निजगढ विमानस्थल रोक्ने कुरा राष्ट्रहितविपरीत छ : सांसद रावल- समाचार - कान्तिपुर समाचार

निजगढ विमानस्थल रोक्ने कुरा राष्ट्रहितविपरीत छ : सांसद रावल

कान्तिपुर संवाददाता

काठमाडौँ — नेकपा (एमाले)का सांसद भीमबहादुर रावलले बाराको निजगढमा अन्तर्राष्ट्रिय विमानस्थल निर्माणको काम रोक्ने सर्वोच्च अदालतको फैसला राष्ट्रहितविपरीत रहेको बताएका छन् । उनले सरकारले कानुनी, प्राविधिक र व्यवहारिक जे-जस्ता भएपनि कदम चाल्नुपर्ने र विमानस्थल निर्माण गर्नुपर्ने बताएका छन् । 

प्रतिनिधिसभाको अन्तर्राष्ट्रिय सम्बन्ध समितिको सोमबारको बैठकमा सांसद रावलले सर्वोच्च अदालतको गत बिहीबारको फैसला राष्ट्रहितविपरीत रहेको बताएका हुन् । उनले फैसला गर्ने न्यायाधीशमाथि पनि प्रश्न उठाएका छन् । 'अदालत छुट्टै टापुमा बसेको हो ? राष्ट्रको, देशको हित हेर्न मिल्दैन ? त्यहाँ बस्ने व्यक्तिहरू अन्तैका हुन् ?,' उनले भने, 'यो विमानस्थल रोक्ने, बनाउन नदिने कुरा राष्ट्रहितविपरीत छ ।'

सर्वोच्च अदालतले निजगढ विमानस्थलको चौकिल्ला तोकेको भए त्यसबाहेकको क्षेत्रमा निर्माण गर्नुपर्ने रावलको भनाइ थियो । उनले भने, 'सरकारले कुनै पनि किसिमले कानुन परवर्तन गर्ने हो भने कानुन परिवर्तन गरेर अगाडि बढ्नुपर्छ ।' खर्बौं रुपैयाँ खर्च भइसकेपछि यस्तो आदेश आउनु गलत भएको उनको भनाइ थियो । उनले यो विमानस्थल निर्माणमा ठूला शक्ति राष्ट्रहरूको स्वार्थ पनि देखिएको हो कि भन्ने आशंका व्यक्त गरे ।

निजगढ अन्तर्राष्ट्रिय विमानस्थल निर्माण गर्नका लागि कानुन संशोधन गर्नुपर्ने भएपनि त्यो गर्नुपर्ने कांग्रेसकी सांसद पुष्पा भुसालको पनि भनाइ थियो । 'सरकार र सदनले कानुन निर्माण गर्नुपर्ने भए त्यो पनि गरोस् । पर्यटक भित्र्याउने मात्रै होइन कि अर्थतन्त्रका हिसाबले पनि यो महत्त्वपूर्ण छ ।' उनले निजगढ विमानस्थल निर्माणविरुद्ध कहिले मुद्दा परेको थियो र कहिले के के भयो भन्ने कुरा सार्वजनिक जानकारीमा नरहेको बताइन् ।

काठमाडौं-तराई फास्ट ट्र्याक निर्माण गरेको निजगढ अन्तर्राष्ट्रिय विमानस्थलका लागि नै भएको उल्लेख गर्दै सांसद भुसालले ठूलो रकम खर्च भइसकेको अवस्थामा आएको फैसला हेरेर निर्माण कार्य अगाडि बढाउनुपर्ने बताइन् ।

माओवादी सांसद सुदन किराँतीले अदालत र कार्यपालिकाबीचको सम्बन्ध सही नभएको हो कि भन्ने आशंका उत्पन्न भएको बताए । उनले अदालतले गरेको निर्णय विकासको विरुद्ध भएको बताए । वातावरणको नाममा विकास निर्माणका काम रोक्ने काम निन्दनीय भएको उनको भनाइ थियो ।

प्रकाशित : जेष्ठ १६, २०७९ १०:४८
प्रतिक्रिया
पठाउनुहोस्

उदयपुरमा ट्रक दुर्घटना‚ चारको मृत्यु

डिल्लीराम खतिवडा

उदयपुर — सिद्धिचरण राजमार्गअन्तर्गत उदयपुरको कटारी नगरपालिका १४ भदौरेस्थित चनौटमो सोमबार बिहान ट्रक दुर्घटना हुँदा चार जनाको मृत्यु भएको छ । मकवानपुरको हेटौंडाबाट मिक्सु सोलु हाइड्रोपावरको सिमेन्ट लोड गरेर सोलुखुम्बुतर्फ जाँदै गरेको ना ८ ख ८२९७ नम्बरको लोबेड ट्रक बजुरा खोला नजिकै दुर्घटना भएको हो । 

दुर्घटनामा ट्रकका चालक बाराको सिमरा-१ का ३५ वर्षीय सुजित घलान, सहचालक २५ वर्षीय नितेश खड्का, ट्रकमा सवार सिमरा-१ का १७ वर्षीय अनुज लामा र ३७ वर्षीय राजन तामाङको घटनास्थलमै मृत्यु भएको जिल्ला प्रहरी कार्यालय उदयपुरका निमित्त सूचना अधिकारी प्रहरी निरीक्षक मोहन थापाले बताए ।

कच्ची सडकमा चालक निदाएका कारण ट्रक अनियन्त्रित भई दुर्घटना भएको प्रहरीको प्रारम्भिक अनुसन्धानबाट खुलेको प्रहरी निरीक्षक थापाले बताए । ट्रक सडकबाट करिब सय मिटर तल खसेको छ । प्रहरीले स्थानीयको सहयोगमा शव बाहिर निकाल्ने प्रयास जारी राखेको छ । शव यत्रतत्र छरिएकाले उठाउने कार्य भइरहेको प्रहरीले जनाएको छ ।

घटनास्थलमा इलाका प्रहरी कार्यालय कटारीको टोलीसहित सशस्त्र प्रहरी परिचालन गरिएको छ । प्रहरीले दुर्घटनाका बारेमा अनुसन्धान सुरु गरेको जनाएको छ ।

प्रकाशित : जेष्ठ १६, २०७९ १०:४५
पूरा पढ्नुहोस्
प्रतिक्रिया
पठाउनुहोस्
×