प्रधानन्यायाधीश जबराविरुद्धको महाभियोग प्रतिनिधिसभाको कार्यसूचीमा- समाचार - कान्तिपुर समाचार

प्रधानन्यायाधीश जबराविरुद्धको महाभियोग प्रतिनिधिसभाको कार्यसूचीमा

कान्तिपुर संवाददाता

काठमाडौँ — प्रधानन्यायाधीश चोलेन्द्र शमशेर जबराविरुद्धको महाभियोग प्रस्तावमाथि छलफल हुने भएको छ । प्रतिनिधिसभाको आइतबारका लागि बोलाइएको बैठकमा प्रधानन्यायाधीश जबराविरुद्धको महाभियोग छलफलमाथि छलफल हुने भएको हो । 

प्रधानन्यायाधीश चोलेन्द्र शमशेर जबरा । फाइल तस्बिर ।

संघीय संसद्का महासचिव भरतराज गौतमले आइतबारका लागि जारी गरेको प्रतिनिधिसभाको सम्भावित कार्यसूचीमा महाभियोग प्रस्तावमाथि छलफल हुने उल्लेख छ । शनिबार सार्वजनिक गरिएको प्रतिनिधिसभा बैठकको सम्भावित कार्यसूचीमा भनिएको छ, 'मिति २०७८ फागुन २९ गतेको बैठकमा देवप्रसाद गुरुङले नेपालको संविधानको धारा १०१ को उपधारा २ एवं प्रतिनिधिसभा नियमावली, २०७५ को नियम १६१ को उपनियम १ बमोजिम प्रस्तुत गर्नुभएको प्रधानन्यायाधीश चोलेन्द्र शमशेर जबराविरुद्ध दर्ता भएको महाभियोग प्रस्तावमाथि छलफल हुने ।'

जवराविरुद्ध विभिन्न २१ आरोप लगाएर सत्तारुढ दलहरू कांग्रेस, माओवादी केन्द्र र एकीकृत समाजवादीका सांसदहरूले फागुन १ गते प्रतिनिधिसभामा महाभियोग दर्ता गराएका थिए । महाभियोग दर्ता भएपछि जबरा स्वतः निलम्बनमा परेका थिए ।

प्रतिनिधिसभाले फागुन २२ गते महाभियोग सिफारिस समिति गठन गरेपनि छलफल अगाडि बढ्न सकेको थिएन । महाभियोग सिफारिस समितिमा विष्णु पौडेल, लालबाबु पण्डित, शिवमाया तुम्बाहाम्फे, कृष्णभक्त पोखरेल, मिनबहादुर विक, रामबहादुर विष्ट, यशोदा सुवेदी, रेखा शर्मा, कल्याणी खड्का, एकवाल मियाँ र प्रमोद साह सदस्य छन् ।

महाभियोग लगाएर प्रधानन्यायाधीश जबरालाई निमल्बनमा राखेको भन्दै प्रमुख प्रतिपक्षी एमालेले संसददेखि सार्वजनि स्थलमा विरोध गर्दै आएको थियो । त्यस्तै, नेपाल बार एसोसिएसनले पनि न्यायालयको प्रमुखमाथि महाभियोग लगाएर निलम्बनमा राखेको भन्दै सभामुख अग्निप्रसाद सापकोटालाई भेटेर प्रक्रिया अगाडि बढाउन आग्रह गरेको थियो ।

प्रकाशित : श्रावण २१, २०७९ १२:३१
प्रतिक्रिया
पठाउनुहोस्

‘ग्रिन रिभर, ग्रिन रोड’ अभियान

डीबी बुढा

जुम्ला — जंगल फँडानीका कारण जलवायु परिवर्तनमा ठूलो असर परेको भन्दै हिमा गाउँपालिकाले ‘ग्रिन रिभर, ग्रिन रोड’ अभियान थालेको छ । अभियानअन्तर्गत गाउँपालिकाले पहिलो वर्षमै ५० हजार बिरुवा रोप्ने योजना बनेको छ ।

अभियानअनुसार एक साताभित्र ३२ हजार ६ सय बिरुवा रोपिसकिएको गाउँपालिका अध्यक्ष लक्ष्मणबहादुर शाहीले बताए । उनका अनुसार वार्षिक नीति तथा कार्यक्रममै अभियानलाई समावेश गरी कार्यान्वयनमा लगिएको हो । पहिलो चरणमा सल्लो, देवद्यार, धुपी, ढटेलो, पिपल र किमुका बिरुवा रोपिएको उनले जानकारी दिए । ‘वृक्षरोपणको कामले बाढीपहिरो नियन्त्रण हुने र बढ्दो वातावरण प्रदूषण हट्ने आशा छ,’ उनले भने, ‘सडक, हिमा नदी किनार र नांगा पाखामा बिरुवा रोप्न गरी बजेट विनियोजन गरेका छौं ।’

गाउँपालिकाले पहिलो चरणमा हिमा–१ देवलढुंगा र भित्रिखोलामा मात्र ६ हजार ३ सय बिरुवा रोपेको छ । आचार्यलिहीको भित्रिखोला जलविद्युत् आयोजना भएको क्षेत्रमा ३ हजार ६ सय बिरुवा रोपिएको प्रमुख प्रशासकीय अधिकृत रणबहादुर बुढाले बताए । ‘पाँच वर्षमा हिमा प्राकृतिक रूपमा निकै सुन्दर हुनेछ, हरियाली र मनोरम बन्नेछ,’ उनले भने, ‘डाँडाकाँडा हरियाली भएर जलवायु परिवर्तनका असर न्यूनीकरणमा सहयोग पुग्ने हाम्रो आशा छ ।’

गाउँपालिकाले ओदी क्षेत्रमा २ हजार ५ सय, खलढुंगामा ४ हजार ६ सय र नाग्म–गमगढी सडक आसपासमा २ सय बिरुवा रोपेको छ भने २० हजार बिरुवा वडास्तरमा पठाएको छ । पाँच वर्षको अवधिमा कम्तीमा २ लाख ५० हजार बिरुवा रोप्ने नीति लिइएको गाउँपालिका अध्यक्ष शाहीले बताए ।

‘वातावरण र प्रकृति राम्रो भए मानिसको जीवन पनि सुखी हुन्छ, वातावरण हराभरा भए मानव समाज पनि हराभरा हुन्छ,’ उनले भने, ‘राराताल जाने पर्यटक ओहोरदोहार गरिरहने बाटो भएकाले पनि हराभरा हिमा बनाउन थालिएको हो ।’ उनले स्थानीयकै सहभागितामा बिरुवा रोप्ने र हरेक बिरुवा हुर्काउन सचेतना अभियान सञ्चालन गर्ने बताए ।

प्रकाशित : श्रावण २१, २०७९ १२:१९
पूरा पढ्नुहोस्
प्रतिक्रिया
पठाउनुहोस्
x
×