प्रस्तावित ४ राजदूतको नाम संसदीय सुनुवाइबाट अनुमोदित- समाचार - कान्तिपुर समाचार
कान्तिपुर वेबसाईट
AdvertisementAdvertisement

प्रस्तावित ४ राजदूतको नाम संसदीय सुनुवाइबाट अनुमोदित

कान्तिपुर संवाददाता

काठमाडौँ — संसदीय सुनुवाइ समितिले बुधबार प्रस्तावित ४ राजदूतको नाम संसदीय सुनुवाइ समितिबाट अनुमोदन गरेको छ । बुधबार बिहान र बेलुकी गरी दुई पटक समितिले छुट्टाछट्टै सुनुवाइ गर्दै प्रस्तावित चार राजदूतको नाम अनुमोदन गरेको हो ।

यसरी अनुमोदित हुने प्रस्तावित राजदूतहरूमा मिलन तुलाधर (रुस), शर्मिला पराजुली ढकाल (स्पेन), डिल्लीराज पौडेल (मलेसिया) र कान्ता रिजाल (इजरायल) हुन् । उनीहरुलाई सरकारले एक महिनाअघि नै राजदूतमा सिफारिस गरेको थियो । सरकारले २० जनालाई राजदूतमा सिफारिस गरेकोमा ६ जनाको नाम संसदीय सुनुवाइ समितिबाट अनुमोदन भइसकेको छ ।

समितिले मंगलबार चीनका लागि प्रस्तावित राजदूत विष्णुपुकार श्रेष्ठ र दक्षिण अफ्रिकाका लागि प्रस्तावित राजदूत दानबहादुर तामाङको नाम पनि अनुमोदन गरिसकेको छ । अब १४ जना राजदूतहरुको संसदीय सुनुवाइ बाँकी रहेको र हरेक दिन बिहान दुई जना र बेलुकी दुई जना गरी सुनुवाइ गर्ने कार्यक्रम रहेको समितिका सभापति लक्ष्मणलाल कर्णले कान्तिपुरलाई जानकारी दिए ।

प्रस्तावित राजदूतको नाम संसदीय समितिले अनुमोदन गरेपछि उनीहरुको अग्रिमो (स्वीकृति) को लागि सम्बन्धित मुलुकमा पठाइन्छ । सम्बन्धित मुलुकले स्वीकृति दिएपछि कानुन अनुसार राष्ट्रपति विद्यादेवी भण्डारीले राजदूत नियुक्त गर्नेछिन् ।

प्रकाशित : जेष्ठ ४, २०७९ १९:२९
प्रतिक्रिया
पठाउनुहोस्

सप्तरीको राजगढको अध्यक्षमा एमाले र उपाध्यक्षमा जसपा विजयी

अवधेशकुमार झा

राजविराज — सप्तरीको राजगढ गाउँपालिका अध्यक्षमा नेकपा एमालेका ओमप्रकास मण्डल र उपाध्यक्षमा जनता समाजवादी पार्टीका रेणुदेवी मण्डल निर्वाचित भएका छन् । बुधबार सार्वजनिक अन्तिम परिणामअनुसार अध्यक्षमा निर्वाचित मण्डलले ४ हजार १ सय ४९ मत प्राप्त गरेका छन् । उनका निकटतम प्रतिद्वन्द्वी जसपाका सुरेन्द्रप्रसाद यादबले ३ हजार ८ सय ७ मत प्राप्त गरे ।

यस अघि यो पालिकामा अध्यक्ष र उपाध्यक्ष काग्रेसबाट निर्वाचित थिए । निवर्तमान अध्यक्ष समेत रहेका कांग्रेस उम्मेदवार परमानन्द यादब तेश्रो भए । उनले २ हजार ८ सय ९३ मत पाए ।

उपाध्यक्षमा जसपाकी मण्डलले ३ हजार ८ सय ३० मत प्राप्त गरि निर्वाचित भइन् । निकटतम प्रतिद्वन्द्वी एमालेकी रेखाकुमारी यादबले ३ हजार ७ सय ७ मत प्राप्त गरिन् ।

प्रकाशित : जेष्ठ ४, २०७९ १९:२९
पूरा पढ्नुहोस्
प्रतिक्रिया
पठाउनुहोस्
×