कान्तिपुर हिसान शैक्षिक मेलामा २ लाख सहभागी- समाचार - कान्तिपुर समाचार

कान्तिपुर हिसान शैक्षिक मेलामा २ लाख सहभागी

कान्तिपुर संवाददाता

काठमाडौँ — ‘उत्कृष्ट शिक्षा नेपालमै’ नारा दिएर आयोजित ४ दिने कान्तिपुर हिसान बृहत् शैक्षिक मेला (एडुफेयर) सोमबार सकिएको छ । मेलाको अन्तिम दिन ७५ हजार जना विद्यार्थी अभिभावकले मेलाको अवलोकन गरेका छन् ।

काठमाडौंको भृकुटीमण्डपस्थित प्रर्दशनी हलमा जारी मेलामा २ लाख जना सहभागी भएको संयोजक युवराज शर्माले जानकारी दिए । सोमबार पनि बिहानदेखि साँझसम्म विद्यार्थी, अभिभावकको भीडभाड भएको थियो ।

एसईई उत्तीर्णपछि कक्षा ११ मा भर्ना हुने विद्यार्थीलाई लक्षित गरी एडुफेयर सञ्चालन गरिएको हो । गत असार १० गते शनिबार प्रधानमन्त्री तथा मन्त्रिपरिषद् कार्यालयका राज्यमन्त्री उमेश श्रेष्ठले मेलाको समुद्घाटन गरेका थिए । उनले सरकार र निजी क्षेत्रले लगानी वृद्धि गर्न सके नेपाललाई शैक्षिक हबका रूपमा विकास गर्न सकिने बताएका थिए । त्यस्तै राष्ट्रिय परीक्षा बोर्डका अध्यक्ष महाश्रम शर्माले शैक्षिक मेलाले विद्यार्थीलाई स्वेदशी शिक्षणसंस्थामा अध्ययन गर्न प्रोत्साहन गर्ने बताएका थिए ।

उच्च शिक्षालय तथा माध्यमिक विद्यालय संघ नेपाल (हिसान) र कान्तिपुर पब्लिकेसन्सले संयुक्त रूपमा सातौं मेलाको आयोजना गरेका हुन् । कोभिडपछि पहिलो पटक आयोजित मेलामा उत्साहजनक सहभागिता पाइएको आयोजकले जनाएको छ । नेपालमै सञ्चालित शिक्षालयहरूले दिने गुणस्तरीय तथा उत्कृष्ट शिक्षाका बारेमा सत्यतथ्य र यथार्थ जानकारी गराउन एडुफेयर आयोजना गरिएको हो । मेलामा १ हजारभन्दा बढी विद्यार्थीको लागि पूर्ण तथा आंशिक छात्रवृत्तिको समेत व्यवस्था गरिएको छ ।

अवलोकनमा सहभागी विद्यार्थी अभिभावकले शैक्षिक सूचना प्राप्त गर्न मेला फलदायी रहेको बताएका छन् । मेलामा ७४ वटा शिक्षणसंस्थाको स्टल रहेको थियो । स्टलबाट विज्ञ, शिक्षक, शिक्षणसंस्था सञ्चालक, विद्यार्थीले अभिभावक र विद्यार्थीलाई काउन्सिलिङ गरेका थिए ।

विद्यार्थी, अभिभावक तथा सरोकारवालालाई शिक्षणसंस्था, विषय, पठनपाठन पद्धति छनोट, भर्ना मापदण्डलगायतका विषयमा जानकारी दिइएको थियो । मेलामा विद्यालय तहदेखि विभिन्न विश्वविद्यालयका सम्बन्धन र प्राविधिक तथा व्यावसायिक शिक्षा दिने शिक्षण संस्थाका बारेमा जानकारी दिइएको थियो ।

मेलाको प्रत्यक्ष अवलोकन गर्न नसक्ने विशेष गरी काठमाडौंबाहिरका विद्यार्थी अभिभावकलाई लक्षित गरी अनलाइन सुविधा उपलब्ध गराइएको थियो । कक्षा १२ को परीक्षा दिएका विद्यार्थीका लागि छिट्टै उच्चशिक्षा मेला आयोजना गरिने हिसानले जनाएको छ ।

प्रकाशित : असार १३, २०७९ १८:५८
प्रतिक्रिया
पठाउनुहोस्

६ ठाउँमा सशस्त्रको गोताखोर टोली तैनाथ

कान्तिपुर संवाददाता

काठमाडौँ — मनसुनजन्य बाढी र डुवानमा परेकालाई उद्धार तथा वेपत्ताको खोजी गर्न सशस्त्र प्रहरी बल (एपीएफ) मूख्यालयले देशका ६ ठाउँमा गोताखोर टोली तैनाथ गरेको छ ।

बाढी र डुवानको उच्च जोखिममा रहेका क्षेत्रलाई लक्षित गरी सशस्त्र प्रहरीका ६ वटा युनिटमा २४ सै घण्टा तैनाथ रहने गरी गोताखोर टोली तैनाथ गरिएको हो ।

