म्यादीमा विद्यार्थीदेखि गृहिणीसम्म- समाचार - कान्तिपुर समाचार
कान्तिपुर वेबसाईट
AdvertisementAdvertisement

म्यादीमा विद्यार्थीदेखि गृहिणीसम्म

कान्तिपुर टिम

काठमाडौँ — उनले रहर पुग्ने गरी पढ्न पाइनन् । १६ वर्षमै विवाह भयो । विवाहपछि घरपरिवारमा खासै मिल्ती भएन । काभ्रेपलाञ्चोक भुम्लुकी कविता श्रेष्ठले श्रीमान्लगायत परिवारको यातना खेप्न नसकेपछि ६ महिनाको छोरा च्यापेर घरबाट निस्किइन् र कहिल्यै घर फर्किनन् । अहिले उनका छोरा १४ वर्षका भए । ‘छोरालाई हुर्काउन धेरै संघर्ष गर्नुपर्‍यो,’ उनले भनिन्, ‘ठूला सपना छैनन्, छोरालाई पढाएर सक्षम नागरिक बनाउनु छ ।’

काठमाडौं बूढानीलकण्ठ–१० कपनमा घर सफा गरेर र कपडा धोएर गुजारा चलाउँदै आएकी ३२ वर्षीया कविता टेकुस्थित महानगरीय प्रहरी परिसर काठमाडौंमा म्यादी प्रहरीमा भर्ना हुन फाराम भर्ने लाममा भेटिइन् । ‘उमेर छँदा प्रहरी बन्ने रहर थियो, त्यो रहरमै सीमित भयो,’ उनले भनिन्, ‘म्यादी बनेर प्रहरीको अनुभव गर्ने मन छ । केही दिनकै लागि भए पनि सरकारी जागिरे बन्ने धोको छ ।’

त्यस्तै, दोलखा मेलुङ गाउँपालिका–७ सितलीका २३ वर्षीय मिलन कार्की कोरिया जान भाषा सिक्दै थिए । कोभिड–१९ महामारी रोकथाम तथा नियन्त्रणका लागि भन्दै पटक–पटक लकडाउन भयो । कोरियाली भाषाको कक्षा खासै प्रभावकारी भएन ।

‘जागिर छैन, भाषा कक्षा पनि त्यति राम्रो भएको छैन, अस्थायी रूपमै भए पनि सरकारी जागिरे बन्नुपर्‍यो भन्ने सोच आयो,’ उनले भने, ‘म्यादीको अनुभवले विदेशमा सेक्युरिटीमा जान पाइन्छ भन्ने पनि सुनेको छु ।’

उपत्यकाका तीन जिल्लाका प्रहरी कार्यालयमा ५ हजार जनाभन्दा बढीले म्यादी प्रहरीका लागि आवेदन दिएका छन् । लाममा कतिपय महिला बच्चा च्यापेरै उभिएका थिए । महानगरीय प्रहरी कार्यालय रानीपोखरीका प्रवक्ता एसपी सन्तोषसिंह राठौरका अनुसार आगामी वैशाख ३० मा हुने स्थानीय तह निर्वाचनका लागि काठमाडौं उपत्यकामा ४ हजार ७ सय ३५ जना म्यादी प्रहरी भर्ना लिइँदै छ । महानगरीय प्रहरी परिसर भक्तपुर र ललितपुरमा पनि म्यादी बन्न चाहने युवाको भीड छ ।

पहिलो संविधानसभा र पछिल्लो २०७४ को निर्वाचनमा म्यादी प्रहरी भइसकेका जितेन्द्रसिंह धामी यसपालि पनि म्यादीको लाइनमा उभिएका थिए । कञ्चनपुरको वेदकोट–६ सिसैयाका उनी तेस्रोपटक म्यादी प्रहरी हुन आवेदन दिन लागेका हुन् । निजी विद्यालयमा बसचालक उनलाई ४० दिन भए पनि घर खर्च चलाउन आम्दानी हुने आस छ । ‘म्यादी हुँदा थोरै भए पनि सरकारी सेवाको अनुभवसँगै अलिअलि खर्च पनि आउँछ,’ सोमबार जिल्ला प्रहरी कार्यालय कञ्चनपुरमा लाम लागेका धामीले भने, ‘सुरुमा जागिर खान सजिलो हुन्छ भन्ने थियो, अब त्यो उत्साह छैन, घर खर्च जुटाउने चिन्ता छ ।’

