कांग्रेसको नीति सत्तामा पुग्ने, कार्यक्रम सत्ता टिकाउने : ओली - समाचार - कान्तिपुर समाचार
कान्तिपुर वेबसाईट
AdvertisementAdvertisement

कांग्रेसको नीति सत्तामा पुग्ने, कार्यक्रम सत्ता टिकाउने : ओली 

कान्तिपुर संवाददाता

काठमाडौँ — नेपाली कांग्रेस सत्ताभोगमा लागेको एमालेका अध्यक्ष केपी शर्मा ओलीले बताएका छन् । प्रतिनिधिसभामा सरकारका नीति तथा कार्यक्रममाथि आफ्नो धारणा राख्दै उनले कांग्रेससँग देशको हितमा कुनै नीति र कार्यक्रम नरहेको बताएका हुन् । 

प्रतिनिधिसभाको बिहीबारको बैठकमा ओलीले एमालेले अघि सारेका नीति तथा कार्यक्रम नै समातेर कांग्रेस नेतृत्वको सरकारले ल्याएको बताए । विगतमा एमालेलगायतका दलले ल्याएको नीति र कार्यक्रमलाई कांग्रेसले सुरुमा विरोध गर्दै आएको र पछि गएर त्यसैलाई अँगाल्ने गरेको ओलीको भनाइ थियो ।

'अब सूर्यजस्तै छर्लंग भएको छ कि नेपाली कांग्रेससँग नेपाल र नेपालीको विकास, समृद्धि, राष्ट्रिय स्वाभिमान र सम्मान अभिवृद्धि गर्नका लागि कुनै नीति छैन । कार्यक्रम छैन, भिजन, योजना छैन । मार्गचित्र हुने कुरै भएन । गन्तव्य, सन्तव्य केही छैन,' ओलीले भने, 'यतिमात्रै होइन कांग्रेसँग एमालेले अघि बढाएका नीति तथा कार्यक्रमहरूलाई हटाउने आँट पनि छैन । विरोध गरिन्ज्याल गर्ने, हटाउने आँट पनि छैन । संशोधन गरेर हटाउन सक्नुहुन्छ भने हटाइदिए हुन्छ ।'

एमालेले ल्याएका नीति तथा कार्यक्रमलाई सरकारको नीति तथा कार्यक्रमबाट हटाउन ओलीले चुनौती दिए । कांग्रेसमाथि आक्रामक रूपमा प्रस्तुत भएका ओलीले भने, 'नेपाली कांग्रेससँग सत्ताभोग केन्द्रित नियतको नीतिबाहेक देश र जनताका लागि कुनै नीति र कार्यक्रम छैन । नीति सत्तामा पुग्ने, कार्यक्रम सत्ता टिकाउने । त्यसका लागि जे जे पूर्वाधार (हातले रुपैयाँको इशारा गर्दै) तयार गर्नुपर्छ गर्ने । कांग्रेसले यस नीति तथा कार्यक्रम मार्फत आफ्नो पहिचान पनि गुमाएको छ ।' सत्ताभोगका लागि कांग्रेसले जालझेल र षडयन्त्र गरिरहेको उनको भनाइ थियो ।

सरकारलाई वैकल्पिक नीति ल्याउन ओलीले चुनौती दिएका छन् । 'अन्य राजनीतिक दलहरूका सिद्धान्त, नीति, कार्यक्रम र एजेन्डाहरूको सुरुमा चर्को विरोध गर्ने, प्रतिवाद गर्ने, अस्वीकार गर्ने पछि केही समयको बीचमा मौका छोपेर तिनै सिद्धान्त, नीति, कार्यक्रम र एजेण्डाबाट लाभ लिने ! आफू गलत गर्ने, अनि आफ्ना गलत कार्यहरू उल्टै तिनै राजनीतिक दलहरूलाई लगाएर व्यापक कुप्रचार गर्ने, अनुचित सहारा लिएर सत्ताभोगका लागि अनुकूल इकोसिस्टम तयार गर्ने कांग्रेसको खान्दानी सिद्धान्त हो,' उनले भने, 'अर्काको एजेन्डालाई थाहा नपाएजस्तो गरेर उपयोग गर्ने विशिष्ट क्षमता कांग्रेसमै छ । अर्काको गुँडमा अण्डा पारेर चल्ला कोरल्न कांग्रेस पोख्त छ । यो हाम्रो इतिहासको वास्तविकता हो ।'

