सगरमाथामा रसियन आरोहीको मृत्यु- समाचार - कान्तिपुर समाचार

सगरमाथामा रसियन आरोहीको मृत्यु

यस वर्षको वसन्तयाममा आरोहणका क्रममा एक नेपालीसहित चार जनाको मृत्यु
सुरज कुँवर

काठमाडौँ — सगरमाथा आरोहणका लागि गएका आरोहण अभ्यासका क्रममा शनिबार साँझ पहिलो शिविरमा रसियन नागरिकको मृत्यु भएको छ । पर्यटन विभागका महानिर्देशक तारानाथ अधिकारीका अनुसार, सगरमाथा आरोहण अभ्यासका क्रममा ६४ सय मिटरको उचाईमा रहेको दोस्रो शिविरबाट ६ हजार मिटरमा रहेको पहिलो शिविरमा फर्किएका रसियन नागरिक ५५ वर्षीय पावेल कोस्ट्रीकिनको मृत्यु भएको हो

पावेल सम्मिलित आरोहण दलको व्यवस्थापन गरिरहेको काठमाडौंस्थित सेभेन समिट क्लब प्रालिले उचाईमा अक्सिजनको अभाव (अल्टीच्यूट सिकनेस) का कारण उनको मृत्यु भएको जनाएको छ । आरोहण दलको सदस्यका रुपमा पावेल चैत अन्तिम साता काठमाडौंबाट लुक्ला हुँदै सगरमाथा गएका थिए ।

सेभन समिटका मिङ्मा गेलु शेर्पाका अनुसार, आरोही पावेलको शव आइतबार अल्टिच्यूट हेलिकप्टरबाट काठमाडौं ल्याइएको छ । पावेलको शव उनको पारिवारिक सदस्यलाई सोमबार बुझाइने शेर्पाले बताए । मृतक पावेल रसियाली नागरिक एलेक्जेन्डर एब्रामुभको नेतृत्वको आरोहण दलका सदस्य थिए । उक्त आरोहण दलमा १२ रसियन, एक अमेरिकी र एक इजारयली नागरिक गरी १४ जना सदस्य थिए ।

विभागका अधिकृत भिष्मराज भट्टराईका अनुसार, यस वर्षको वसन्तयामको आरोहण सिजनमा सगरमाथामा ज्यान गुमाउने पावेल दोस्रो व्यक्ति हुन् । यसअघि वैशाख १ गते सगरमाथाको दोस्रो शिविरमै एक नेपाली आरोहण सहयोगी निङ्मा तेञ्जिङ शेर्पाको पनि मृत्यु भएको थियो । यसअघि धौलागिरि आरोहण सकेर फर्कंदै गर्दा चैत २९ मा ग्रीसका नागरिक एन्टिनिओस् शिकारिसको मृत्यु भएको थियो । त्यस्तै गत बिहीबार कञ्चनजंघा आरोहणका क्रममा भारतीय नागरिक नारायणन ऐय्यरको मृत्यु भएको भट्टराईले बताए ।

विभागले आइतबारसम्म यस सिजनका लागि सगरमाथासहित २७ वटा हिमाल आरोहणका लागि ७४ वटा मुलुकका ९ सय ५३ जनालाई अनुमति दिइसकेको छ । जसमा सगरमाथा आरोहणका लागिमात्रै नेपालसहित ५८ देशका ३ सय १७ जना सगरमाथा आरोहणमा गएका छन् । जसमा नेपालका २१ जना आरोहण दलका सदस्य छन् । विभागका अनुसार यो सिजनमा सगरमाथा, ल्होत्से र नुप्चे हिमाल आरोहणका लागि सगरमाथा आधार शिविरमा १५ सय जना पुगेका छन् । त्यसमा ५ सय १५ आरोही छन् । बाँकी गाइड, भरिया, सम्पर्क अधिकृतलगायत छन् । विभागले यसपटक आरोहण अनुमति जारी गरेबापत ४७ करोड ४६ लाख रुपैयाँ सलामी दस्तुर संकलन गरेको छ ।