वेदकोटका २० वर्षीय नरेश धामीको भने म्यादी हुन आउनुसँग भविष्य पनि जोडिएको छ । सेना वा प्रहरीमा जागिर खाने उनको धोको छ । त्यही पूरा गर्ने चरणका रूपमा यो भर्नालाई लिएका छन् । बुबाआमाले खेतीपाती गरेर उनलाई १२ कक्षासम्म पढाएका हुन् । ‘अब अगाडि पढ्न सकिने अवस्था छैन,’ उनले भने, ‘अरू जागिर खान पनि सकिँदैन, आर्मी वा प्रहरीमै भर्ती हुने इच्छा छ ।’ घरमै बसेका उनलाई छोटो अवधि भए पनि रोजगारी पाइने भएकाले यसतर्फ रुचि भएको हो ।

‘बिहानै आएको अहिलेसम्म लाइनमै छु, साँझसम्म पालो आउँछ, आउँदैन,’ शुक्लाफाँटा–११ कलुवापुरकी सुनिता रानाले भनिन्, ‘म्यादीमा भर्ना हुने रहर छ ।’ उनी पहिलो पटक भर्ना हुन आएकी हुन् । १२ कक्षा सकेर घरायसी काममै व्यस्त उनी म्यादी भर्ना खुलेको थाहा पाएपछि साथीहरूसँगै जिल्ला प्रहरी पुगेकी हुन् । ‘सुरक्षाकर्मीको शारीरिक अभ्यास निकै मन पर्छ,’ शुक्लाफाँटा–११ कलुवापुरकी २७ वर्षीया सरिता रानाले भनिन्, ‘पढेलेखेर पनि काम पाउन गाह्रो छ, घरमै खेतीपातीको काम गरिरहेका हामीहरूलाई यो अनुभव पनि ठूलो हुन्छ ।’ कञ्चनपुरमा १ हजार ४ सय ६९ म्यादीको कोटा आएको छ ।

उता मधेसका जिल्लाहरू धनुषा र सप्तरीमा पनि म्यादी प्रहरीमा आवेदन दिने युवायुवतीको भीड लागेको छ । धनुषा प्रहरीका डीएसपी जितेन्द्र बस्नेतका अनुसार ३ हजार ४ सय ८६ जना म्यादीका लागि आइतबार मात्रै एक हजार जनाले फाराम लिइसकेका थिए । सप्तरी प्रहरीका डीएसपी माधवप्रसाद काफ्लेका अनुसार राजविराजस्थित राज रंगशालामा म्यादी प्रहरी भर्नाका लागि आवेदन लिने काम भइरहेको छ । ३ हजार १ सय ३९ जना म्यादीका लागि आइतबारै २५ सय जनाले फाराम लिएका थिए ।

कक्षा १२ पास गरेका पश्चिम नवलपरासीको सुनवल–१३ का २३ वर्षीय राजीव मगर विदेश जाने तयारीमा छन् । सेक्युरिटी गार्डमा विदेश जान खोजेकाले उनलाई अनुभवको खाँचो छ । म्यादी प्रहरीमा भर्ना भएमा राम्रो कम्पनीमा सेक्युरिटी गार्डमा काम पाइने आशाले जिल्ला प्रहरी कार्यालय पश्चिम नवलपरासीको गेटअगाडि फाराम भर्न लाइनमा भेटिएका उनले सुनाए । ‘अध्ययनअनुसार काम पाइएन, विदेश जाने तयारीमा छु,’ उनले भने, ‘म्यादी प्रहरीको तालिमको सर्टिफिकेट पाइयो भने विदेशमा राम्रो कम्पनीमा सेक्युरिटीको जागिर पाइन्छ रे ।’

बर्दघाट–७ की शान्ति चौधरी यसअघिको स्थानीय चुनावमा पनि म्यादी प्रहरीमा भर्ना भएकी थिइन् । स्नातकसम्म अध्ययन गरेकी उनले यसबीचमा कुनै रोजगारी पाइनन् । श्रीमान्को कमाइको भरमा बस्नुपर्ने भएपछि अहिले पनि भर्ना हुन आएको उनले बताइन् । ‘अरू अवसर पाउन सकिएन, यसअघि पनि भर्ना भएकाले अहिले अनुभवका आधारमा छनोट हुन्छु भन्ने लागेको छ,’ उनले भनिन् । जिल्लामा ७ स्थानीय तह छन् । १ हजार २९ जना म्यादी प्रहरी भर्ना गर्न लागिएको प्रहरी उपरीक्षक मनोजकुमार यादवले बताए ।