प्रकाशित : जेष्ठ १२, २०७९ १२:५६
प्रतिक्रिया
पठाउनुहोस्

सोती घटनाले देशकै प्रतिष्ठामा असर पुर्‍याएको छ : गृहमन्त्री खाँण

कान्तिपुर संवाददाता

काठमाडौँ — गृहमन्त्री बालकृष्ण खाँणले रुकुम पश्चिमको सोती गाउँमा भएको घटनाले देशकै प्रतिष्ठामा असर पुर्‍याएको बताएका छन् । उनले घटनाको गहिरो छानबिन र दोषीहरूलाई कडा कारबाही गर्नका लागि सरकार प्रयासरत रहेको बताए । जाजरकोटबाट न्याय खोज्दै काठमाडौं आएका मृतकका आमाहरूको गुनासो सुनेपछि गृहमन्त्री खाँणले सरकार पीडित पक्षको साथमा रहेको बताए ।

‘घटनाको निष्पक्ष छानबिन र दोषीलाई कडाभन्दा कडा कारबाही गर्नका लागि सरकार प्रयासरत छ । सरकार तपाईंहरुकै साथमा छ । यो घटनामा पीडित तपाईंहरु मात्रै होइन, देशै पीडित भएको छ, अहिलेको समयमा पनि यस्तो घटना हुनुले देशको प्रतिष्ठामै असर पुगेको छ,’ खाँणले भनेका थिए ।

गृहमन्त्री खाँणले मुद्दा अदालतमा पुगेकाले अब अदालतबाटै त्यसको किनारा लाग्ने बताएका थिए । ‘घटनाबारे सरकार जानकार छ । संसदीय समितिले नै छानबिन गरेर सरकारलाई प्रतिवेदन बुझाइसकेको छ । कार्यान्वययमा केही कमजोरी र ढिलाइ भएको पक्कै हो,’ उनले स्वीकारोक्तिसहित भने, ‘तर अब तपाईंहरुको न्यायका लागि सरकारले कुनै कसुर बाँकी राख्ने छैन ।’

उनले संसदीय समितिको सिफारिस बमोजिम पीडित परिवारको शिक्षा, स्वास्थ्य र रोजगारीसहितको व्यवस्थाका लागि समेत सरकारले पहल गर्ने बताए । पीडित परिवारले सरकारलाई विभिन्न मागसहितको १२ बुँदे ज्ञापन पत्र बुझाएका छन् ।

२०७७ साल जेठ १० गते रुकुम पश्चिमको चौरजहारीकी गैरदलित प्रेमिकालाई भगाएर बिहे गर्न गएका नवराज विकसहित ६ युवक केटी पक्षका गाउँलेको आक्रमणबाट मारिएका थिए ।

उनीहरू सबैको शव भेरी नदीमा फेला परेको थियो  । चौरजहारी–८ को सोतीमा गाउँलेको आक्रमणमा परेका उनीहरूको शव १५ दिनसम्म लगाएर प्रहरीले भेटाएको थियो । प्रहरीका अनुसार उनीहरूमाथि घरेलु हतियारको प्रयोग भएको थियो । घटनामा अरू १२ जनाले भने भागेर ज्यान बचाएका थिए ।

प्रकाशित : जेष्ठ १२, २०७९ १२:५३
पूरा पढ्नुहोस्
प्रतिक्रिया
पठाउनुहोस्
×