हनुमानढोका प्रागंणको सिमेन्ट-स्तम्भ निर्माण रोक्न माग

सम्पदाविद् आलोकसिद्धी तुलाधरले महानगरपालिकाले पुरातत्त्व विभागसहितका निकायबाट अनुमति नलिई सिमेन्ट स्तम्भ बनाएकाले उक्त निर्माण कार्यलाई तत्काल रोक्न आग्रह गरे ।

संरक्षित सम्पदा क्षेत्रमा मनोमानी ढंगमा भइरहेको निर्माण रोक्न पुरातत्त्व विभागको विश्व सम्पदा संरक्षण शाखाले फागुन ६ मा महानगरलाई पत्र लेखे पनि यसको ‘सुनुवाइ’ नगरी जबरजस्ती निर्माण कार्य अघि बढाइएको सम्पदाविद् तुलाधरले बताए ।

सम्पदाप्रेमीको एउटा समूहले आइतबार काठमाडौंस्थित युनेस्को कार्यालय, पुरातत्त्व विभाग, महानगरपालिकासमेतलाई अवैधानिक र सम्पदाविरोधी निर्माण कार्य तत्काल रोक्न आग्रह गरेका थिए ।

‘यो विश्व सम्पदा क्षेत्रभित्र भइरहेको अनधिकृत काम हो, संरक्षित क्षेत्रको मूल्य-मान्यता जोगाउन र सम्पदा संरक्षण अभियानमा संलग्न हुन अनुरोध गर्दै आज पनि पुरातत्त्वले महानगरपालिकालाई जारी रहेको निर्माण कार्य तत्काल रोक्न पत्राचार गरेका छौं,’ पुरातत्त्व विभागका महानिर्देशक दामोदर गौतमले कान्तिपुरसित भने ।

काठमाडौं महानगरको भौतिक निर्माण शाखाले आफूखुसी निर्माण कार्य अघि बढाएकोमा काठमाडौंका मेयर विद्यासुन्दर शाक्यले कुनै प्रतिक्रिया जनाउन चाहेका छैनन् । यो सम्पदा क्षेत्रमा रहेको हनुमानढोका दरबार संरक्षण कार्यक्रम कार्यालयलाई पनि महानगरले निर्माण योजनाबारे जानकारी गराएको छैन ।