स्नातक तह पढिरहेकी दोलखा तामाकोसी–२ झुलेकी २० वर्षीया संगीता योञ्जन र उनकी बहिनीले जिल्ला प्रहरीमा म्यादीका लागि आवेदन दिए । केही दिनका लागि भए पनि रोजगारी पाइने भएकाले आवेदन दिएका हुन् । दोलखामा ७ सय ९५ जना म्यादी माग गरिएको छ ।

अघिल्ला दुई चुनावमा म्यादी प्रहरी भइसकेका सिन्धुलीको तीनपाटन–१ छरछरेका ५३ वर्षीय धनबहादुर मोक्तानले म्यादीको जागिरले घरखर्चमा मद्दत पुग्ने बताए । सिन्धुलीमा १ हजार १ सय ६८ म्यादी भर्ना लिइँदै छ ।

पाल्पाको पूर्वखोलाका २६ वर्षीय कृष्ण पाण्डे जिल्ला प्रहरी कार्यालय रूपन्देहीमा थिए । लामो लाममा पालो कति बेला आउँछ भन्दै गर्मीमा पर्खिरहेका उनले जहाँबाट पनि म्यादीमा आवेदन दिन पाइने भएपछि भैरहवा आएको बताए । ‘बुटवलमा बसेर लुम्बिनी वाणिज्य क्याम्पसमा स्नातक तह पहिलो वर्षको जाँच दिएँ,’ उनले भने, ‘अर्को वर्षको कक्षा नचलुन्जेल जागिर गरम् भनेर आएको हुँ ।’

शुद्धोधन–८ का अमृत खड्का पालो कुरिरहेका थिए । उनले बीएड अध्ययन गरेको बताए । ‘यसपछि अन्य जागिर खोज्ने बाटो खुला होला,’ उनले भने । पहिले एक ठाउँमा काम गरेको अनुभव बटुलिसकेका उनले प्रहरीमा भर्ती हुने रहरले पनि म्यादी हुन आएको बताए ।

मायादेवी–८ की अनिता विकले पैसा कमाउन भर्ती हुन आएको बताइन् । उनले भनिन् ‘जागिर खाने मन छ ।’ रूपन्देहीका लागि २ हजार ३ सय ६० जनाको माग छ ।

पाल्पामा आवेदन दिनेको भीड छ । स्थानीय तह निर्वाचनका लागि म्यादी प्रहरीको भर्ना खुलेसँगै फाराम भर्नेको भीड लागेको प्रहरीका सूचना अधिकारी लक्ष्मण पचभैयाले बताए । म्यादीमा भर्ना हुन आउनेमा पाल्पामा महिलाको संख्या भने कम छ । पाल्पामा १ हजार २१ जना म्यादी प्रहरीको माग छ ।

पाँचथरमा जिल्ला प्रहरी कार्यालय पुगेका युवायुवतीले घण्टौं लाममा उभिएर म्यादी प्रहरीका लागि आवेदन भरेका छन् । यसरी लाम लाग्नेमा स्नातकोत्तर गरिसकेकासँगै यसअघिका निर्वाचनमा म्यादीको अनुभव लिइसकेकासम्म छन् । भर्ना हुन आउनेमा आमाहरूको संख्या पनि उत्तिकै छ । केही महिला छोराछोरी बोकेरै दरखास्त बुझाउने लाइनमा बसेका देखिए । जिल्लामा ९ सय १६ जना म्यादी भर्ना लिइँदै छ । एकै दिन ३ सय जनाले दरखास्त दिएको जिल्ला प्रहरीका सूचना अधिकारी डम्बर विश्वकर्माले बताए ।

स्थानीय तहको निर्वाचनमा नेपाल प्रहरीको सहयोगीका रूपमा जवानसरह सुविधासहित ४० दिन कार्यावधि तोकेर प्रहरी प्रधान कार्यालयले आइतबारबाट देशभर एकसाथ म्यादी प्रहरीको भर्नाका लागि आवेदन खुलाएको हो । फाराम भर्ने म्याद चैत ११ सम्म छ ।

