प्रधानमन्त्रीको वडामा चाहिँ केही पनि जाने भएन, त्यहाँ कांग्रेसले जितेन : ओली- समाचार - कान्तिपुर समाचार
कान्तिपुर वेबसाईट
AdvertisementAdvertisement

प्रधानमन्त्रीको वडामा चाहिँ केही पनि जाने भएन, त्यहाँ कांग्रेसले जितेन : ओली

कान्तिपुर संवाददाता

काठमाडौँ — प्रमुख प्रतिपक्षी दल नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले निर्वाचनका क्रममा पैसाको प्रलोभन दिइएको बताएका छन् ।  उनले मतदातालाई धाक र धम्की दिइएको पनि बताए । 

प्रतिनिधिसभाको बिहीबारको बैठकमा नीति तथा कार्यक्रममाथि आफ्ना धारणा राख्दै ओलीले कांग्रेसले नजितेको ठाउँमा बजेट नजाने भनेर कांग्रेसकी केन्द्रीय सदस्य तथा प्रधानमन्त्री शेरबहादुर देउवाकी श्रीमती आरजु राणाले दिएको अभिव्यक्ति तर्फ इंगित गरेका हुन् ।

'प्रधानमन्त्री देउवाको वडामा केही पनि नजाने हो ? 'भनेर पनि ओलीले देउवालाई प्रश्न गरेका थिए । 'रुखमा भोट नहाल्नेलाई पैसा पठाइँदैन भनियो । संयोगकै कुरा हो, डडेलधुरामा मेडिकल कलेज जाने भएछ । कुन पालिकामा कांग्रेसले जितेको छ त्यहाँ जाने होला । अमरगढी जितेको छ कि छैन ? अमरगढी कांग्रेसले जितेको भए त ठीकै छ नत्र कुन कुनामा लगेर राख्नुपर्ने हो मेडिकल कलेज,' उनले भने, 'सम्माननीय प्रधानमन्त्रीको आफ्नै वडामा चाहिँ केही पनि जाने भएन, किनभनेर त्यहाँ रुखले केही पनि जितेन कि क्या हो । लोकतन्त्रको हरिबिजोग अरु के हुन्छ ।'

प्रधानमन्त्री शेरबहादुर देउवाको गृहजिल्ला डडेलधुराको गन्यापधुराको वडा नम्बर १ मा कांग्रेस हारेको थियो । गन्यापधुरा गाउँपालिका वडा नम्बर १ मा कांग्रेस उम्मेदवार चन्द्रबहादुर देउवालाई १ सय २९ मतले पराजित गर्दै प्रधानमन्त्रीको वडामा कांग्रेसबाट विद्रोह गरेर बीपी कांग्रेसको चुनाव चिह्न करुवाबाट चुनाव लडेका नरेश भण्डारी निर्वाचित भए । भण्डारीले ६ सय ७३ मत ल्याए भने पराजित कांग्रेसका देउवाले ५ सय ४४ मत पाएका छन् ।

प्रकाशित : जेष्ठ १२, २०७९ १२:००
प्रतिक्रिया
पठाउनुहोस्

सत्ता पक्षले प्रतिपक्षलाई संवादहीनताको अवस्थामा राखेर पेल्ने काम गरेको छ : ओली

'नेकपा एमाले सैद्धान्तिक तवरमा मात्रै होइन इन द रियल सेन्स गभर्नमेन्ट इन वेटिङ हो'
कान्तिपुर संवाददाता

काठमाडौँ — पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले  सत्ता पक्षले प्रतिपक्षलाई सिध्याउन भन्दै राज्य संयन्त्रको दुरुपयोग गरेको बताएका छन् । बिहीबार प्रतिनिधि सभामा सरकारले आर्थिक वर्ष २०७९/८० का लागि प्रस्तुत गरेको नीति तथा कार्यक्रममाथि छलफलमा भाग लिँदै ओलीले सत्ता पक्षले प्रतिपक्षलाई पेल्ने काम गरेको बताएका हुन् । 

चुनावमा जित/पराजित स्वाभाविक कुरा भए पनि सत्ता पक्षले एमालेलाई सिध्याउँछु भनेर लागेको उनको आरोप थियो । 'सत्ता पक्षले यस पार्टीलाई सिध्याउँछु भन्छ, सिध्याउँछु भन्ने हक कहाँबाट आयो ? चुनावमा जित/पराजय एउटा कुरा हो, पराजय भोगाउँछौँ, हामी जित्छौँ भन्न सकिन्छ तर सिध्याउँछौँ समाप्त पारिदिन्छौँ, धूलो चटाइदिन्छौँ, गायब पारिदिन्छौँ, टर्च बालेर खोज्न पर्छ भन्ने । टर्च बालेर नि भेटिँदैन होला होइन,' उनले भने ।

नेकपा एमाले सशक्त प्रतिपक्ष भएको र छिट्टै सरकारमा आउन सक्ने पनि ओलीले बताए । 'अपोजिसनलाई जहिले पनि गभर्नमेन्ट इन वेटिङ भनिन्छ । नेकपा एमाले सैद्धान्तिक तवरमा मात्रै गभर्नमेन्ट इन वेटिङ होइन नेकपा एमाले इन द रियल सेन्स गभर्नमेन्ट इन वेटिङ हो । अनेक हिसाबले षड्यन्त्रस्वरूप यसलाई बाहिर राखिएको होला । एमाले लोकतन्त्रको समुद्रमा पौडी खेल्न जान्ने पार्टी हो पौडी खेलेर आएको छ । अनेक दाउपेचबाट होइन । पौडी खेलेरै यहाँसम्म आएको छ,' उनले भने ।

प्रतिपक्षलाई संवादहीनताको अवस्थामा राखेर पेल्ने काम गरिएको उनले बताए । 'विभिन्न अन्तर्राष्ट्रिय सन्धि सम्झौता गर्दा प्रतिपक्षसँग छलफल गरिएको छैन । प्रतिपक्षलाई संवादहीनताको अवस्थामा राखेर पेल्ने काम गरिएको छ,' उनले भने । त्यस्तै प्रतिपक्षविरुद्ध राज्य संयन्त्रको दुरुपयोग गरिएको पनि उनको भनाई थियो ।

प्रकाशित : जेष्ठ १२, २०७९ ११:४९
पूरा पढ्नुहोस्
प्रतिक्रिया
पठाउनुहोस्
×