कांग्रेस पदाधिकारी सभापतिसँग छलफलका लागि बालुवाटारमा
काठमाडौँ — नेपाली कांग्रेसका पदाधिकारीहरु पार्टी कार्यालयमा बैठक सकिएपछि प्रधानमन्त्री निवास बालुवाटारतर्फ लागेका छन् । आइतबार दिउँसो सभापति शेरबहादुर देउवाबाहेकका कांग्रेस पदाधिकारी बैठक केन्द्रीय कार्यालय सानेपामा बसेको हो । बैठकमा पार्टीको भ्रातृ तथा शुभेच्छुक विधान र स्वीकृति विषयमा छलफल भएको सहमहामन्त्री जीवन परियारले जानकारी दिए ।
प्रधानमन्त्रीसमेत रहेका सभापति देउवासहितको बालुवाटारमा बस्ने बैठकले सोमबारको केन्द्रीय कार्यसमिति बैठकको एजेन्डामाथि छलफल गर्ने जनाइएको छ । केन्द्रीय कार्यसमिति बैठक सोमबार दिउँसो १ बजेका लागि सानेपामा बोलाइएको छ । स्थानीय तह निर्वाचन समीक्षा, आगामी निर्वाचनबारे सभापति देउवासँग पदाधिकारीले छलफल गर्नेछन् ।
पार्टी प्रवक्ता प्रकाशशरण महतले सोमबारको बैठकमा स्थानीय तह निर्वाचन परिणामबारे केन्द्रीय सदस्यहरुले धारणा राख्ने र ती धारणाको आधारमा आगामी निर्वाचनमा गठबन्धन गर्ने वा नगर्ने विषयमा पार्टीले टुंगो लगाउने बताए ।
प्रकाशित : असार २६, २०७९ १६:५१