प्रकाशित : चैत्र ८, २०७८ ०७:३६
प्रतिक्रिया
पठाउनुहोस्

प्रमुख दलका नेता-कार्यकर्ता गाउँ पसे

विपक्षी कार्यकर्ता र जनप्रतिनिधिलाई पार्टीमा भित्र्याउन होडबाजी
भेला, प्रशिक्षण र संगठन विस्तारमा तीव्रता
कान्तिपुर टिम

काठमाडौँ — स्थानीय तहको निर्वाचन नजिकिएसँगै मुख्य राजनीतिक दलले चुनावी अभियानलाई तीव्रता दिएका छन् । एमाले, कांग्रेस, माओवादी, एकीकृत समाजवादीका शीर्ष नेता विभिन्न जिल्ला पुगेर चुनावी कार्यक्रम थालेका छन् । गाउँमा नेता तथा कार्यकर्ताको चहलपहल ह्वात्तै बढेको छ । पार्टीका झन्डाले गाउँ रंगिन थालेका छन् । निर्वाचन नजिकिएसँगै विपक्षी दलका कार्यकर्ता र जनप्रतिनिधिलाई पार्टीमा भित्र्याउन होडबाजी नै चलेको छ । कतिपय ठाउँमा उम्मेदवारको दाबी गर्दै पार्टी फेर्ने क्रम पनि बढेको छ । 


वैशाख ३० को स्थानीय तह निर्वाचन लक्षित गरी प्रदेश १ मा एमाले, कांग्रेस र माओवादी केन्द्रले मोरङबाट प्रदेशस्तरीय कार्यक्रम सुरु गरेका छन् । एमाले अध्यक्ष केपी शर्मा ओलीले केही दिनअघि मोरङको पुरानो सदरमुकाम रंगेलीबाट निर्वाचन लक्षित तराई मधेस जनसभाबाट प्रदेशस्तरीय कार्यक्रमको सुरुवात गरे । त्यहाँ ओलीले माओवादी केन्द्रबाट निर्वाचित रंगेली नगर प्रमुख दिलीपकुमार अग्रवाल र उपप्रमुख केशवकुमारी खराललाई एमालेमा भित्र्याए । एमाले मोरङले उम्मेदवार छनोटका लागि वडामा जिल्ला सदस्य, पालिकामा प्रदेश सदस्य र संघीय निर्वाचन क्षेत्रमा केन्द्रीय सदस्यलाई परिचालन गरेको जिल्ला अध्यक्ष ऋषिकेश पोखरेलले बताए ।

कांग्रेस नेता शेखर कोइराला, उपसभापति धनराज गुरुङ र महामन्त्री गगन थापासहितका नेताले पनि विराटनगरबाट निर्वाचनलक्षित प्रदेशस्तरीय कार्यक्रमको सुरुवात गरे । प्रदेशका सबै जिल्लाका सभापतिको सहभागिता रहेको कार्यक्रममा नेताहरूले एक्लै चुनाव लड्ने मनस्थिति लिएर चुनावी अभियानमा लाग्न निर्देशन दिए । कांग्रेसले प्रदेश १ का १४ वटै जिल्लामा उम्मेदवार छनोटका लागि केन्द्रीय सदस्य खटाएको छ । मोरङ कांग्रेस सभापति डिगबहादुर लिम्बूले भने केन्द्रीय सदस्यले खटाएको अनुगमन समितिले गाउँ, वडा र नगरबाट सिफारिस गरेका व्यक्तिलाई सबै जिल्लामा एकै दिन उम्मेदवार तोक्ने तयारी छ ।

माओवादी केन्द्रले पनि आइतबार विराटनगरबाट चुनाव लक्षित कार्यक्रम थालेको छ । अध्यक्ष पुष्पकमल दाहाल, वरिष्ठ नेता नारायणकाजी श्रेष्ठ, अर्थमन्त्री जनार्दन शर्मा, केन्द्रीय सदस्य राम कार्की प्रदेशभरिका अगुवा कार्यकर्ताको प्रशिक्षण कार्यक्रममा सहभागी भए । दाहालले एमालेसँग तत्काल सहकार्यको सम्भावना नरहेको बताउँदै स्थानीय निर्वाचनमा होमिन निर्देशन दिए । प्रदेशका अन्य जिल्लामा पनि नेताहरूलाई बोलाएर चुनावी सरगर्मी बढाउने पार्टीको तयारी रहेको माओवादी केन्द्रको प्रदेश कमिटी सचिव गणेश उप्रेतीले बताए । एकीकृत समाजवादी, जनता समाजवादी र लोकतान्त्रिक समाजवादी पार्टीले पनि शीर्ष नेतालाई नै सहभागी गराएर निर्वाचन केन्द्रित कार्यक्रमको तयारी भइरहेको जनाएका छन् ।

