामा थपिए ६६० नयाँ संक्रमित - समाचार - कान्तिपुर समाचार
कान्तिपुर वेबसाईट
AdvertisementAdvertisement

देशभर आइसीयुमा ४६ र भेन्टिलेटरमा २ जना उपचाररत, २४ घण्टामा थपिए ६६० नयाँ संक्रमित 

कान्तिपुर संवाददाता

काठमाडौँ — देशभर आइसीयुमा ४६ र भेन्टिलेटरमा २ जना उपचार गराइरहेको स्वास्थ्य तथा जनसंख्या मन्त्रालयले जनाएको छ । संक्रमण बढिरहे पनि अस्पताल भर्ना गराउनेको संख्यामा भने उल्लेख्य वृद्धि भएको देखिँदैन । धेरै संक्रमण देखिएको काठमाडौँ उपत्यकामा शनिबार जेनेरल बेडमा २१, एचडियुमा ४८, आइसीयुमा ३४ र १ जना कोरोना संक्रमितको उपचार भइरहेको छ ।

२४ घण्टामा ४ हजार ६८२ पीसीआर तथा एन्टिजेन परीक्षणमा ६६० जना संक्रमित पुष्टि भएका छन् । डिस्चार्ज हुनेको संख्या ४४४ रहेको छ भने १ जनाको मृत्यु भएको छ । साथै देशभर सक्रिय संक्रमितको संख्या ५ हजार ६४१ रहेको छ ।

५०० भन्दा बढी संक्रमित रहेका जिल्ला काठमाडौँ र ललितपुर रहेका छन् भने २०० भन्दा माथि संक्रमित रहेका जिल्ला कास्कीमात्र रहेको छ । साथै शून्य संक्रमित भएको जिल्ल मनाङ, कालिकोट र हुम्ला रहेको छ ।

काठमाडौँ उपत्यकामा ३ हजार ७८, भक्तपुरमा ८७ र ललितपुरमा ७४७ जना गरी ३ हजार ९१२ सक्रिय संक्रमित रहेका छन् ।

प्रकाशित : श्रावण २१, २०७९ १७:१३
प्रतिक्रिया
पठाउनुहोस्

निर्वाचनमा एकजुट भएर लाग्न कांग्रेस महामन्त्री थापाको निर्देशन

कान्तिपुर संवाददाता

भक्तपुर — नेपाली कांग्रेसका महामन्त्री एवं पूर्वस्वास्थ्य मन्त्री गगन थापाले आसन्न निर्वाचनमा एकजुट भएर लाग्न नेता तथा कार्यकर्तालाई निर्देशन दिएका छन् ।

शनिबार नेपाली कांग्रेसका पूर्वनेता तथा शिक्षासेवी स्व. श्यामबहादुर कार्कीको १५औं स्मृति दिवसमा बालकोटमा आयोजित कार्यक्रममा महामन्त्री थापाले यस्तो बताएका हुन् । यस अवसरमा नेता थापाले आगामी प्रतिनिधिसभा र प्रदेशसभा निर्वाचनमा पार्टी संगठितरुपमा अगाडि बढ्नु आवश्यक रहेको बताए ।

कांग्रेस बहुमतउन्मुख र ठूलो दलका रुपमा रहन्छ भन्ने कुरा स्थानीय तहको निर्वाचनले देखाइसकेको उनको भनाइ थियो ।निर्वाचनमा अरु दलहरूसँग गठबन्धन गरेर गए पनि पार्टीभित्रको एकतालाई बलियो बनाउनुपर्नेमा जोड दिए ।

स्व. कार्कीको स्मृति दिवसको अवसरमा महामन्त्री थापाले कार्कीले शैक्षिक र रानीतिक क्षेत्रमा पुर्‍याएको योगदानको बारेमा चर्चा गरेका थिए ।

कार्यक्रममा नेपाली कांग्रेसका नेता गुरुराज घिमिरेले २०४६ र २०६२/०६३ सालको राजनीतिक परिवर्तनपछि पनि जनताको अवस्थामा अपेक्षाकृत सुधार हुन नसकेको भन्दै दल र दलका नेतामा आमुल सुधार आवश्यक रहेको बताए ।

कार्यक्रममा नेपाली कांग्रेसका केन्द्रीय सदस्यद्वय जीतजंग बस्नेत र रमा पौडेल, पूर्वसांसद लेखनाथ न्यौपाने, वाग्मती प्रदेशका उद्योग राज्यमन्त्री रजनी जोन्छे, कांग्रेस जिल्ला सभापति दुर्लभ थापा, नेता रामप्रसाद दवाडी, सुरेन्द्र केसी, प्रदीप कार्की लगायतले श्यामबहादुर कार्कीको योगदान र संघर्षबारे चर्चा गरेका थिए ।

कार्यक्रममा गणेश आधारभुत विद्यालय बालकोटका ९७ जना बालबालिकालाई झोला एवं स्टेसनरी सामान पनि वितरण गरिएको प्रतिष्ठानका अध्यक्ष विष्णुराज कार्कीले जानकारी दिए । कार्कीको स्मृति दिवसको अवसरमा रक्तदान कार्यक्रम पनि सम्पन्न भएको थियो ।

प्रकाशित : श्रावण २१, २०७९ १६:५५
पूरा पढ्नुहोस्
प्रतिक्रिया
पठाउनुहोस्
x
×