राखेप सदस्य सचिवबाट नहटाउन माग राख्दै सिलवालले दायर गरेको रिट खारेज
काठमाडौँ — राष्ट्रिय खेलकुद परिषद् (राखेप)को सदस्य सचिवबाट सरकारले कानुनविपरीत हटाएको भन्दै रमेश सिलवालले दायर गरेको रिट सर्वोच्च अदालतले खारेज गरिदिएको छ । मंगलबार न्यायाधीशद्वय अनिलकुमार सिन्हा र कुमार रेग्मीको संयुक्त इजलासले रिट खारेज गर्ने आदेश दिएको हो ।
सरकारले कात्तिक १ गते सिलवाललाई राखेपको सदस्य सचिवबाट बर्खास्त गरेको थियो । सरकारले सोधेको स्पष्टीकरणको चित्तबुझ्दो जवाफ नआएको भन्दै सरकारले उनलाई बर्खास्त गरेको थियो । त्यसरी बर्खास्त गर्नु कानुनविपरीत भएको भन्दै सिलवाल सर्वोच्च अदालतमा रिट दायर गर्न पुगेका थिए । उनलाई केपी शर्मा ओली नेतृत्वको सरकारले सदस्य सचिवमा नियुक्त गरेको थियो ।
सिलवाललाई हटाएर शेरबहादुर देउवा नेतृत्वको सरकारले टंकलाल घिसिङलाई सदस्य सचिवमा नियुक्त गरेको थियो ।
प्रकाशित : चैत्र २२, २०७८ १८:००