गत बिहीबार प्रधानमन्त्री तथा कांग्रेस सभापति शेरबहादुर देउवा वीरगन्जका दुई कार्यक्रममा सहभागी भए । पर्सा कांग्रेसमा आफ्ना पक्षीय पदाधिकारी निर्वाचित भएपछि बधाई दिने कार्यक्रममा सहभागी उनले पार्टीको आन्तरिक चुनाव सकिएकाले अब आउने चुनावमा केन्द्रित हुन निर्देशन दिए । गत शनिबार एमाले अध्यक्ष केपी शर्मा ओली पनि वीरगन्ज पुगे । उनले महानगर प्रमुख विजय सरावगीलाई पार्टी प्रवेश गराउँदै स्थानीय तह निर्वाचनलाई तरंगित बनाइदिए ।

कांग्रेस नेता विमलेन्द्र निधि साता लामो जनकपुर बसाइँमा स्थानीय निर्वाचन लक्षित गतिविधिमा सक्रिय रहे । धनुषा कांग्रेसमा आफूपक्षीय पदाधिकारी निर्वाचित भएपछि हौसिएका उनले स्थानीय चुनावमा पनि कांग्रेसको पकड बलियो बनाउन उम्मेदवारको चाहना बुझ्ने प्रयास गरे । एमाले उपाध्यक्ष ईश्वर पोखरेलले सोमबार जनकपुरमा पार्टीको जिल्ला अधिवेशन उद्घाटन गर्दै स्थानीय निर्वाचन एमालेमय बनाउन आग्रह गरे । लोकतान्त्रिक समाजवादी पार्टी (लोसपा) का अध्यक्ष महन्थ ठाकुर पनि केही दिनयता मधेसमै छन् । उनले जिल्ला भ्रमण गर्दै स्थानीय निर्वाचनमा पार्टीको प्रभाव बढाउन नेता–कार्यकर्तालाई उत्साह दिइरहेका छन् । नेकपा एकीकृत समाजवादीका अध्यक्ष माधवकुमार नेपाल शुक्रबार गृहजिल्ला रौतहट पुगे । स्थानीय तहको निर्वाचनमा माओवादी, कांग्रेस र जनता समाजवादी पार्टीसित गठबन्धनका लागि गृहकार्य भइरहेको उनले बताए ।

आइतबारदेखि कांग्रेसले सबै जिल्लामा एकसाथ ‘घर–घर जाऔं, कांग्रेस जिताऔं’ अभियान सुरु गरेको छ । एमालेले टोलसम्म संगठन विस्तारसँगै चुनावी अभियान थालेको छ । माओवादी केन्द्रले पालिका र वडा तहसम्मै इन्चार्ज खटाएर संगठन विस्तार गरिरहेको छ । चितवनमा मुख्य दलहरूले चैतसँगै औपचारिक रूपमा नै चुनावी अभियान थाल्ने भएका छन् । माओवादी केन्द्र र एकीकृत समाजवादीले चैत पहिलो साताबाटै कार्यक्रम गर्ने तयारी गरेका छन् ।

२०७४ को स्थानीय निर्वाचनको साख जोगाउने गरी सिन्धुलीमा पनि दलहरूले निर्वाचन केन्द्रित गतिविधि सञ्चालन गरिरहेका छन् । २०७४ मा यहाँ एमाले, कांग्रेस र माओवादी केन्द्रले तीन/तीन पालिकामा जितेका थिए । एमालेले वडा तथा पालिकास्तरीय संगठन विस्तारलाई तीव्रता दिएको अध्यक्ष कुमारबहादुर कार्कीले बताए । माओवादी केन्द्रले निर्वाचन लक्षित गरी पालिका भेला, प्रशिक्षण, पार्टी प्रवेश कार्यक्रम भइरहेको जिल्ला इन्चार्ज लेखनाथ दाहालले बताए ।

