सगरमाथा आरोहण गर्दै सागर

होचापुड्का संघका सदस्यसमेत रहेका सुनार काठमाडौंको हिमालयन सेफर्ड इको टुरिजमको व्यवस्थापनमा हुन लागेको आरोहण दलका सदस्यका रुपमा सगरमाथा जान लागेका हुन । उनले ६ महिनाअघि दोलखाको रोलवालिङ क्षेत्रमा पर्ने ५ हजार ९ सय २५ मिटर उचाइको रामदुङ हिमाल आरोहण गरिसकेका छन् ।

पेशाले सुनका गहना बनाउने कालिगढ सुनारले अशक्तता भएका व्यक्तिहरुका मुद्दा उठाउँदै वसन्तकालीन हिमाल आरोहणमा जान लागेको बताए । ‘विश्वकै सबैभन्दा अग्लो हिमाल आरोहण गर्ने विश्वकै सबैभन्दा होचो व्यक्तिको लक्ष्य राखेको छु’ उनले कान्तिपुरसँग भने, ‘मेरो उद्देश्य होचापुड्कामाथि सामाजिक रुपमा हुने भेदभावलाई घटाउने, जलवायु परिवर्तनको असरबारे जागरण फैलाउने पनि हो ।’

हिमालयन सेफर्डका चार शेर्पा सहयोगी र गाइड पेम्बा दोर्जे शेर्पाको साथमा आरोहणको तयारीमा रहेका सुनारले सगरमाथा आरोहणमा विभिन्न संस्था र व्यक्तिको आर्थिक सहयोग संकलन गरिरहेको भन्दै आरोहणमा करिब ८० लाख खर्च हुने बताए ।

यसैबीच पर्यटन विभागले आइतबारसम्म सगरमाथासहित २२ वटा हिमाल आरोहणका लागि १ सय ५५ महिला र ५ सय ८५ पुरुष गरी ७ सय ४० जनालाई आरोहण अनुमति दिइसकेको छ । ९१ वटा आरोहण दलबाट विभागले ३९ करोड ५२ लाख सलामी दस्तुर संकलन गरिसकेको छ ।