कुन–कुन पालिकामा महिला नेतृत्व ?

प्रदेश १ मोरङको कानेपोखरीमा एमालेकी राजमति इङ्नाम कांग्रेसका सञ्जय भट्टराईलाई हराएर प्रमुख बनेकी छन् । इङ्नामले ८ हजार ९ सय ७५ मत ल्याएकी छन् भने भट्टराईले ५ हजार ८ सय ४६ मत ल्याए । त्यस्तै संखुवासभाको मकालु गाउपालिकामा आङदी छिरीङ शेर्पा बिजय भएकी छिन् । उनले एमालेका भरत कटुवाललाई हराएकी हुन् । निर्वाचन आयोगका अनुसार ३ हजार १७ मत ल्याएकी शेर्पा ५ सय ३९ मतान्तरले निर्वाचित भएकी हुन् । सोलुखुम्बुको लिखु पिके गाउपालिका अध्यक्षमा कांग्रेसकी मिनादेवी कार्कीले जितेकी छन् । उनले १ हजार २ सय ६० मत ल्याई विजयी भएकी छन् । उनको निकटतम प्रतिद्वन्द्वी माओवादी केन्द्रका डम्बरबहादुर बस्नेतलाई १ सय ४७ मतान्तरले पराजित गरेकी हुन् । बस्नेतले १ हजार १ सय १३ मत ल्याएका छन् ।

प्रदेश २ मा दुई मेयर प्रमुखमा महिला २ जना मात्रै निर्वाचित भएका छन् । सप्तरीको सुरुंगा नगरपालिकामा कांग्रेसकी गीता चौधरी प्रमुखमा विजयी भएकी छिन् । चौधरीले ७ हजार २ सय ९२ मत ल्याई विजयी भएकी हुन् । उनले निकटतम प्रतिद्वन्द्वी एकिकृत समाजवादीका रामनारायण चौधरीलाई ३ हजार ७५ मतान्तरले पराजित गरेकी हुन् । रौतहटको मौलापुर नगरपािलकामा एमालेकी रीनाकुमारी साह प्रमुखमा विजयी भएकी छिन् । साहले ५ हजार ५ सय ६४ मत ल्याई विजयी भएकी हुन् । माओवादी केन्द्रका रामप्रवेश राय यादवलाई २ हजार ५ सय २ मतान्तरले पराजित गरेकी हुन् ।

यस्तै सिन्धुलीको फिक्कल गाउँपालिका प्रमुखमा एमालेकी उम्मेदवार पार्वती सुनुवार ४ हजार ६२ मत ल्याई विजयी भएकी हुन् । उनले निकटतम प्रतिद्वन्द्वी कांग्रेस उम्मेदवार नृपबहादुर भुजेललाई ४५ मतान्तरले पराजित गरेकी हुन् । पराजित भुजेलले ४ हजार १७ मत ल्याएका छन् । सिन्धुलीकै सुनकोशी गाउँपालिका प्रमुखमा माओवादी केन्द्रकी दिपा वोहोरा ५ हजार ३ सय ७६ मत ल्याई विजयी भएकी छन् । उनले निकटतम प्रतिद्वन्द्वी एमालेका उम्मेदवार रोमनराज गिरीलाई २ सय ७८ मतान्तरले पराजित गरेकी हुन् । पराजित गिरीले ५ हजार ९८ मत ल्याएका छन् । यस्तै काभ्रेपलाञ्चोकको चौरीदेउरालीमा माओबादीका रेणुका चौलागाईले एमालेका जितराम लामालाई हराएकी हुन् । उनले ६ हजार २ सय २८ मत ल्याएकी थिइन भने लामाले ५ हजार ४ सय ६३ मत मात्रै ल्याएका छन् ।

निर्वाचन आयोगका अनुसार चितवनको माडी नगरपालिकाको अध्यक्षमा एमाले उम्मेदवार ताराकुमारी काजी महतोले ९ हजार ९ सय १ मत ल्याई विजयी भएकी छिन् । उनले निकटतम प्रतिद्वन्द्वी माओवादी केन्द्रका उम्मेदवार ऋषिराम काफ्लेलाई २ हजार १ सय ७२ मतान्तरले पराजित गरेकी हुन् । काफ्लेले ७ हजार ७ सय २९ मत ल्याएका छन् ।

कर्णालीको सुर्खेत स्थितवीरेन्द्र नगर नगरपालिका अध्यक्षमा एमाले उम्मेदवार मोहनमाया भण्डारी १६ हजार ३८ मत ल्याई विजयी भएकी छिन् । उनले कांग्रेसका उपेन्द्रबहादुर खड्कालाई ५ सय ५४ मतान्तरले पराजित गरेकी हुन् । दैलेखको भैरवी गाउँपालिका प्रमुखमा कांग्रेसकी रीताकुमारी शाहीले ३ हजार ९ सय ७६ मत ल्याई विजयी भएकी छन् । उनले एमालेकासर्वराज महतारालाई १६ मतान्तरले पराजित गरेकी हुन् । नवलपरासी पश्चिमको सुनवल नगरपालिका अध्यक्षमा एमालेका विमला अर्यालले १४ हजार ८ सय ३८ मत ल्याई विजयी भएकी छिन् । कांग्रेस उम्मेदवार पोखरेललाई ३ हजार २ सय १८ मतान्तरले उनले पराजित गरेकी हुन् ।

यस्तै गण्डकीमा पर्वतको मोदी गाउँपालिका प्रमुखमा एमालेकी हिरादेवी शर्माले ६ हजार १९ मत ल्याई विजयी भएकी छिन् । माओवादी केन्द्रका गुप्तबहादुर ठकुरीलाई उनले १ हजार ३ सय ३९ मतान्तरले पराजित गरेकी हुन् । बाग्लुङको वडिगाड गाउापालिका प्रमुखमा कांग्रेसकी गण्डकी थापा अधिकारीले ७ हजार २ सय ७३ मत ल्याई विजयी भएकी हुन् । एमालेका राजनकुमार पाइजालाई १ हजार ५ सय ७३ मतान्तरले हराउदै उनी बिजयी भएकी हुन् ।