नेपालको जलस्रोतमाथि विदेशी अधिपत्य निम्त्याउने मात्रिकाप्रसाद हुन् : केपी ओली
काठमाडौँ — नेकपा एमालेका अध्यक्ष केपी ओलीले नेपाली कांग्रेसले देशद्रोही पार्टी भएको आरोप लगाएका छन् । मात्रिकाप्रसाद कोइरालाको नेतृत्वको सरकारले भारतीय फौज झिकाएर सहिद भीमदत्त पन्तको हत्या गरेको उनको आरोप छ।
नेपाली कांग्रेसका तत्कालीन नेता मात्रिका प्रसाद कोइरालाको सरकारले २०१० साल साउनमा भीमदत्तको हत्या गरेको उनको आरोप थियो । यस्तै उक्त सरकारले नेपालको जदस्रोतमाथि विदेशीको अधिपत्य जमाउने कामको सुरु पनि मात्रिका सरकारले नै सुरु गरेको उनको आरोप थियो ।
यस्तै कांग्रेस सरकारले नेपाली कम्युनिस्टमाथि ४ वर्षसम्म प्रतिबन्ध लगाएको भन्दै त्यसप्रति रोष प्रकट गरेका थिए । नेता ओलीले नेपाली कांग्रेस प्रजातान्त्रिक पार्टी नभएको पनि दाबी गरेका थिए । 'कांग्रेसलाई किन प्रजातान्त्रिक भनिएको हो म बुझ्दिन । उसको नाम पनि प्रजातान्त्रिक छैन । विचार पनि छैन । जनपक्षीय पनि छैन,' अध्यक्ष ओलीले भने ।
यस्तै मात्रिकाप्रसाद कोइरालाको तत्कालीन सरकारले उत्तरी छिमेकी देशको सिमानामा दक्षिणी छिमेकीको फौज लगेर राखेको भन्दै असन्तुष्टि व्यक्त गरेका थिए । यस क्रममा उनले मात्रिकाप्रसाद कोइरालाले गरेका कुकर्म इतिहासले कहिल्यै बिर्सन नसक्ने बताए ।
'यस्ता कुकर्म कांग्रेसले सजिलै गर्छ। उनलाई लाज शरम नै छैन,' अध्यक्ष ओलीले भने । कांग्रेसले विगतदेखि नै देशभक्तमाथि दमन गर्दै आएको उनको भनाइ थियो ।
प्रकाशित : श्रावण १७, २०७९ १६:५४
