डाक्टर प्रीति सगरमाथाको चुचुरोमा- समाचार - कान्तिपुर समाचार
कान्तिपुर वेबसाईट
AdvertisementAdvertisement

डाक्टर प्रीति सगरमाथाको चुचुरोमा

कान्तिपुर संवाददाता

काठमाडौँ — कोभिड-१९ महामारीविरुद्धको लडाइँमा अग्रपंक्तिमा खटिएका स्वास्थ्यकर्मीको सम्मानका लागि काठमाडौंकी ३० वर्षीया चिकित्सकले बिहीबार विश्वकै अग्लो शिखर सगरमाथा आरोहण गरेकी छन् । 

उनको आरोहण दलको व्यवस्थापन गर्ने हिमालयन सेफर्ड इको टुरिजमका प्रबन्ध निर्देशक पेम्बा दोर्जे शेर्पाका अनुसार ग्रान्डी अन्तर्राष्ट्रिय अस्पतालमा मेडिकल अफिसर पदमा कार्यरत अर्घाखाँचीकी प्रीति भुषालले बिहान साढे ८ बजे सगरमाथा चुचुरोमा पाइला राखेकी थिइन् । शेर्पाले सगरमाथा आरोहण गर्ने प्रिति पहिलो नेपाली महिला चिकित्सक भएको दाबी गरेका छन् ।

सगरमाथा आधार शिविरमा रहेका शेर्पाले बिहीबार करिब ९० जनाले सगरमाथामा सफल आरोहण गरेको जानकारी दिए । चिकित्सक प्रीतिको आरोहण दलमा रहेका छिरिङ जाङ्बु शेर्पालगायत ५ जना थिए । ती सबैले आरोहण सकेको शेर्पाले बताए ।

‘कोभिड महामारीका बेला फ्रन्टलाइनर चिकित्सक, नर्स, फर्मासिस्ट, अस्पताल प्रशासनका कर्मचारी, सरसफाइमा खटिने मजदुर, एम्बुलेन्स चालक, सामाजिक कार्यकर्ताहरूलगायतको योगदानको उच्च सम्मान गर्न सगरमाथा आरोहण गर्दै छु,’ आरोहणका लागि आधार शिविरमा जाँदै गर्दा उनले वैशाख पहिलो साता भनेकी थिइन् ।

बंगलादेशको राजधानी ढाकाबाट एमबीबीएस अध्ययन गरेकी भुषालले आफ्नो आरोहण अभियानले जलवायु परिवर्तनको असर र उच्च हिमाली भेगमा बढ्दै गइरहेको प्रदूषणबारे पनि जागरण गराउने बताएकी थिइन् ।

प्रकाशित : वैशाख २९, २०७९ १५:४१
प्रतिक्रिया
पठाउनुहोस्

४ दिनसम्म बढेको सेयर बजार पाँचौ दिनमा घट्यो 

कान्तिपुर संवाददाता

काठमाडौँ — अघिल्ला ४ दिनसम्म लगातार बढेको सेयर बजार बिहीबार भने घटेको छ । परिसूचक नेप्से बिहीबार १८.६४ अंक घटेर २३५० मा कायम भएको छ । कुल २ अर्ब ३२ करोड रुपैयाँको कारोबार भयो । ३४ कम्पनीको मूल्य बढ्दा ९ को स्थिर रह्यो भने १५१ को घट्यो । 

उत्पादन र अन्यबाहेकका सबै उपसमूह घटेका छन् । उत्पादन ८० र अन्य उपसमूह ७ अंकले बढे । बैंकिङ १, विकास बैंक ८९, फाइनान्स ९, होटल तथा पर्यटन ३४, जलविद्युत् ५३, जीवन बीमा २५७, माइक्रोफाइनान्स ७४, निर्जीवन बीमा ८३ र ब्यापार उपसमूह २९ अंकले घटे । जाल्पा लघुवित्तको मूल्य १० र तेह्रथुम पावरको ६ प्रतिशत बढ्यो । कारोबार रकमका आधारमा शिवम् सिमेन्ट, राधि विद्युत्, अरुणभ्याली हाइड्रो, प्राइम लाइफ इन्स्योरेन्स र ङादी ग्रुप क्रमश: अगाडि रहे ।


प्रकाशित : वैशाख २९, २०७९ १५:२६
पूरा पढ्नुहोस्
प्रतिक्रिया
पठाउनुहोस्
×