रसुवामा एमालेले स्थानीय तहदेखि जिल्लासम्म प्रशिक्षण कार्यक्रम सञ्चालन गर्ने तयारी भइरहेको जिल्ला सचिव जनार्दन ढकालले बताए । माओवादी केन्द्रले पनि पालिका र वडामा अभियान सञ्चालन गर्न पार्टी हरेक सदस्यसम्म पुग्ने गरी प्रशिक्षण कार्यक्रम राख्न लागेको जनाएको छ । दोलखामा पनि मुख्य दलहरूले गाउँसम्मै दैनिक भेला तथा बैठक गरिरहेका छन् । एमालेले निर्वाचनलाई लक्षित गरेर पहिलो चरणमा भेला तथा बैठकलगायतका कार्यक्रम गरिसकेको जिल्ला उपाध्यक्ष राजेन्द्र मानन्धरले बताए । कांग्रेसले आइतबारबाट चुनाव केन्द्रित गरेर ‘घरघर जाऔं, कांग्रेस जिताऔं’ अभियान मेलुङबाट सुरु गरेको सभापति बर्मा लामाले बताए । माओवादी केन्द्रले पनि स्थानीय चुनावलाई लक्षित गरेर वडा कमिटी निर्माणदेखि भेला बैठक सकिसकेको छ ।

यस्तै, गण्डकी प्रदेशमा पनि दलहरूले भेला, प्रशिक्षणलगायतका गतिविधि बढाएका छन् । पार्टीको नीति, सिद्धान्त, कार्यक्रम र घोषणापत्रभन्दा पनि कसलाई उम्मेदवार बनाउँदा जित्न सकिन्छ भन्नेतर्फ पनि दलहरू केन्द्रित छन् । एमाले, कांग्रेस, माओवादी केन्द्रलगायत मुख्य दलहरू टोलमै पुगेर कार्यकर्ता प्रशिक्षणमा खटिएका छन् । एमाले केन्द्रीय सचिव एवं गण्डकी प्रदेश इन्चार्ज पद्मा अर्यालले निर्वाचन लक्षित गर्दै पार्टीको आन्तरिक प्रशिक्षण सञ्चालन भइरहेको बताइन् ।

कांग्रेस गण्डकी प्रदेश सभापति शुक्रराज शर्माले पार्टीलाई चुनाव लागिसकेको बताए । ‘हामीलाई चुनाव लागिसकेको छ,’ उनी भन्छन्, ‘प्रदेशका सबै स्थानीय तह, वडा–वडामा चुनावी अभियान लिएर गइसकेका छौं ।’ माओवादी केन्द्रकी गण्डकी प्रदेश अध्यक्ष गायत्री गुरुङले चैत ६ मा बृहत् कार्यकर्ता भेला राखेर चुनावी अभियान घोषणा गर्ने तयारीमा रहेको बताइन् ।

लुम्बिनीमा ठूला दलले स्थानीय तहबाटै चुनावी रणनीतिका लागि अवस्था विश्लेषण, तथ्यांक संकलनदेखि उम्मेदवार छनोटको मापदण्ड बनाउन थालेका छन् । त्यसका लागि वडादेखि टोलसम्म नेता–कार्यकर्ता परिचालित छन् । प्रदेश कमिटी बनाएको माओवादीले पदाधिकारी छनोट, कार्यविभाजन, विभाग र मोर्चा गठनमा जुटेको छ । अर्घाखाँचीमा भने कांग्रेस, माओवादी, एकीकृत समाजवादी र जनमोर्चाले गठबन्धन गराउने निर्णय गर्दै सोमबार नै पत्रकार सम्मेलन गरेका छन् ।

प्रदेशको ठूलो दल एमालेले प्रदेशस्तरको भेला सकेर कार्यकर्तालाई निर्वाचन केन्द्रित गतिविधिमा लाग्न निर्देशन दिएको छ । सोमबार रूपन्देहीको सैनामैनामा भएको जिल्लास्तरीय प्रशिक्षणमा एमाले उपाध्यक्ष विष्णु पौडेल र उपमहासचिव प्रदीप ज्ञवालीले एमाले एक्लै चुनावी मैदानमा उत्रिने भएकाले त्यहीअनुसार तयारी गर्न कार्यकर्तालाई निर्देशन दिए । एमालेले ‘हरेक वडा र स्थानीय तहमा सर्वसम्मत र जित्ने उम्मेदवार’ बनाउने गरी तयारी गर्न स्थानीय तहलाई निर्देशन दिएको छ ।

