इन्धनको मूल्यवृद्धिमाथि संसद्मा छलफल माग गर्दै जरुरी सार्वजनिक महत्त्वको प्रस्ताव दर्ता

जरुरी सार्वजनिक महत्वको प्रस्तावको प्रस्तावकमा एमालेका मुख्य सचेतक विशाल भट्टराई रहेका छन् । समर्थकमा एमालेका यज्ञराज सुनुवार र गणेश पहाडी एवं राप्रपाका राजेन्द्र लिङ्देन रहेका छन् । भट्टराईले प्रतिनिधिसभा सचिव गोपालनाथ योगीलाई उक्त प्रस्ताव बुधबार बुझाएका हुन् ।

पेट्रोलियम पदार्थको मूल्य स्वचालित कार्यविधिअनुसार नेपाल आयात हुने पेट्रोलियम पदार्थको बिक्री मूल्य परल मूल्य बमोजिम १५ दिनमा एकपटक समायोजन गर्नसक्ने प्रावधान विरुद्ध गएर पछिल्लो समय हप्तादिनमित्रै दुई पटक बृद्धि गरिएको भन्दै त्यो फिर्ताको माग उनीहरूले राखेका छन् ।

सरकारसँग मूल्य वृद्धि न्यूनिकरणका लागि भएका प्रयासबारेका खाका माग गर्न संसद्मा छलफल गर्नुपर्ने पनि जरुरी सार्वजनिक महत्वको प्रस्ताव पेस गरिएको उल्लेख छ । मूल्य वृद्धिका कारण प्रभावितहरूको जनजीवन सहज बनाउन सरकारका योजनाबारे जानकारी माग गर्न पनि छलफल आवश्यक भएको सांसदहरूको माग छ ।