इन्धनको मूल्यवृद्धिविरुद्ध १३ विद्यार्थी संगठनले गरे संयुक्त आन्दोलनको घोषणा- समाचार - कान्तिपुर समाचार
कान्तिपुर वेबसाईट
AdvertisementAdvertisement

इन्धनको मूल्यवृद्धिविरुद्ध १३ विद्यार्थी संगठनले गरे संयुक्त आन्दोलनको घोषणा

कान्तिपुर संवाददाता

काठमाडौँ — इन्धनको मूल्यवृद्धिविरुद्ध १३ विद्यार्थी संगठनले संयुक्त आन्दोलन घोषणा गरेका छन् । सोमबार सत्तारुढ र प्रतिपक्षी दलनिकट नेविसंघ, अखिल क्रान्तिकारी, अनेरास्ववियू, समाजवादी विद्यार्थी युनियनसहितका १३ विद्यार्थी संगठनले संयुक्त आन्दोलन घोषणा गरेका हुन् ।

नागरिकको प्रत्यक्ष जीवनसँग जोडिएको पेट्रोलियम पदार्थमा राज्यले विभिन्न परियोजना निर्माणका लागि कर थोपरेका कारण वास्तविक मूल्यभन्दा बढी तिर्न बाध्य भएको संयुक्त विज्ञप्तिमा उल्लेख छ ।

त्यस्तै जनताले तिरेको करको वास्तविक अर्थमा सही सदुपयोग नभएको पनि विज्ञप्तिमा उल्लेख छ । नेपाल आयल निगमभित्रको चुहावट, भ्रष्टाचार र कमिसन बन्द गर्नुभन्दा पनि पटक-पटक मूल्यवृद्धि गरिनु जनहीतमा नरहेको विद्यार्थी संगठनको भनाइ छ ।

मूल्यवृद्धिलाई देखाएर बजारमा अन्य दैनिक उपभोग्य वस्तुको समेत कालोबजारी भएकाले इन्धनमा गरिएको मूल्यवृद्धि तत्काल फिर्ता गर्न पनि सरकारसँग विद्यार्थी संगठनले माग गरेका छन् ।

निगमले आइतबार रातिदेखि लागू हुने गरी इन्धनको मूल्य बढाएको हो । निगमले पेट्रोल, डिजेल र मट्टितेल प्रतिलिटर १० रुपैयाँका दरले बढाएको छ । अब काठमाडौं उपत्यकामा पेट्रोलको मूल्य प्रतिलिटर १८० रुपैयाँ तथा डिजेल र मट्टितेलको मूल्य १६३ रुपैयाँ पर्ने भएको छ ।

त्यस्तै खाना पकाउने ग्यासको मूल्य प्रतिसिलिण्डर २ सय रुपैयाँ बढेको छ । अब ग्यासको भाउ प्रतिसिलिण्डर १८ सय पुगेको छ । आयल निगमले नोक्सानी बढेको भन्दै इन्धनको मूल्य बढाएको हो ।


प्रकाशित : जेष्ठ ९, २०७९ २१:४७
प्रतिक्रिया
पठाउनुहोस्

यू–२३ बास्केटबलमा अन्माइसको भेट रोयलसँग

कान्तिपुर संवाददाता

काठमाडौँ — टाइम्स कलेज र अन्माइस नेपाल जीएए तेस्रो रोयल यू–२३ बास्केटबल प्रतियोगिताको सेमिफाइनलमा पुगेका छन् । सोमबार टाइम्स समूह ‘बी’ विजेता र अन्माइस उपविजेता हुँदै सेमिफाइनल पुगे । टाइम्सले क्वेस्ट कलेजलाई ७८–३४ स्कोरले हरायो ।

टाइम्सका मनीष केसीले १५ स्कोर गरे । क्वेस्टका आयोन स्थापित र रोजन वज्राचार्यले ८–८ स्कोर गरे ।

सुनील मगरको २४ स्कोर सहयोगमा अन्माइसले धरानको मेघा कलेजलाई ७८–६९ स्कोरले हरायो । सेमिफाइनलमा अन्माइसको भेट आयोजक रोयल स्पोर्ट्स सेन्ट्रलसँग हुनेछ । अर्को सेमिफाइनल टाइम्स र विशाल मिलन केन्द्र (बीएमके) बीच हुनेछ ।

रोयलले इक्याब मेरिलियोन जिम्न्याजियमलाई ७१–४६ ले हराएर समूह ‘ए’ विजेता हुँदै सेमिफाइनल सुरक्षित गर्‍यो । रोयलका रवि पौडेलले २३ स्कोर जोडे । बीएमके समूह ‘ए’ उपविजेता बन्दै अन्तिम चारमा पुगेको हो । अर्को महत्त्वहीन लिग खेलमा शंकरदेव क्याम्पसले टिम सिंहमाथि ५४–३७ को जित पाउँदा लोकेन्द्रले १४ स्कोर गरेका थिए ।

प्रकाशित : जेष्ठ ९, २०७९ २१:४४
पूरा पढ्नुहोस्
प्रतिक्रिया
पठाउनुहोस्
x
×