रञ्जन कोइराला केन्द्रीय कारागार चलान

उनले यसअघि डिल्लीबजार कारागारमा करिब साढे ८ वर्ष कैद भुक्तान गरेर सर्वोच्च अदालतले जन्मकैदको सजाय घटाइदिएपछि २०७७, साउन ८ मा कैदमुक्त भएका थिए ।

उनी अब २०९० मंसिर १२ सम्म कारागारमा बस्नुपर्ने छ । पत्नी गीता ढकालको हत्या अभियोगमा २०६८ माघमा पक्राउ परेका उनलाई काठमाडौं जिल्ला अदालतले २०७१ बैशाख ७ मा दोषी ठहर गर्दै जन्मकैदको सजाय सुनाएको थियो । जिल्लाको फैसलालाई तत्कालिन पुनरावेदन अदालत पाटनले सदर गरेको थियो । त्यसविरुद्ध सर्वोच्च गएका कोइरालालाई प्रधानन्यायाधीश जबरा र न्यायाधीश तेजबहादुर केसीको इजलासले २०७७ असार १५ मा साढे ८ वर्ष कैदमा बसे पुग्ने फैसला गरेसँगै जन्मकैदको सजाय घटेको थियो । सर्वोच्चको उक्त फैसला विरुद्ध महान्यायाधिवक्ता कार्यालयले पुनरावलोकनको निवेदन दिएको थियो । त्यही निवेदन माथि फैसला गर्दै कामु प्रधानन्यायाधीश दीपककुमार कार्की र न्यायाधीशद्वय टंक मोक्तान र कुमार चुडालको पूर्ण इजलासले बिहीबार कोइरालाको जन्मकैदको सजाय घटाउने यसअघिको फैसला उल्टाएको थियो ।

सर्वोच्चको फैसला लगत्तै फरार भएका कोइरालालाई भोलिपल्ट काठमाडौं उपत्यका अपराध अनुसन्धान कार्यालयले बानेश्वरबाट पक्राउ गरेको थियो । कार्यालयका प्रमुख एसएसपी वसन्त कुँवरले पक्राउ परेको तेस्रो दिन जिल्ला अदालत काठमाडौंले उनलाई केन्द्रीय कारागार चलान गरिदिएको जानकारी दिए ।