नुवाकोटको बेल्कोटगढी केन्द्रविन्दु भएर ५.३ म्याग्निच्युडको भूकम्प- समाचार - कान्तिपुर समाचार

नुवाकोटको बेल्कोटगढी केन्द्रविन्दु भएर ५.३ म्याग्निच्युडको भूकम्प

कान्तिपुर संवाददाता

काठमाडौँ — शनिबार बिहान ५ बजेर २६ मिनेटमा भूकम्पको धक्का महसुस गरिएको छ । राष्ट्रिय भूकम्प मापन तथा अनुसन्धान केन्द्रका अनुसार नुवाकोटको बेल्कोटगढीलाई केन्द्रविन्दु बनाएर ५.३ म्याग्निच्युडको भूकम्प गएको हो ।

भूकम्पको धक्का नुवाकोटसहित धादिङ र उपत्यकाका विभिन्न जिल्लामा महसुस गरिएको थियो। यसअघि गत साउन १५ गते खोटाङको मार्तिमबिर्तालाई केन्द्रविन्दु बनाएर ६ रेक्टर स्केलको भूकम्प गएको थियो ।

त्यस्तै गत साउन ९ गते सिन्धुपाल्चोकको हेलम्बु फुट ट्रेल नजिकै ६ बजेर ७ मिनेटमा ४.७ म्याग्निच्युडको भूकम्प गएको थियो । विज्ञहरूका अनुसार ०७२ सालकै विनाशकारी भूकम्पका पराकम्प जाँदा बारम्बार स–साना भूकम्प मापन भइरहने केन्द्रले जनाएको छ ।

प्रकाशित : श्रावण २१, २०७९ ०५:५३
प्रतिक्रिया
पठाउनुहोस्

स्क्वासमा कृष्णा र विपना भिड्ने

कान्तिपुर संवाददाता

काठमाडौँ — कृष्णा थापा र विपना ब्लोनबीच चौथो धनलक्ष्मी महर्जन मेमोरियल राष्ट्रिय स्क्वास प्रतियोगिताको महिला खुलातर्फ फाइनलमा प्रतिस्पर्धा हुने भएको छ । सातदोबाटोस्थित स्क्वास एकेडेमीमा शुक्रबार कृष्णाले भावना सुनुवारलाई ११–८, ११–४, ११–४ ले हराइन् । विपनाले स्वस्थानी श्रेष्ठविरुद्ध कडा प्रतिस्पर्धामा ११–९, ११–९, १३–११ को सेटमा जित पाइन् ।

पुरुष खुलातर्फ अरहन्तकेशर सिंहले अमिर ब्लोनलाई ११–५, ११–२, ११–६ को सोझो सेटमा हराए । अमृत थापामगरले दीपक थापालाई पनि ३–० ले हराएर फाइनल तय गरे ।

भेट्रान ५० वर्षमाथि सेमिफाइनलमा प्रज्वलप्रकाश प्रधानले धीरबहादुर पुनलाई ३–१ र सुदीपबहादुर सिंहले दिलीप अधिकारीलाई ३–० सेटले हराए ।

जुयिनर ब्वाइजतर्फ विकास मगरले पासाङ लामालाई ११–६, १०–१२, ११–७, ११–९ ले र गोपाल थापाले सलिम थापामगरलाई ११–६, ११–५, ११–६ ले हराएर फाइनल पक्का गरे ।

सबैको फाइनल शनिबार नवनिर्मित सेन्टर कोर्टमा हुनेछ । प्लेटको फाइनलमा राजकृष्ण महर्जन र प्रयाग जोशीबीच प्रतिस्पर्धा हुनेछ ।

प्रकाशित : श्रावण २०, २०७९ २३:००
पूरा पढ्नुहोस्
प्रतिक्रिया
पठाउनुहोस्
x
×