हामी एक चीन नीतिमा विश्वास गर्छौं : अध्यक्ष ओली- समाचार - कान्तिपुर समाचार

हामी एक चीन नीतिमा विश्वास गर्छौं : अध्यक्ष ओली

कान्तिपुर संवाददाता

काठमाडौँ — नेकपा (एमाले) अध्यक्ष तथा पूर्वप्रधानमन्त्री केपी शर्मा ओलीले आफ्नो पार्टीले एक चीन नीतिमा विश्वास गर्ने बताएका छन् । एमालेको केन्द्रीय प्रचार तथा प्रकाशन विभागले आयोजना गरेको कार्यक्रममा अन्तर्राष्ट्रिय मामिलामा कलम चलाउने पत्रकारसँग अन्तरक्रिया गर्दै बिहीबार ओलीले अरुजस्तो बाहिर-बाहिर एक चीन नीति भन्ने र भित्र-भित्रै फरक काम गर्ने नभएको बताएका हुन् ।

अमेरिकी सभामुख नान्सी पेलोसीले दुई दिनअघि ताइवान भ्रमण गरेको प्रसंगमाथि टिप्पणी गर्दै ओलीले छिमेकीहरूसँग भरपर्दो छिमेकीपनको भूमिका निभाउने बताए ।

‘संसारको कुनै पनि देशको संवेदनशीलता हुने भएकाले कसैको पनि आन्तरिक मामिलालाई हस्तक्षेप गर्नु हुँदैन । कसैको पनि शान्ति खल्बल्याउने खालको काम गर्नु हुँदैन,’ उनले भने,‘तिब्बतमा हाम्रो प्रस्ट धारणा छ; यसमा हाम्रो धारणा तलमाथि हुँदैन । ठूला शक्तिहरू र अन्तर्राष्ट्रिय शक्तिहरू के गर्छन् आ-आफ्नो स्थानमा छ तर हामी हाम्रो भूमि अरू कसैको विरूद्ध प्रयोग हुन दिन्नौं ।’ ओलीले दुई देश (अमेरिका र चीन) बीच टिप्पणी गर्न उचित नहुने बताए । भविष्यमा पनि शान्ति खलबल्याउने काम नहोस् भन्ने आफ्नो चाहना गरेको प्रस्ट पारे ।

‘हामी अर्काको राष्ट्रिय हितविरूद्ध पनि लाग्दैनौं र हाम्रो राष्ट्रियहितमा पनि अरूलाई हस्तक्षेप गर्न दिँदैनौं,’ उनले भने, ‘तर, यो गठबन्धन सरकार भूराजनीतिक विषयमा केही मोडिए काम गरेको छ ।’

ओलीले नेपाललाई चलाउनका लागि भारत, चीन र अमेरिकाले व्यवस्था गर्ने भन्ने गलत भएको बताए । ‘भारत, चीन र अमेरिकालाई यहाँका मान्छेहरूले व्यवस्थापन गर्न आफूले खोजी-खोजी निम्त्याए,’ उनले भने, ‘मातृका कोइरालाले नेपालमा २६ वटा भारतीय सुरक्षा पोस्ट मागेर ल्याए । पछि कृतिनिधि विष्टले त्यसलाई हटाउन भनेर हटाइयो । त्यसमा भारतका तत्कालीन प्रधानमन्त्री नेहरुभन्दा पनि हाम्रो नेताको कमजोरी देखियो ।’

प्रकाशित : श्रावण १९, २०७९ १८:४५
प्रतिक्रिया
पठाउनुहोस्

चिनियाँ नागरिकसहित दुई जनालाई अपहरण गरी १ करोड फिरौती मागेको आरोपमा ६ पक्राउ

कान्तिपुर संवाददाता

काठमाडौँ — चिनियाँ नागरिकसहित दुई जनालाई अपहरण गरी १ करोड रुपैयाँ फिरौती माग्ने ६ जनालाई प्रहरीले पक्राउ गरेको छ । पक्राउ पर्नेमा गोरखा आरुघाट गाउँपालिका ७ का ३७ वर्षीय कर्णबहादुर गुरुङ, सिरानचोक गाउँपालिका ५ का २८ वर्षीय लक्ष्मण गुरुङ, सर्लाही लालबन्दी नगरपालिका ११ का २९ वर्षीय रोहित मगर, प्यूठान प्यूठान नगरपालिका ८ का २८ विशाल मगर छन् ।

त्यस्तै नुवाकोट शिवपुरी गाउँपालिका ६ का २७ वर्षीय विनोद केसी र बर्दिया राजापुर नगरपालिका १० का २८ वर्षीय शिव सुनारलाई पनि अपहरणमा संलग्न रहेको आरोपमा प्रहरीले पक्राउ गरेको छ ।

बुधबार साँझ काठमाडौं महानगर २६ कपुरधाराबाट ओखलढुङ्गा, चिशखुगढी गाउँपालिका ५ चिसापानी घरभई वनस्थली बस्ने २६ वर्षीय सूर्यबहादुर राई र चिनियाँ नागरिक काठमाडौं २ लाजिम्पाट बस्ने याङ याङलाई अपहरण गरी होटलमा लगेर १ करोड रुपैयाँ फिरौती मागेको आरोप उनीहरुमाथि लागेको छ ।

प्रहरीको संयुक्त टोलीले अपहरणमा परेका दुवै जनालाई काठमाडौं २६ नयाँबसपार्कस्थित न्यू स्वर्गद्वारी प्यूठान होटल एण्ड लजबाट बुधबार राति ११:४० मा उद्धार गरेको काठमाडौं प्रहरी प्रवक्ता एसपी दिनेशराज मैनालीले बताए । प्रहरीले उनीहरुको साथबाट ८ लाख १४ हजार ९०० रुपैयाँ, मोबाइल सेट २६ थान, हत्कडी १ थान बरामद गरेको छ ।

पक्राउ परेकाहरुविरुद्ध मुलुकी अपराध संहिता ऐन, २०७४ को परिच्छेद–१७ को अपहरण वा शरीर बन्धकसम्बन्धी कसूरमा काठमाडौं जिल्ला अदालतबाट पाँच दिनको म्याद लिई अनुसन्धानका लागि प्रहरी परिसर काठमाडौंमा राखिएको एसपी मैनालीले बताए ।

प्रकाशित : श्रावण १९, २०७९ १८:३६
पूरा पढ्नुहोस्
प्रतिक्रिया
पठाउनुहोस्
×