प्रदेशमा दोस्रो ठूलो दल कांग्रेस पनि एक साताअघि प्रदेशस्तरीय बैठक सकेर केन्द्रीय नेताको उपस्थितिमा प्रदेश निर्वाचन क्षेत्र, स्थानीय तह र गाउँ पसेको छ । प्रदेशका सबै निर्वाचन क्षेत्र र १ सय ९ स्थानीय तहसम्मै चुनावी अभियान पुर्‍याइएको कांग्रेस प्रदेश सभापति अमरसिंह पुनले बताए । केन्द्रमा गठबन्धन भए पनि प्रदेश र जिल्ला तहमा स्थानीय आवश्यकताका आधारमा मात्र गठबन्धन बनाउन सक्ने गरी प्रदेश समितिको बैठकमा छलफल भएको र गठबन्धन भए पनि रूख चुनाव चिह्नलाई प्राथमिकतामा राखेर मात्र गठबन्धन गर्न सकिने निर्णय कांग्रेसले गरेको छ । प्रदेशमा तेस्रो शक्तिका रूपमा रहेको माओवादी केन्द्र कमजोर बन्दै गएकाले गठबन्धन गरेरै निर्वाचनमा जाने तयारीमा छ । वडा र टोल तहसम्म नै नयाँ संगठन विस्तारमा जुटेको माओवादीले प्रदेश कमिटीलाई पनि पूर्णता दिन सकेको छैन ।

लुम्बिनी प्रदेशका माओवादी नेता सुदर्शन बरालले बुधबार प्रदेश कमिटीको बैठक आह्वान गरिएको बताए । छिट्टै हुने कार्यकर्ता प्रशिक्षणलाई अध्यक्ष पुष्पकमल दाहालले सम्बोधन गर्नेछन् । माओवादीले स्थानीय तह निर्वाचनका लागि गठबन्धन गर्ने विषयमा कांग्रेस, एकीकृत समाजवादी, जनता समाजवादी र जनमोर्चासँग छलफल चलिरहेको जनाएको छ । ‘अहिले नै कसरी गठबन्धन गर्ने भन्ने टुंगो लागेको छैन,’ उनले भने ।

तनहुँमा कांग्रेस र एमालेले चुनावी गतिविधिलाई तीव्रता दिएका छन् । मंगलबार मात्र ५० ठाउँमा कांग्रेसको भेला भएको जिल्ला सचिव सहदेव अधिकारीले बताए । एमालेले टोल कमिटी गठन, बैठकसहित पार्टी प्रवेशलाई पनि प्राथमिकतासाथ अगाडि बढाएको जिल्ला सचिव राजेश्वर ढकालले बताए । माओवादी केन्द्रले केन्द्रीय कमिटीको निर्णयबमोजिम चुनावमा होमिने तयारी भइरहेको जनाएको छ । ‘सम्भावित उम्मेदवारको नामावली तयार गरी मत सर्वेक्षण पनि गरिरहेका छौं,’ जिल्ला अध्यक्ष अतिन्द्रकेशरी न्यौपानेले भने, ‘कमिटीका सदस्यलाई हरेक क्षेत्रको राजनीतिक, आर्थिक, सामाजिक अवस्था बुझ्ने र विश्लेषण गर्ने गृहकार्य पनि दिएका छौं ।’ नेकपा एकीकृत समाजवादी पार्टी प्रवेशलाई प्राथमिकता दिँदै आफ्ना उम्मेदवार र पार्टीको अवस्थाबारे बुझ्नेलगायतका काम गरिरहेको जिल्ला सचिव श्रीराम कार्कीले बताए ।

एकीकृत समाजवादी भने संगठन विस्तारमा लागेको छ । संगठन भएका जिल्लामा क्षेत्र र पालिकास्तरमा कमिटी गठन भइरहेको र त्यो अभियान वडासम्म पुर्‍याउने तयारीमा जुटेको प्रदेश सचिव राजु गुरुङले बताए । प्रदेशका केही जिल्लामा जनता समाजवादी र राष्ट्रिय जनमोर्चाको पनि बलियो प्रभाव छ । बलियो संगठन नभएका साना दलले पनि संगठन विस्तार तीव्र पारेका छन् ।

