सांसदको गणपूरक संख्या नपुग्दा प्रतिनिधिसभा बैठक आधा घण्टाका लागि स्थगित- समाचार - कान्तिपुर समाचार
कान्तिपुर वेबसाईट
AdvertisementAdvertisement

सांसदको गणपूरक संख्या नपुग्दा प्रतिनिधिसभा बैठक आधा घण्टाका लागि स्थगित

कान्तिपुर संवाददाता

काठमाडौँ — प्रतिनिधिसभाको बैठकमा सांसदहरू अनुपस्थित हुँदा कारबाही स्थगित गरिएको छ । प्रतिनिधिसभाको आइतबारको बैठकमा सभामुख अग्निप्रसाद सापकोटाले नीति अनुसन्धान प्रतिष्ठान विधेयक निर्णयार्थ प्रस्तुत गर्दा संसद्मा गणपूरक संख्या उपस्थित थिएनन् । 

नीति अनुसन्धान प्रतिष्ठान विधेयकमाथि विचार गरियोस् भन्ने प्रस्ताव सभामुखले प्रस्तुत गर्दा एमाले सांसद झपट रावलले सांसदहरूको संख्या गणना गरियोस् भन्ने प्रस्ताव राखेका थिए । 'कोरम नपुगेको अवस्थामा निर्णयार्थ पेस गरिँदैछ । यो नियमावलीविपरीत हुने भएकाले सांसद सदस्यहरूको संख्या गणना गरियोस् भन्ने माग गर्दछु,' रावलले माग गरेका थिए ।

संविधानको धारा ९४ मा कुनै पनि प्रस्ताव निर्णयार्थ प्रस्तुत गर्दा सभाका सम्पूर्ण सदस्यको एक चौथाइ हुनुपर्ने व्यवस्था छ ।

सांसद रावलले गणपूरक संख्यामा प्रश्न उठाएपछि सभामुख सापकोटाले ३ मिनेट जनाउ घण्टी बजाएर सांसद संख्या गणना गर्न निर्देशन दिएका थिए । संसद् सचिवालयले तीन मिनेटपछि सांसद संख्या गणना गर्दा ६३ सांसद मात्रै उपस्थित थिए । सभामुख सापकोटाले ६९ सांसद उपस्थित हुनुपर्नेमा ६३ जना मात्रै उपस्थित भएको र सो संख्या संवैधानिक व्यवस्थाअनुसार एक चौथाइ नभएकाले सभाको कारबाही रोकेका थिए । प्रतिनिधिसभा बैठक आधा घण्टाका लागि स्थगित गरिएको छ । प्रतिनिधिसभामा कूल २ सय ७५ सांसद छन् ।

प्रकाशित : असार १२, २०७९ १५:४६
प्रतिक्रिया
पठाउनुहोस्

बन्गाड कुपिण्डे नगरपालिकाद्वारा झन्डै ७० करोडको बजेट सार्वजनिक 

विप्लव महर्जन

सल्यान — शिक्षा र स्वास्थ्यलाई प्राथमिकता दिँदै सल्यानको बन्गाड कुपिण्डे नगरपालिकाले आर्थिक वर्ष ०७९/८० को लागि ६९ करोड ९१ लाख बजेट सार्वजनिक गरेको छ । ११ औं नगरसभाबाट नगरपालिकाले बजेट सार्वजनिक गरेको हो । नगरपालिकाको बजेट नगरका उपप्रमुख पुरुषोत्तम आचार्यले सार्वजनिक गरे । उनले सार्वजनिक गरेको बजेट सर्वसम्मत रुपमा पास भएको छ । बिनियोजन गरेको बजेटमा पुँजीगत २५ करोड ४६ लाख रुपैयाँ अर्थात ३६.४ प्रतिशत र चालुगत ४४ करोड ४५ लाख अर्थात ६३.६ प्रतिशत रहेको छ । 

नीति कार्यक्रम सार्वजनिक गरेका नगर प्रमुख कर्णबहादुर बुढाथोकीले नीति र कार्यक्रममा व्यवस्था भए अनुसार शिक्षा र स्वास्थ्यलाई मात्र नभई आर्थिक, सामाजिक, कृषि, पशुपालन, भौतिक, पुर्वाधार विकास, पर्यटन, वातावरण तथा विपद ब्यवस्थापन, संस्थागत विकास सुशासन समेतका विषयलाई समेटिएको बताएका छन् । उनले शिक्षा र स्वास्थ्यमा २ /२ करोड भन्दा बढी बजेट विनियोजन गरेको जानकारी गराए ।

उनले पहिलेको शिक्षा र स्वास्थ्य विधेयक संशोधन गरेको जानकारी गराए । ‘बन्गाड कुपिण्डे नगरपालिकामा शिक्षा र स्वास्थ्यको अवस्था एकदमै कमजोर छ । शिक्षकको अभावमा सामुदायिक विद्यालयमा विद्यार्थी संख्या घट्दै गएका छन् भने भौतिक संरचना पनि जिर्ण छन् । पर्याप्त शिक्षक पदपूर्ति गर्न र भौतिक संरचना निर्माण गरि सहज रुपमा पठनपाठन गराउन शिक्षामा बढी बजेट विनियोजन गरेका हौ’ उनले भने ‘स्वास्थ्यको अवस्था कमजोर भएकाले पालिका भित्रका स्थानीय सामान्य उपचार गर्न सुर्खेत, नेपालगन्ज जानुपर्ने बाध्यता छ । यसलाई अन्त्य गर्न र पालिकामा निर्माणाधीन १५ शैय्याको अस्पताललाई पूर्णता दिन स्वास्थ्यलाई पनि प्राथमिकता दिएका हौं’ ।

पालिकाभित्रका नागरिकलाई नागरिकतामा सहजता ल्याउन र आर्थिक अवस्था कमजोर भएका सर्वसाधारण नागरिकताबाट वञ्चित हुन नपरोस् भनी साउनदेखि नागरिकता सिफारिसमा लाग्ने शुल्क हटाएको र अन्यमा लाग्ने कर समेत घटाउने तयारी भैरहेको उनको भनाइ छ ।


प्रकाशित : असार १२, २०७९ १५:४६
पूरा पढ्नुहोस्
प्रतिक्रिया
पठाउनुहोस्
×