१४ हेलिकप्टरको पार्किङ काठमाडौंबाहिर

‘वायुसेवा संचालक संघमा आबद्ध व्यवसायीहरुले सुझाएअनुसार, मोफसलमा पूर्वाधार र सुरक्षा भएका कुनै पनि विमानस्थलमा रहन सक्ने गरी १४ वटा हेलिकप्टरको अपरेसन बेस सार्ने निर्णय गरिएको छ,’ विमानस्थलका प्रवक्ता टेकनाथ सिटौलाले कान्तिपुरसँग भने, ‘अहिले पहिले जस्तो कलसाइन नै तोकिएको छैन । कम्पनीहरुलाई कति संख्यामा काठमाडौं रहने, कति बाहिर रहने नम्बरमात्रै तोकिदिएका छौं ।’

नयाँ निर्णयअनुसार एयर डाइनास्टी हेलि सर्भिसका ४ मध्ये १, फिस्टेल एयरका ३ मध्ये १, माउन्टेन हेलिकप्टरका २ मध्ये १, प्रभु हेलिकप्टरका ६ मध्ये ४, श्री एयरलायन्सका ८ मध्ये ५ र सिम्रिक एयरका ५ मध्ये २ गरी १४ वटा हेलिकप्टरले अब काठमाडौं बाहिरै नाइट स्टप (रात्रिबिसान) गर्नुपर्ने छ । एकमात्रै हेलिकप्टर भएको मुस्ताङ हेलिकप्टर, दुइटा हेलिकप्टर भएका अल्टीच्युड एयर, हेलि एभरेष्ट र मनाङ एयर तथा ३ वटा हेलिकप्टर भएको कैलाश हेलिकप्टर गरी ५ वटा कम्पनीलाई प्राधिकरणले काठमाडौं विमानस्थल नै बेस (पार्किङ) दिएको छ ।

यसअघि काठमाडौं बाहिर पोखरामै बेस अनुमति पाएको प्रभु र नेपालगन्जमा बेस अनुमति पाएको सिम्रिकले यस पटकको निर्णयबाट काठमाडौंमा छिर्ने मौका पाएका छन् । यसअघि काठमाडौंमै पार्किङको अनुमति पाएको माउन्टेन हेलिकप्टरको एउटा हेलिकप्टरलाई बाहिर जान काठमाडौं विमानस्थलले पत्राचार गरेको छ । हेलिकप्टर तथा फिक्स्ड–विङ (जहाज) हरुको छाता संगठनको सदस्यता त्यागेको माउन्टेन हेलिकप्टर कम्पनीले छलफलमा नबोलाई पूर्वाग्रह भई आफ्नो बेस बदलीदिएको प्रतिक्रिया जनाएको छ । ‘हामीले बैठक बसेको जानकारी पनि पाएनौं,’ माउन्टेनका महाप्रबन्धक दिलबहादुर ओलीले भने, ‘दुइटा हेलिकप्टर भएका कम्पनीहरुमा ४ कम्पनीमध्ये हामीलाई मात्रै पूर्वाग्रही ढंगले काठमाडौं बाहिर हेलिकप्टर सार्न पत्र पठाइएको छ । काठमाडौं बाहिर भनेको कता हो तोकिएको छैन । अब भक्तपुरतिर घरेडी किनेर एउटा हेलिकप्टर सार्नुपर्ला !’

पार्किङ अभावका कारण उडान सुरक्षामा बाधा पुग्न थालेपछि असार पहिलो साता पर्यटन मन्त्रालयले जहाज र हेलिकप्टरलाई अनुमति लिएका विमानस्थलमा स्थानान्तरण गराउन प्राधिकरणलाई निर्देशन दिएको थियो । उक्त निर्देशनपछि काठमाडौं विमानस्थलको आन्तरिक पार्किङमा १७ वटामात्रै जहाज र हेलिकप्टर पार्किङमा २४ वटामात्रै राख्न सकिने जनाउँदै बाँकी वायुयानलाई काठमाडौं बाहिर सार्ने निर्णय गरेको थियो ।

नेपालको आन्तरिक उडानमा नौ वटा व्यावसायिक उडान गर्ने वायुसेवाका ५२ वटा विमान तथा चार्टर तथा उद्धार सेवामा ११ वटा हेलिकप्टर कम्पनीका ३८ वटा हेलिकप्टर दर्ता छन् ।