कोसी र नारायणी आसपासको तटीय क्षेत्रमा उच्च सतर्कता अपनाउन आग्रह- समाचार - कान्तिपुर समाचार

कोसी र नारायणी आसपासको तटीय क्षेत्रमा उच्च सतर्कता अपनाउन आग्रह

कान्तिपुर संवाददाता

काठमाडौँ — बाढी पुर्वानुमान महाशाखाले बिहीबार र शुक्रबार कोसी र नारायणी आसपासको तटीय क्षेत्रमा सतर्कता अपनाउन आग्रह गरेको छ ।

बिहीबार र शुक्रबार कोसी र नारायणी नदीको जलसतह केही घट्ने रहेतापनि सतर्कता तह आसपास नै रहने पूर्वानुमान रहेकाले तटीय क्षेत्रमा उच्च सतर्कता अपनाउन आग्रह गरिएको महाशाखाले जनाएको छ ।

महाशाखाका अनुसार केही स-साना नदीहरुमा बहाव बढ्ने र केहीमा आकस्मिक बहाव समेत हुन सक्ने पूर्वानुमान छ ।

दुई महिनायता पश्चिम धार कटान गर्दै आएको सप्तकोसीको बाढी बुधबार उदयपुरको बेलका नगरपालिका–८ डुम्रिबोटेबाट तल्लो तटीय क्षेत्र पसेको छ । पहाडी क्षेत्रमा लगातारको वर्षासँगै कोसीमा आएको बाढीले कटान तीव्र भइरहेको हो । डुम्रिबोटेमा झन्डै ३ सय मिटर जमिन कटान गरी कोसी बस्ती पसेको छ । नगरपालिकाको १, २, ३, ८ र ९ तथा सुनसरी बराह क्षेत्रका ६ र ९ वडाका धौरीटापु, श्रीलंका टापु, भागलपुर, करैया, तपेश्वरीलगायत बस्ती जोखिममा परेका छन् ।

यस्तै, सप्तकोसीको बाढीले बुधबार हनुमाननगर कंकालिनी नगरपालिका–१३ स्थित गोबरगाढा बस्ती कटान गरेको छ । बाढीले कोसीको मध्य भागमा रहेको यो बस्ती बर्सेनि डुबानमा पर्दै आएको छ ।

प्रकाशित : श्रावण १९, २०७९ ०८:३८
प्रतिक्रिया
पठाउनुहोस्

ज्यानै जाने डर

कान्तिपुर संवाददाता

लमजुङ — बेंसीसहरबाट पोखरा जाँदै गरेको जिप सोमबार राती उदिपुरको पहिरोले पुर्‍यो । साताअघि बेंसीसहरबाट वीरगन्ज जाँदै गरेको बस पनि उदिपुर पहिरोमै फस्यो । सोही दिन आसपास बेंसीसहरतर्फ आउँदै गरेको ट्रक घुम्तीमा टर्निङ नपुग्दा दुर्घटना भयो । 

लमजुङ सदरमुकाम बेंसीसहर आउने एकमात्र डुम्रे–बेंसीसहर सडक उदिपुरमा बाढीपहिरोले दिनदिनै बन्द हुने गरेको छ । काठमाडौं–बेंसीसहर माइक्रोबस चालक टसबहादुर गुरुङ यो बाटो हिँड्दा ज्यानकै डर हुने बताउँछन् । ट्राफिक प्रहरी सई विष्णुबहादुर नेपालीका अनुसार उदिपुरको डाइभर्सन सडक निकै जोखिमपूर्ण छ । यसको वैकल्पिक सडक नहुँदा जोखिममा यात्रा गरिरहेका छन् । ‘अन्यत्र बाटो छैन, पहिरोले दिनदिनै बन्द गराउँछ । बाढीपहिरोले बगाउला कि भन्ने डर,’ उनले भने ।

गत भदौ ११ मा बेंसीसहर–१ उदिपुरको देउराली डाँडामा पहिरोले सडक बगायो । त्यसपछि खोलेको नयाँ ट्र्याक पनि गत असार ४ मा बगायो । नयाँ ट्र्याक नै खोल्न नमिल्ने गरी सडक बगाएपछि ३ दिन लगाएर डाइभर्सन बनाइयो । त्यही डाइभर्सनमा पनि माथिबाट पहिरोले बगाउने र पुर्ने गरेपछि दैनिक बन्द हुने र खुलाउने गरिएको डीएसपी कृष्णबहादुर कार्की बताउँछन् ।

डुम्रे–बेंसीसहर–चामे सडक योजना प्रमुख इन्जिनियर अच्युतविलास पन्तका अनुसार उदिपुर सडकको विकल्प खोजिए पनि गाह्रो परिरहेको छ । ‘पोहोर पहिरो गएपछि हामीले केही माथिल्लो भागबाट डिजाइन गर्‍यौं । सडक बनाउने भनिएकै ठाउँलाई पहिरोले लग्यो,’ उनले भने । प्रमुख जिल्ला अधिकारी सुशील वैद्यले विकल्पमा मध्यमर्स्याङ्दीको ड्यामको पुल प्रयोगका लागि जलस्रोत मन्त्रालय, विद्युत् प्राधिकरणमा पत्राचार गरिएको बताए ।

प्रकाशित : श्रावण १९, २०७९ ०८:३२
पूरा पढ्नुहोस्
प्रतिक्रिया
पठाउनुहोस्
×