प्रकाशित : वैशाख २५, २०७९ २१:५६
प्रतिक्रिया
पठाउनुहोस्

अक्षय कुमारले बोलाएका थिए, म गइनँ : निम्सदाइ 

सुरज कुँवर

काठमाडौँ — विश्वका १४ वटा आठ हजार मिटर अग्ला हिमाल ७ महिनाभित्र आरोहण गरेर विश्व कीर्तिमान कायम गरेका म्याग्दीका निर्मल पुर्जा (निम्सदाइ)लाई बलिउड अभिनेता अक्षय कुमारले टिभी रियालिटी शोका लागि निम्तो दिएको तर आफू नगएको खुलासा गरेका छन् । 

१४ वटा हिमाल आरोहणका लागि बनाइएको 'प्रोजेक्ट पोसिबल' अभियान र गत वर्षको हिउँदमा भएको केटू हिमाल आरोहण सकिएपछि ३८ वर्षीय पुर्जालाई बलिउड अभिनेता अक्षय कुमारले सहासिक टिभी रियालिटी शोका लागि अफर गरेका थिए । तर, पुर्जाले उक्त प्रस्तावलाई स्वीकारेनन् ।

‘जंगलमा सुटिङ गर्ने साहसिक रियालिटी शोका लागि अक्षय कुमारले बोलाएका थिए तर म गइनँ,’ कान्तिपुरसँगको छुट्टै भेटमा पुर्जाले भने, ‘म अक्षय कुमारको फ्यान हुँ तर पारिश्रमिकमा चित्त बुझेन ।’

नेपाल, तिब्बत र पाकिस्तानका १४ वटा ८ हजार अग्ला हिमाल आरोहणमा विदेशी आरोहीले ८ वर्ष लगाएका थिए । यो रेकर्ड पुर्जाले ६ महिना ६ दिनमा तोड्दै विश्वका पर्वतारोही लगायतलाई चकित पारे । यसपछि उनले ३३ वर्षदेखि हिउँदयाममा आरोहण प्रयास भइरहेको तर सफलता हात लागि नसकेको विश्वकै दोस्रो अग्लो ज्यानमारा पाकिस्तानको केटू हिमाल गत वर्षको हिउँदमा १० नेपालीसहित आरोहण गरेर सफलता हात पारे ।

यी दुई फरक आरोहणपछि पुर्जा सबैभन्दा महँगा गाइडका रुपमा काम गरिरहेका छन् । उनी बार्गेनिङ गर्ने, जस्तोसुकै आरोहण दलसँग सम्झौता गरेर हिमाल चढाउँदैनन् ।

सोमबार विश्वभरका १ सय ९१ देशका २१ करोड नेटफिल्क्सका पेड–मेम्बरमाझ एकैसाथ ३१ वटा भाषामा प्रिमियर हुन लागेको उनीमाथि बनाइएको ‘फोर्टिन पिक्स : नथिङ इज इम्पोसिबल’ डकुमेन्ट्री सार्वजनिक हुनुअघि पर्यटनमन्त्री प्रेमबहादुर आलेलाई भेट्न सिंहदरबार पुगेका पुर्जाले अबको समय नेपालको पर्यटनमा खर्चिने बताए ।

‘मेरो डुकेन्ट्रीले नेपालको सिनेमादेखि पर्यटन क्षेत्रसम्म नयाँ आशा दिनेछ,’ उनले भने, ‘म चाँडै बेअर ग्रिल्सलाई ल्याउँदै छु । उनीसँग कुरा भइसकेको छ ।’ डिस्कभरी च्यानलमा जिउँदै किरा फट्यांग्रा खाँदै जंगल हिँड्ने बेलायती एडभेन्चरर बेअर ग्रिल्सको ‘म्यान भर्सेस वाइल्ड’ शो विश्वभर प्रख्यात छ ।

नेपाल आइसकेका बेअरले सन् २०१९ मा भारतीय प्रधानमन्त्री नरेन्द्र मोदीलाई उत्तराखण्डको जंगलमा सँगै घुमाउँदै ‘म्यान भर्सेस वाइल्ड’ सुटिङ गरेका थिए ।


प्रकाशित : मंसिर १२, २०७८ २०:१७
पूरा पढ्नुहोस्
प्रतिक्रिया
पठाउनुहोस्
×