दलित आयोगले भन्यो- कानुनी शासनको ठाडो उपहास- समाचार - कान्तिपुर समाचार
कान्तिपुर वेबसाईट
AdvertisementAdvertisement
दलित किशोरको मृत्यु प्रकरण

दलित आयोगले भन्यो- कानुनी शासनको ठाडो उपहास

कान्तिपुर संवाददाता

काठमाडौँ — राष्ट्रिय दलित आयोगले रोल्पा कारागारमा मृत भेटिएका बालक सुन्दर हरिजन प्रकरणमा कानुनी शासनको ठाडो उपहास भएको बताएको छ । आयोगले घटनामा गम्भीर ढंगले छानविन गर्न र दोषीलाई हदैसम्मको कानुनी कारबाही गर्न सरकारको ध्यानाकर्षण गराएको छ । आयोगका सदस्य एवम् प्रवक्ता सुन्दर पुर्कुटीले विज्ञप्ति जारी गर्दै अवोध बालकलाई अनेक प्रपञ्च रचेर फसाउने काम गरिएको बताएका छन् ।

‘नेपालगञ्ज घर भई रोल्पा कारागारमा मृत भेटिएका सुन्दर हरिजनलाई अदालतको आदेशमा सुधारगृहमा पठाउन भनिएको, तर सो आदेशको अवज्ञा गर्दै प्रहरी नियन्त्रणमा राखिरहनु र अनेक प्रपञ्चमा एउटा अवोध बालकलाई फसाउनु कानुनी शासनको ठाडो उपहास हो,’ आयोगका प्रवक्ता पुर्कुटीले भनेका छन् ।

आयोगले जेल सार्ने बाहानामा कानुनअनुसार सजाय पाउनुपर्ने व्यक्तिलाई उन्मुक्ति दिनु र सजाय नै नपाउनुपर्ने नाबालकलाई नियोजित ढंगले जेल सजाय गरिनुमा सम्बन्धित जिल्लाका सरकारी वकिल, प्रहरी, प्रशासन र जेल प्रशासनको कमजोरी छताछुल्ल भएको भन्दै त्यसबारे गम्भीर छानबिनको माग गरेको छ ।

‘यो घटनाले के दलित कसैको सट्टामा जेल बस्न र अनाहकमा मारिनको लागि जन्मेका हुन् त ? भन्ने गम्भीर प्रश्न उठेको छ,’ आयोगले भनेको छ । आयोगले यो घटनाले नेपालमा दलित मानव अधिकारको अवस्था कस्तो छ भन्ने समेत प्रष्ट भएको जनाएको छ ।

आयोगले सुन्दर हरिजनको परवारलाई उचित क्षतिपूर्तिको व्यवस्था गर्न र यस्ता घटना हुन नदिन समेत सरकारको ध्यानाकर्षण गराएको छ ।

प्रकाशित : जेष्ठ १७, २०७९ १०:३८
प्रतिक्रिया
पठाउनुहोस्

एम्बुलेन्स दुर्घटनाका फरार चालक पक्राउ

अनिश तिवारी

सिन्धुपाल्चोक — एक वृद्धाको ज्यान जाने गरी भएको एम्बुलेन्स दुर्घटनाका फरार आरोपी एम्बुलेन्स चालकलाई प्रहरीले पक्राउ गरेको छ । बुधबार राति करिब ९ बजेतिर बिरामी पुर्‍याएर फर्किएको एम्बुलेन्स सुनकोसी गाउँपालिका–७, दुई किलोमा अनियन्त्रित भई दुर्घटना हुँदा घरभित्र सुतिरहेकी ८९ वर्षीया मनमाया खड्को मृत्यु भएको थियो ।

इलाका प्रहरी बाह्रबिसेका अनुसार बलेफी गाउँपालिका–७ स्थित खाडीचौर बचत तथा ऋण सहकारी संस्था लिमिटेडबाट सञ्चालित बा २० च ६३२७ नम्बरको एम्बुलेन्स सडकको बायाँपट्टी टिनको घरमा पल्टिएको थियो । एम्बुलेन्स घरमाथि पल्टिएपछि घरभित्र रहेकी खड्का गम्भिर घाइते भएको र उपचारको लागि अस्पताल लैजाने क्रममा निधन भएको इलाका प्रहरी बाह्रबिसेका प्रहरी निरीक्षक मुकेश न्यौपानेले बताए ।

घटना भएलगत्तै फरार एम्बुलेन्स चालक सुनकोसी गाउँपालिका–७ कै रविन्द्र कार्कीलाई शनिबार इलाका प्रहरी बाह्रबिसेबाट खटिएको टोलीले पक्राउ गरेको हो । ‘आवश्यक सोधपुछ सकिएपछि सोमबार जिल्ला अदालतबाट दस दिनको म्याद थप गरी अनुसन्धान प्रक्रिया अघि बढाइएको छ, ’ न्यौपानेले भने । यसअघि एम्बुलेन्स सञ्चालक सहकारी र पीडित पक्षबीच क्षर्तिपूर्तिबारे सहमति भएको सुनिएको उनले जनाए ।

प्रकाशित : जेष्ठ १७, २०७९ १०:३५
पूरा पढ्नुहोस्
प्रतिक्रिया
पठाउनुहोस्
x
×