कर्णालीमा माओवादी केन्द्रका अध्यक्ष दाहालले शनिबार वीरेन्द्रनगरमा कार्यकर्ताहरूलाई चुनावमा केन्द्रित हुन निर्देशन दिँदै पार्टीका एजेन्डाहरूबारे प्रशिक्षणसमेत दिए । आइतबार राप्रपा अध्यक्ष राजेन्द्र लिङ्देनले वीरेन्द्रनगरमै आयोजना गरिएको आमसभालाई सम्बोधन गरे भने सोमबार कांग्रेस महामन्त्री गगन थापाले ‘घरघर जाऔं, कांग्रेस जिताऔं’ अभियानको सुरु गरे ।

नेताहरूको दौडधुपले चुनाव नजिकिएको जस्तो लागेको बराहताल–४ की डिलकुमारी खत्रीले बताइन् । ‘सामुदायिक भवनमा दैनिकजसो फेरिने झन्डा, ब्यानर, नाराबाजी र भाषणले चुनावकै झल्को दिएको छ,’ उनले भनिन् । एकीकृत समाजवादीका प्रदेश इन्चार्ज प्रकाश ज्वालाले पार्टीका नियमित कामहरू जारी रहेको बताए । माओवादी केन्द्रकी प्रदेश अध्यक्ष विमला केसीले प्रदेश समिति बैठकको निर्णय सुनाउन सबै नेताहरूलाई गाउँगाउँमा खटाइएको बताइन् । कांग्रेस प्रदेश महामन्त्री कृष्णबहादुर रोकायाले सबै जिल्लामा अभियान सुरु गरी चुनावी कार्यक्रमलाई तीव्रता दिएको जनाए ।

सुदूरपश्चिममा दलहरूले चुनावी कार्यक्रम थालेका छन् । सोमबार माओवादी केन्द्रका अध्यक्ष दाहालले धनगढीमा आयोजित नौवटै जिल्लाका अगुवा कार्यकर्ता भेलामा दुई महिनासम्म मतदाताको घरघरमा पुग्न निर्देशन दिए । कांग्रेसले पनि केन्द्र, प्रदेश, जिल्ला र स्थानीय तहका प्रतिनिधिहरू बेग्लाबेग्लै रूपमा परिचालन गरिएको पार्टीका सुदूरपश्चिम सभापति वीरबहादुर बलायरले बताए । ‘केन्द्रले खटाएका प्रतिनिधिको अगुवाइमा आइतबारदेखि जिल्लामा कार्यक्रम सुरु भएका छन्,’ सभापति बलायरले भने, ‘प्रदेश समितिबाट खटाइएका प्रतिनिधि १५ दिनसम्म हरेक स्थानीय तहमा परिचालित हुँदै छन् ।’

प्रदेश सचिव धर्मराज पाठकका अनुसार पार्टीले दुई साताअघि नै प्रदेशस्तरीय प्रशिक्षण सकेको छ । ८८ वटै पालिकामा सर्भेक्षण गर्ने, स्थानीय मुद्दाको पहिचान गर्ने, राम्रा कामहरूको प्रचारप्रसार गर्नेलगायत सुरु भएको उनले बताए । एकीकृत समाजवादीले पनि निर्वाचन लक्षित अभियान भइरहेको जनाएको छ । संगठन निर्माणमा जुटेका नेताकार्यकर्ता निर्वाचन केन्द्रित कार्यक्रममा परिचालित भएको प्रदेश अध्यक्ष विक्रमबहादुर शाहीले बताए । एमाले, नेपाली कांग्रेस, माओवादी केन्द्र र राप्रपालगायतका दलहरूले धुमधामका साथ पार्टी प्रवेशलगायत विभिन्न गतिविधिहरू गरिरहेका छन् । हरेक कार्यक्रममा सय/डेढ सयको संख्यामा पार्टी प्रवेश पनि हुने गरेका छन् । ‘टोल–टोलमा भेलादेखि पार्टी प्रवेश कार्यक्रम चलिरहेको छ,’ एमाले कञ्चनपुरका उपसचिव कर्णबहादुर चन्दले भने, ‘समाजवादीमा गएकालाई फर्काउने काम पनि भइरहेको छ ।’ प्रवेश गरेकामध्ये कतिपयले त सामाजिक सञ्जालमार्फत आफूलाई झुक्याइएको प्रतिक्रिया दिने गरेका छन् ।

प्रकाशित : चैत्र २, २०७८ ०९:५८
पूरा पढ्नुहोस्
प्रतिक्रिया
पठाउनुहोस्
×