सशस्त्र प्रहरीका अनुसार गोताखोर तालीमप्राप्त ५६ जनालाई सुनसरीको पोकलीस्थित बराह बाहिनी, चितवनको कुरिनटारस्थित सशस्त्र प्रहरी विपत व्यवस्थापन शिक्षालय, काठमाडौंको सिनामंगलस्थित विपद व्यवस्थापन गण, कास्कीको पोखरा, बाँकेको शमशेर गञ्ज र कैलाली गरी सशस्त्र प्रहरीका ६ युनिटमा गोताखोर टोलीलाई तयारी अवस्थामा राखिएको हो ।

कुरिनटारमा १० जना र बाकी सबै अन्य ५ ठाउँमा तैनाथ गरिएको सशस्त्रले जनाएको छ । सशस्त्रले डुवानमा परेकाको १ सय २० फिट तल पुगेर उद्धार तथा वेपत्ताको खोजी गर्न सक्ने गरी गोताखोर जनशक्ति तयार पारेको छ । विपद व्यवस्थापनकै लागि अहिलेसम्म २ हजार ३४ जनशक्ति तयारी हालतमा राखिएको सशस्त्रले जनाएको छ ।

यस बाहेक विपद प्रतिकार्य योजना अन्तर्गत हिमाली ११ जिल्लाका १३ ठाउँका सशस्त्र प्रहरी युनिटमा पनि विपद उद्धार उपकरण पठाइएको, २६ जिल्लाका ३४ युनिटमा ५५ वटा ‘रेस्क्यु बोट’ र १० जिल्लामा १६ वटा मोटरबोट तयारी अवस्थामा राखिएको छ ।

हरेक वर्ष वर्खायाममा हिमाल र पहाडमा पहिरो तथा उपत्यका र तराइमा बाढी र डुवानले जनधनको क्षति हुने गरेको छ । तर, मनसुन सुरु हुनुअघि नै जनधनको क्षति न्यूनीकरण हुने गरी प्रभावकारी प्रतिकार्य योजना बनेको पाइँदैन । जेठ ३१ मा गृहमन्त्री वालकृष्ण खाँणको अध्यक्षतामा बसेको विपद जोखिम न्यूनीकरण तथा व्यवस्थापन कार्यकारी समिति बैठकले आगामी मनसुनजन्य प्रतिकार्य योजना पारित गरेको थियो । मनसुनजन्य प्राकेपबाट यो वर्ष १९ लाख ९९ हजार ८ सय ७५ जनसंख्या र ४ लाख २१ हजार ४७ घरधुरी प्रभावित हुने विपद जोखिम न्यूनीकरण तथा व्यवस्थापन प्राधिकरणको प्रक्षेपण छ । विपदबाट प्रदेश १, मधेसप्रदेश, वाग्मती र लुम्बिनी बढी प्रभावित हुने प्रक्षेपण गरिएको छ ।

गृह मन्त्रालयका अनुसार मनसुनजन्य विपद्बाट वि सं २०६८ वैशाख १ देखि २०७८ चैत ३१ सम्म ५ हजार ८ सय २५ घटनामा २ हजार ३ सय ६२ को ज्यान गएको छ । ८ सय ८० अझै वेपत्ता छन् ।

१० वर्षको यो अवधिमा १ हजार ६ सय ४६ जना घाइते, ७८ हजार ८ सय ११ परिवार प्रकोपबाट प्रभावित र ६१ हजार ४ सय ३२ घरमा क्षति भएको अभिलेख छ । यो अवधिमा बाढी र डुबानबाट मात्रै ८ सय ५७, पहिरोबाट १ हजार ३ सय ८७ र भारी वर्षाका कारण १ सय १८ जनाको ज्यान गएको गृह मन्त्रालयको अभिलेखमा उल्लेख छ ।

यसैगरी यो अवधिमा बाढीबाट १६ अर्ब ८० करोड ७३ लाख ६० हजार, पहिरोबाट १ अर्ब ७५ करोड २६ लाख ५० हजार र भारी वर्षाबाट ५२ करोड ३७ लाख ८६ हजार बढी धनमाल क्षति भएको छ ।

२०७७ वैशाख १ देखि २०७८ चैत मसान्तसम्म प्राकृतिक प्रकोपबाट २ सय ५८ जनाको ज्यान गएको थियो । ६५ जना वेपत्ता र १ सय ९२ जना घाइते भएका थिए । १ वर्षको यो अवधिमा १ हजार ६ सय ५२ घरमा क्षति पुगेको थियो । ६ सय ७८ खानेपानी संरचना, ५२ वटा जलविद्युत्, ४५ पक्की पुल, ३ वटा बेलिब्रिज, ८७ वटा झोलुंगे पुल, ५८ वटा सरकारी भवन र ९३ शिक्षण संस्थाका भवनमा क्षति पुगेको थियो ।

प्रकाशित : असार १३, २०७९ १८:५७
पूरा पढ्नुहोस्
प्रतिक्रिया
पठाउनुहोस्
x
×